NTAWV NTSHIAB HAUV HNUB TIM 12 LUB 5 HLIS 2021

NTAWV HAUJ LWM (HL17:15,22-18:1)
Cov neeg uas xa Paj Lug, lawv xa nws mus txog ntua As Thes Nas, lawv mam rov qab. Lawv coj Paj Lug cov lus rov los rau Xis Las thiab Tis Mos Tes nkawd kom nkawd mus cuag Paj Lug sai.
Ces Paj Lug sawv ntsug nyob hauv nruab nrab lub tsev As Les Os Pas. Nws hais tias "Cov As Thes Nas, raws li kuv pom mas nej yog ib co neeg hwm dab zoo tshaj tej. Kuv mus yos hauv nej lub tsheej thiab mus xyuas nej cov tsev teev dab, mas kuv pom muaj ib lub thaj txi dab uas sau ib co npe ntawv tias cia hwm tus dab peb tsis paub. Mas tus uas nej hwm, tab sis nej tsis paub nws, kuv tuaj tshaj txog nws rau nej paub. 
Tus Tswv Ntuj tsim lub ntiaj teb thiab tsim tas puas tsav yam nyob hauv lub sim ceeb, nws yog tus Huab Tais kav lub ntuj lub teb. Nws tsis nyob hauv cov tsev teev ntuj uas yog neeg ob txhais tes txhim. 
Nws kuj tsis yuav neeg ob txhais tes los tsob hwb nws, xws li tus xav yuav ub yuav no. Nws yog tus pub txoj sia rau sawv daws, nws pub txoj pa thiab tas puas tsav yam rau peb. Tswv Ntuj tsim neeg los nyob puv lub ntiaj teb; nws ua neeg tawm ntawm ib lub hauv paus los, nws teem caij teem chaw rau cov haiv neeg nyob. Tos nws ua li ntawd yog vim nws xav kom neeg maj mam maub nrhiav kom mus cuag tau Tswv Ntuj, thiab ntsib Tswv Ntuj. Vim tias Tswv Ntuj yeej nyob ze peb txhua leej txhua tus. 
Peb nyob hauv Tswv Ntuj txhais tes, mas peb thiaj muaj txoj sia, txawj nti, thiab ciaj taus. Nej twb muaj ib co neeg tau hais tias peb yog Tswv Ntuj caj ces.
Li ntawd, peb yog Tswv Ntuj caj ces, mas peb yuav tsis txhob xav tias Tswv Ntuj yog zoo li ib thooj kub, ib thooj nyiaj, los ib thooj pob zeb uas neeg lub tswv yim thiab txhais tes txawj tes nkiag puab tau. 
Nyem no, Tswv Ntuj tsis xav kom neeg nyob hauv txoj kev tsis paub Ntuj ntxiv. Tswv Ntuj ceeb toom rau ib zeej tsoom nyob tas qhov txhia chaw tias sawv daws yuav tsum hloov siab los thov txhaum. Vim Tswv Ntuj tau teem ib hnub cia txiav txim rau lub qab ntuj neeg raws li txoj kev ncaj. Tswv Ntuj twb xaiv tus txiav txim ntawd lawm, nws tsa tus txiav txim sawv hauv cov tub tuag rov los, sawv daws thiaj paub tseeb tias Tswv Ntuj tso siab rau tus yuav txiav txim ntawd." 
Thaum Paj Lug nyuam qhuav hais txog kev sawv hauv cov tub tuag rov los, mas ib txhia thuam Paj Lug, ib txhia hais rau Paj Lug tias "Lwm zaus tso, peb mam rov mloog koj hais txog qhov ntawd dua." 
Ua li mas Paj Lug tso lawv tseg li ntawd. Tsis kav, kuj muaj tus puav raws Paj Lug thiab txais kev ntseeg. Cov txais kev ntseeg muaj ib tug yog Dias Nws Xyos, uas nws yog ib tug kws txuj hauv cov As Les Os Pas; muaj ib tug poj niam hu ua Das Mas Lis thiab ob peb leeg ntxiv uas lawv tau txais kev ntseeg. Ua li ntawd tas, ces Paj Lug tawm hauv As Thes Nas. Nws mus txog Kos Lis Nthos.

ZAM NTAWV MOO ZOO (Z16:12-15)
Yes Xus hais tias “Kuv tseem tshuav ntau yam yuav hais rau nej, tab sis nyem no nej ris tsis taus. Thaum Leej Ntuj Plig qhia qhov tseem ceeb tuaj txog, nws yuav coj nej mus rau qhov tseeb tas huv si. Vim nws yuav tsis hais nws cov lus, nws yuav hais qhov nws hnov, thiab nws yuav xub qhia nej txog tej xwm uas yuav tshwm sim tuaj. 
Nws yuav ua kom kuv muaj koob meej, vim nws yuav coj yam uas yog kuv tug tuaj qhia rau nej. Tas ib puas tsav yam uas yog Leej Txiv tug, mas kuj yog kuv tug huv tib si. Vim li ntawd kuv thiaj hais rau nej tias Leej Nplij Neeg yuav coj yam uas yog kuv tug tuaj qhia rau nej.”