NTAWV NTSHIAB HAUV HNUB TIM 13 LUB 5 HLIS 2021

NTAWV HAUJ LWM (HL 18:1-8) 
Nyob Kos Lis Nthos, Paj Lug ntsib ib tug Yus Das hu ua As Kis Las. As Kis Las yug los nyob Poos Tus teb, nws mus nyob Los Mas. Nws thiab nws poj niam hu ua Phis Xis Las nkawd nyuam qhuav tsiv tim Is Tas Lias teb los txog. Vim tus Vaj Kaus Dias ceeb toom rau cov Yus Das kom lawv sawv daws tawm hauv Los Mas mus. Paj Lug mus cuag nkawd. Vim tias Paj Lug kuj ua txoj hauj lwm uas nkawd ua thiab, nws thiaj mus nrog nkawd nyob, ces lawv ua hauj lwm ua ke. Lawv txoj hauj lwm yog ntos ntaub ua tsev tsam phooj. 
Niaj hnub, Paj Lug mus qhia sawv daws nyob hauv lub tsev txoos. Nws siv zog qhia cov Yus Das thiab cov Hes Las kom lawv ntseeg. Thaum Xis Las thiab Tis Mos Tes nkawd tuaj ntawm Mas Xes Dos Nias teb tuaj txog lawm, mas Paj Lug siv nws lub sij hawm cia tshaj Lo Lus lawm xwb. Nws zeem tseeb rau cov Yus Das tias Yes Xus yog Leej Pleev. 
Tab sis lawv tsis ntseeg, lawv hais tej lo lus thuam Ntuj. Ces Paj Lug nchos nws cov ris tsho thiab nws hais rau lawv tias "Cia nej cov ntshav rov poob los rau saum nej taub hau. Kuv li mas kuv tsis txhaum. Txij no mus, kuv yuav mus tsham cov neeg teev pej kum dab."
Paj Lug hais li ntawd tas, ces nws sawv kev mus. Nws mus hauv ib tug hu ua Tis Tos Yus Tus lub tsev. Yus Tus yog ib tug neeg hwm Tswv Ntuj; nws lub tsev nyob puab lub tsev Txoos. 
Khis Pus uas yog tus saib lub tsev Txoos nrog nws tsev neeg sawv daws ntseeg txog Huab Tais. Muaj ntau leej Kos Lis Nthos hnov Paj Lug, lawv ntseeg thiab txais lub cim ntxuav.

ZAM NTAWV MOO ZOO (Z 16:16-20)
Yes Xus hais rau cov thwj tim tias “Tshuav me ntsis ntxiv lawm xwb, ces nej yuav tsis pom kuv. Tab sis ib me ntsis ntxiv, nej yuav rov pom kuv." 
Muaj ob peb tug thwj tim sib tham tias "Nws hais dab tsi li ntawd rau peb tias tshuav me ntsis ntxiv lawm xwb, ces nej yuav tsis pom kuv, tab sis ib me ntsis ntxiv, nej yuav rov pom kuv; thiab lo lus tias kuv mus cuag Leej Txiv." 
Cov thwj tim hais tias "Lo lus tias me ntsis, uas nws hais ntawd yog dab tsi? Peb tsis paub nws xav hais dab tsi." 
Yes Xus paub tias lawv xav nug nws, ces nws hais rau lawv tias "Nej rov sib nug txog lo lus kuv hais tias tshuav me ntsis lawm xwb, nej yuav tsis pom kuv, tab sis ib me ntsis ntxiv, nej yuav rov pom kuv. Kuv hais qhov muaj tseeb tiag rau nej tias nej yuav quaj thiab nej yuav seev, hos lub qab ntuj neeg yuav zoo siab. Nej yuav tu siab, tab sis nej txoj kev tu siab yuav hloov ua kev zoo siab.”