NTAWV NTSHIAB HAUV HNUB TIM 19 LUB 3 HLIS 2021

HWM LEEJ NTSHIAB YOS XES
NTAWV XAS MUAS PHAU OB (2XM7:4-5A,12-14A,16) 
Hmo ntawd, Nas Taas hnov Tswv Ntuj lo lus no koj mus hais rau kuv tus tub txib Das Vis tias HUAB TAIS hais li no ‘Thaum koj sim neej dua tas koj yuav mus nrog koj cov poj yawm txwv koob pw, kuv yuav cia koj ib tug xeeb ntxwv tawm ntawm koj roj ntsha los hloov koj ua vaj. Kuv yuav nres nws txoj kev ua vaj kom nyob ruaj nreb.  Kuv yuav ua nws txiv, nws yuav yog kuv leej tub.

Koj tsev neeg thiab koj txoj kev ua vaj yuav nyob mus li nyob ntawm kuv xub ntiag. Koj lub theej kiab yuav nyob ruaj nreb mus ib txhis.” 

NTAWV LOS MAS (4:13,16-18,22)
Tswv Ntuj cog lus tias nws yuav muab lub sim ceeb los pub ua ib lub cuab tam rau Has Nplas Has thiab Has Nplas Has Has tsoom xeeb ntxwv: Tswv Ntuj niaj hnub ua raws li lo lus nws cog, tsis yog vim Txoj Cai, yog vim kev ncaj tuaj ntawm kev ntseeg tuaj.

Yog vim lub cuab tam tuaj ntawm kev ntseeg tuaj, mas lub cuab tam thiaj yog ib lub txiaj ntsim pub dawb. Thiab lo lus uas Tswv Ntuj cog, mas nws pub rau tas tsoom xeeb ntxwv: yog cov xeeb ntxwv nyob hauv Txoj Cai, thiab cov xeeb ntxwv nyob hauv peb txiv Has Nplas Has txoj kev ntseeg.

Muaj raws li lo lus sau tseg tias ‘Kuv tsa koj ua txiv rau tej haiv neeg coob kawg.’ Has Nplas Has yog peb txiv nyob ntawm Tswv Ntuj xub ntiag: Tus Tswv Ntuj uas Has Nplas Has ntseeg txog yog tus Tswv Ntuj pub txoj sia rau cov neeg tuag, thiab nws hu tej yam tseem tsis tau xeeb, kom xeeb los muaj txoj sia.

Tab yog Has Nplas Has tsis pom muaj chaw tso siab, tsis kav nws tseem tso siab, nws ntseeg, ces nws tau ua ntau haiv neeg txiv, raws nraim li Tswv Ntuj lo lus hais tias ‘koj tsoom xeeb ntxwv yuav coob npaum no.’

Yog vim qhov ntawd Tswv Ntuj thiaj saib Has Nplas Has yog tus ncaj. 

MAS TAIS NTAWV MOO ZOO (MT1:16,18-21,24A)
Yas Kos yug Yos Xes uas yog Mab Liab tus txiv. Mab Liab yug Yes Xus, uas luag hu nws ua Leej Pleev.

Yes Xus Pleev lub keeb chiv zoo li no: Mab Liab uas yog Yes Xus niam, lawv muab qhaib rau Yos Xes lawm. Thaum nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub.

Yos Xes uas yog Mab Liab tus txiv, yog ib tug neeg ncaj, nws tsis xav kom zeej tsoom hais lus xaiv txog Mab Liab, ces nws txiav siab nrauj Mab Liab twj ywm.

Thaum nws txiav siab nrauj li ntawd, Huab Tais tus Tshiab tawm los ua npau suav rau nws, thiab hais rau nws tias “Yos Xes, Das Vis leej tub, koj txhob ntshai coj Mab Liab, koj tus poj niam, los nyob hauv koj tsev. Yog Leej Ntuj Plig Ntshiab ua kom nws xeeb tub. Nws yuav yug ib tug tub, koj yuav tis nws npe hu ua Yes Xus vim nws yuav cawm nws haiv neeg ntawm lawv cov txhaum.”

Thaum Yos Xes tsim los, nws ua raws li Huab Tais tus Tshiab qhia rau nws.