NTAWV NTSHIAB HAUV HNUB TIM 16 LUB 5 HLIS 2021

NTAWV HAUJ LWM (HL1:1-11)
Tes Os Fis Los, nyob hauv kuv thawj phau ntawv, kuv twb sau txog tas ib puas tsav yam uas Yes Xus tau ua thiab tau qhia txij lub hauv paus los, mus txog hnub uas Ntuj nqa nws mus saum ntuj. Thaum nws yuav mus, Leej Ntuj Plig Ntshiab tshoj kom nws xub qhia cov Hauv Paus Xa Lus uas nws tau xaiv. 
Thaum nws raug luag tsim txom tas, nws yees tawm los xyuas cov Hauv Paus Xa Lus. Nws ua ntau yam zeem tseeb tias nws muaj txoj sia, nws tawm los rau lawv pom plaub caug hnub, nws tham txog Tswv Ntuj lub Ceeb Tsheej rau lawv.
Thaum Yes Xus nrog lawv nyob, nws hais rau lawv kom tsis txhob tawm hauv Yes Lus Xas Les mus, kom lawv nyob tos Leej Txiv lo lus cog tseg "Lo lus uas nej hnov kuv hais tias Zam ua kab ke ntxuav nyob hauv dej. Hos nej, mas tshuav hnub puav xwb, nej yuav txais kab ke ntxuav nyob hauv Leej Ntuj Plig Ntshiab." 
Thaum cov Hauv Paus Xa Lus nyob ua ke, lawv nug Yes Xus tias "Huab Tais, nyem no puas yog lub sij hawm koj yuav rov tsa tus vaj His Xas Lais?" 
Yes Xus hais rau lawv tias "Tsis yog nej hauj lwm yuav paub txog lub zim txwv thiab lub sij hawm uas Leej Txiv siv nws lub hwj huam los teem cia. Tab sis, Leej Ntuj Plig Ntshiab yuav nqes los saum nej, ces nej yuav txais hwj huam, nej yuav ua kuv cov tim khawv nyob Yes Lus Xas Les, nyob thoob lub xeev Yus Das, thiab Xas Mas Lias, mus txog puag tim npoo ntiaj teb."
Yes Xus hais cov lus no tas, nws nce zuj zus ntawm lawv qhov muag. Muaj ib tw huab los thaiv ces lawv tsis pom nws lawm. 
Thaum Yes Xus nce mus saum ub lawm, mas lawv nyob ntsia ntsoov lub ntuj, ces muaj ob tug neeg hnav tsoos dawb los cuag lawv. Nkawd hais tias "Cov Nkas Lis Lais, vim li cas nej nyob ntsia ntsoov lub ntuj zoo li no? 
Tus Yes Xus uas Ntuj nqa nws hauv nej mus rau saum ntuj lawd, nws yuav rov los zoo nkaus li nej pom nws nce mus saum ntuj thiab."

NTAWV ES FES XO (EFX1:17-23)
Kuv thov kom peb tus Huab Tais Yes Xus Pleev tus Tswv Ntuj, Leej Txiv muaj koob meej, pub ib lub tswv yim thoob tsib, thiab ib lub tswv yim txawj mem tau tej yam uas Ntuj qhib tawm los, nej thiaj yuav paub Tswv Ntuj tiag. 
Kuv thov Tswv Ntuj tso qhov pom kev ci tuaj rau hauv nej lub siab, kom nej pom tias txoj kev tso siab uas Ntuj hu nej los nyob hauv, zoo npaum li cas, kom nej pom tias lub cuab tam nto koob meej nplua nuj npaum li cas nyob hauv cov ntshiab. 
Nej tseem yuav pom Tswv Ntuj lub hwj huam uas peb ntsuas tsis tau. Nej thiaj yuav pom tias lub hwj huam no pab peb cov ntseeg heev npaum li cas, vim nws lub zog muaj peev xwm loj. 
Tswv Ntuj nthuav nws lub zog nyob hauv Leej Pleev : nws tsa Leej Pleev sawv hauv cov tuag los, nws kom Leej Pleev zaum ntawm nws sab xis, nyob saum cov txheej ntuj,  nyob siab dua cov Tshiab ua vaj, siab dua cov Tshiab muaj hwj huam, siab dua cov Tshiab muaj zog, siab dua cov Tshiab ua huab tais, siab dua txhua leej nto npe, hauv lub zim txwv no mus dhau txhiab tiam yav tom ntej. 
Tswv Ntuj tso tas puas tsav yam rau hauv Leej Pleev qab xib taws. Tswv Ntuj tsa Leej Pleev ua lub Koom Txoos tus Hau siab dua txhua leej; lub Koom Txoos yog nws lub Cev. Leej Pleev lub Cev Hlob Tiav, nws nyob puv hauv txhua leej txhua tus, nws nyob puv lub sim ceeb.

MAS KOS NTAWV MOO ZOO (MK16:25-20)
Yes Xus hais rau cov thwj tim tias “Nej mus thoob qab ntuj khwb, nej tshaj lub Moo Zoo rau txhia leej txhia tus uas Ntuj tsim los. Tus twg ntseeg thiab txais lub Cim Ntxuav nws yuav txais kev cawm. Hos tus tsis ntseeg nws yuav raug txim. 
Cov ntseeg, lawv yuav muaj peev xwm ua zoo li no: lawv yuav tuav kuv lub npe ntiab cov dab phem, lawv yuav hais tej xeem lus tshiab. Tab yog lawv nthos nab, los haus tshuaj lom neeg, mas lawv yuav tsis raug xwv txheej. Thaum lawv tsa tes rau saum cov neeg muaj txiab muaj nkeeg, mas cov neeg ntawd yuav zoo hlo.”
Huab Tais Yes Xus hais li ntawd rau lawv tas, nws nce mus lawm saum ntuj. Nws mus zaum nyob ntawm Tswv Ntuj sab xis. 
Cov Thwj Tim tawm mus tshaj lub Moo Zoo nyob tas txhia teb chaws. Huab Tais nrog lawv ua hauj lwm. Nws ua hwj huam pab nres Lo Lus.