NTAWV NTSHIAB HAUV HNUB TIM 11 LUB 5 HLIS 2021

NTAWV HAUJ LWM (HL16:22-34)
Tas tsoom sid hauv lub tshav puam txiav txim qw ntsuag qees rau Paj Lug thiab Xis Las. Ces cov nom txiav txim kom luag muab nkawd tej khaub ncaws hle, thiab muab nkawd nplawm. 
Lawv muab nkawd ntaus sab kawg, ces lawv mam muab nkawd pov rau hauv tsev loj faj. Lawv hais tuav ntsej rawv rau tus zov tsev loj faj kom zov nkawd zoo zoo. 
Tus zov tsev loj faj hnov cov nom tswv hais li ntawd, mas nws coj nkawd mus kaw hauv lub qhov taub uas nyob hauv lub nruab nrog tsev loj faj, thiab tseem xuas saw hlau khi nkawd ko taw tib si.
Thaum ib tag hmo, Paj Lug thiab Xis Las nkawd teev ntuj, nkawd hu nkauj cav txog Tswv Ntuj. Cov neeg nyob txim mloog nkawd. 
Ib sij huam, lub tsev loj faj qeeg heev, cov phab ntsa ua zog tas. Tas cov qhov rooj cia li qhib plho tam sim ntawd, hos cov saw khi cov neeg raug txim plam tas huv tib si. 
Tus zov tsev loj faj tsim dheev los, nws pom cov qhov rooj qhib lug, ces nws rho hlo nws rab ntaj, nws yuav rov tua nws, vim nws xav tias cov neeg raug txim twb khiav tas lawm. Tab sis Paj Lug qw ib suab nrov tias "Koj txhob tua koj. Peb sawv daws tseem nyob ntawm no huv tib si." 
Tus zov tsev loj faj thiaj kom luag taws tsau, ces nws chaws nrawm nroos los hauv, nws tshee tshee, nws los txhos caug ntawm Paj Lug thiab Xis Las nkawd. Ces nws coj nkawd tawm sab nraud, nws hais rau nkawd tias "Huab Tais, kuv yuav ua li cas Ntuj thiaj yuav cawm kuv?" 
Nkawd teb tias "Koj ntseeg txog Huab Tais Yes Xus, ces Ntuj yuav cawm koj thiab koj tsev neeg." 
Nkawd qhia Huab Tais Lo Lus rau nws, thiab rau cov neeg hauv nws tsev tas huv tib si. Tus zov tsev loj faj coj nkawd los hauv nws tsev, thaum ntawd twb yog ib tag hmo lawm. Nws ntxuav nkawd cov qhov txhab. Ces nws thiab tas nws tsev neeg huv si txais lub cim ntxuav tam sim ntawd. Nws coj nkawd nce mus saum nws tsev, nws rau mov rau sawv daws noj. Nws thiab tas nws tsev neeg huv si zoo siab, vim lawv ntseeg txog Tswv Ntuj lawm.

ZAM NTAWV MOO ZOO (Z16:5-11)
Yes Xus hais tias "Nyem no kuv mus cuag Tus Xa kuv tuaj. Nej tsis muaj leej twg nug kuv tias koj mus qhov twg? Ziag no, nej tu siab tas, vim kuv hais tej ntawd rau nej. 
Tab sis kuv hais qhov tseeb rau nej tias cia kuv mus mas yuav zoo dua rau nej. Yog kuv tsis mus, mas Leej Nplij Neeg yuav tsis tuaj rau hauv nej. Hos yog kuv mus, mas kuv yuav xa Leej Nplij Neeg tuaj rau nej. 
Thaum Leej Nplij Neeg tuaj txog, nws yuav ua kom qab ntuj neeg pom tias lawv ua txhaum, ua tsis ncaj, thiab txiav txim yuam kev. 
Lub qab ntuj neeg ua txhaum, vim lawv tsis ntseeg txog kuv. Lub qab ntuj neeg ua tsis ncaj, vim kuv mus cuag Leej Txiv, ces nej tsis pom kuv ntxiv. Lub qab ntuj neeg txiav txim yuam kev, vim tus Tswj lub qab ntuj neeg raug txim lawm.