NTAWV NTSHIAB HAUV HNUB TIM 17 LUB 5 HLIS 2021

NTAWV HAUJ LWM (HL 19:1-8)
Thaum As Pos Los nyob Kos Lis Nthos, Paj Lug hla lub teb chaws toj siab mus rau Es Fes Xos. Nws ntsib ib co thwj tim nyob ntawd. 
Nws nug lawv hais tias "Thaum nej los ntseeg, nej puas tau txais Leej Ntuj Plig Ntshiab?" 
Lawv teb nws tias "Peb tsis tau hnov tias muaj Leej Ntuj Plig Ntshiab li." 
Paj Lug thiaj hais tias "Ua li nej txais leej twg lub cim ntxuav?”
Lawv teb tias "Peb txais Zam lub cim ntxuav." 
Paj Lug hais rau lawv tias "Zam ua kab ke ntxuav kom sawv daws thov txhaum. Nws hais kom tsoom laj mej pej xeem ntseeg txog tus yuav lawv nws qab tuaj, tus ntawd yog Yes Xus."
Lawv hnov cov lus ntawd, mas lawv txais lub cim ntxuav nyob hauv Huab Tais Yes Xus lub npe. Thaum Paj Lug tsa tes rau lawv, mas Leej Ntuj Plig Ntshiab los nyob saum lawv, ces lawv hais ib co xeem lus tshiab, thiab lawv ua yaj saub. Pab neeg no tas huv si, muaj kaum ob leeg. 
Paj Lug mus hauv lub tsev Txoos. Nws muaj cuab kav hais lus thiab tsis ua xyem xyav peb lub hlis, nws tham thiab muab siab rau nrhiav cov lus hais kom raug Tswv Ntuj lub Ceeb Tsheej.

ZAM NTAWV MOO ZOO (Z16:29-33)
Yes Xus cov thwj tim hais tias "Zaum no koj ncaj qha hais, koj tsis siv tej zaj paj lug lawm. Zaum no peb paub tias koj paub tas ib puas tsav yam, tsis tas leej twg yuav nug koj. Yog vim li ntawd peb thiaj ntseeg tias koj tuaj ntawm Tswv Ntuj tuaj." 
Yes Xus teb rau lawv tias "Nyem no nej ntseeg lawm lod? 
Yuav txog sij hawm, twb txog lub caij uas nej sawv daws yuav sib ncaim tas, ib leeg yuav mus ib qho, nej yuav tso kuv pov tseg. Tab sis kuv tsis nyob kuv ib leeg, vim Leej Txiv nrog kuv. 
Kuv hais tej ntawd rau nej kom nej nyob thaj yeeb hauv kuv. Nej yuav raug luag hiam hauv lub qab ntuj no, tab sis nej ua siab loj mog! Kuv twb yeej lub qab ntuj neeg lawm.”