NTAWV NTSHIAB HAUV HNUB TIM 18 LUB 5 HLIS 2021

NTAWV HAUJ LWM (HL20:17-27)
Thaum Paj Lug tuaj txog Mis Les Tos, nws xa neeg mus hu cov txwj laus saib lub Koom Txoos nyob Es Fes Xos tuaj. Thaum lawv tuaj txog, nws hais rau lawv tias "Txij hnub kuv ko taw tau tsuj As Xias teb los txog tav no, nej paub tias kuv ib txwm ua li cas rau nej. 
Kuv yog tus neeg me tsob hwb Huab Tais, kuv tau ntsib txoj kev los kua muag, txoj kev txom nyem ntau zaus, vim cov Yus Das tuav tswv yim ua phem rau kuv. 
Kuv pom ib yam zoo ua los pab nej thaum twg, mas kuv tsis tau thaub qab ib zaug li, xws li thaum kuv qhuab ntuas nej thiab qhia nej nyob ntawm sawv daws xub ntiag los nyob hauv nej vaj nej tsev. 
Kuv qhuab ntuas cov Yus Das thiab cov Hes Las tas zog kom sawv daws tig los mloog Tswv Ntuj thiab ntseeg txog peb tus Huab Tais Yes Xus Pleev. 
Nyem no, kuv mus Yes Lus Xas Les, Leej Ntuj Plig twb muab saw hlau los khi kuv lawm, kuv yeej tsis paub tias yuav muaj dab tsi tuaj raug kuv nyob ped. 
Kuv tsuas paub tias thaum kuv hla ib lub nroog mus rau lwm lub, mas Leej Ntuj Plig Ntshiab qhia kuv tias saw hlau thiab kev txom nyem tos nrhw kuv. 
Txawm li cas los kuv tsis saib tias kuv txoj sia muaj nqis hnyav. Tsuav yog kuv tau taug kuv txoj kev kom kawg thiab leg cov dej num uas Huab Tais Yes Xus muab rau kuv leg kom tiav, yam li mus ua tim khawv txog lub Moo Zoo pub Tswv Ntuj lub txiaj ntsim. 
Kuv paub tias txij no mus, tas nej cov uas kuv tau nrog nyob thiab qhia txog lub Ceeb Tsheej rau, mas nej yuav tsis pom kuv lub ntsej muag ntxiv lawm. Vim qhov ntawd, mas hnub no, kuv thiaj hais tseeb rau nej tias kuv tau ua ncaj rau nej sawv daws. 
Thaum kuv tshaj txog txoj kev uas Tswv Ntuj npaj rau nej, mas kuv tsis ntshai ib zaug li.

ZAM NTAWV MOO ZOO (Z17:1-11a)
Yes Xus tsa muag ntsia saum ntuj, nws hais tias "Txiv, txog sij hawm lawm! Koj ua kom koj Leej Tub muaj koob meej mas. Ces koj Leej Tub yuav ua kom koj muaj koob meej, vim koj muab hwj huam rau nws kav tas txhua leej txhua tus, kom nws pub txoj sia nyob mus li rau txhua leej uas koj muab rau nws. 
Txoj sia nyob mus li yog zoo li no: kom lawv paub koj, uas yog tus tseem Tswv Ntuj, thiab paub Yes Xus Pleev uas yog tus koj xa tuaj. 
Kuv ua kom koj muaj koob meej nyob ntiaj teb no, vim tias cov hauj lwm uas koj muab rau kuv ua, mas kuv ua tiav lawm. 
Txiv, nyem no koj ua kom kuv muaj koob meej nyob ntawm koj xub ntiag, yog lub koob meej uas kuv muaj txawm rau ntawm koj xub ntiag thaum lub sim ceeb tsis tau xeeb los nyob. 
Cov neeg koj rho hauv lub qab ntuj los pub rau kuv, mas kuv ua kom lawv pom xyeem koj lub Npe. Cov neeg no yog koj tug, koj muab lawv pub rau kuv, ces lawv coj rawv koj lo lus. 
Nyem no lawv paub tias tas txhua yam uas koj muab rau kuv yog tuaj ntawm koj tuaj. Vim tias cov lus uas koj muab rau kuv, mas kuv muab pub rau lawv lawm. Lawv txais koj cov lus, ces lawv paub tseeb tias kuv tuaj ntawm koj tuaj, thiab lawv ntseeg tias yog koj xa kuv tuaj. 
Kuv thov koj rau lawv. Kuv tsis thov koj rau lub qab ntuj neeg, kuv thov koj rau cov uas koj muab pub rau kuv, vim lawv yog koj tug. 
Txhua yam uas yog kuv tug, kuj yog koj tug; txhua yam uas yog koj tug, kuj yog kuv tug thiab. Kuv muaj koob meej nyob hauv lawv. 
Kuv tsis nyob hauv lub qab ntuj no ntxiv lawm, tab sis lawv tseem nyob hauv lub qab ntuj no. Hos kuv, mas kuv los cuag koj.