NTAWV NTSHIAB HAUV HNUB TIM 15 LUB 5 HLIS 2021

NTAWV HAUJ LWM (HL 18:23-28)
Paj Lug nyob As Nthias Kias ib ntus, nws sawv kev mus ntxiv. Nws mus xyuas Nkas Las Tias teb thiab Fis Zias teb. Nws pab cov thwj tim kom sawv daws ntseeg khov ntseeg ruaj. 
Ib tug Yus Das hu ua As Pos Los, nyob As Les Xas Nrias tuaj txog Es Fes Xos. Nws yog ib tug neeg txawj tham thiab paub Ntawv Ntshiab zoo. Nws tau kawm Huab Tais Txoj Kev. Nws kub siab, nws hais thiab nws qhia raug kawg txog Yes Xus, tab sis nws tsuas paub Zam lub cim ntxuav xwb. 
Nws hais lus muaj cuab kav thiab tsis ua xyem xyav nyob hauv lub tsev Txoos. Phis Xis Las thiab As Kis Las nkawd mloog nws hais tas, ces nkawd coj nws nrog nkawd mus, thiab nkawd qhia Tswv Ntuj Txoj Kev rau nws kom meej dua. 
As Pos Los xav mus As Kas Yis teb. Cov kwj tij txheem nws kom ua siab loj mus. Lawv sau ib tsab ntawv mus rau cov thwj tim kom lawv txais nws. Vim Ntuj lub txiaj ntsim pab, mas thaum nws tuaj txog As Kas Yis teb, nws tau pab cov ntseeg ntau kawg. 
Nws ua siab loj siab tawv tab meeg tiv cov Yus Das. Nws siv Ntawv Ntshiab los qhia tias Yes Xus yeej yog Leej Pleev tiag.

ZAM NTAWV MOO ZOO (Z 16:24-28)
Yes Xus hais rau cov thwj tim tias "Kuv hais qhov muaj tseeb tiag rau nej: Nej tuav txog kuv lub npe thov dab tsi ntawm Leej Txiv, mas nws yuav pub rau nej. 
Los txog tav no, nej tsis tau tuav txog kuv lub npe thov ib yam dab tsi. Nej thov ces nej yuav tau txais, nej txoj kev kaj siab thiaj yuav puv phwj yaws. 
Kuv tau siv tej zaj paj lug los hais tej no rau nej. Txog lub caij uas kuv yuav tsis siv tej zaj paj lug los hais rau nej ntxiv. Kuv yuav ncaj qha qhia meej txog Leej Txiv rau nej. 
Txog hnub ntawd, nej yuav tuav txog kuv lub npe los thov. Kuv tsis hais rau nej tias kuv yuav thov Leej Txiv rau nej. 
Leej Txiv twb nyiam nej lawm, vim nej nyiam kuv, thiab nej ntseeg tias kuv tuaj ntawm Tswv Ntuj tuaj. Kuv tawm ntawm Leej Txiv tuaj nyob hauv lub qab ntuj no. Kuv tso lub qab ntuj neeg tseg, kuv rov mus cuag Leej Txiv."