NTAWV NTSHIAB HAUV HNUB TIM 19 LUB 5 HLIS 2021

NTAWV HAUJ LWM (HL20:28-38)
Paj Lug hais tias “Nej yuav ceev faj rau nej, thiab muab siab rau saib pab yaj uas Leej Ntuj Plig Ntshiab tsa nej ua cov tswj zov thiab coj Tswv Ntuj lub Koom Txoos mus noj zaub. Yog lub Koom Txoos uas Tswv Ntuj muab nws roj ntsha los txhiv. 
Kuv paub tias thaum kuv mus lawm, mas yuav muaj ib co hma tsiv tsaim txeem los nrog nej ua ib pab. Lawv yuav tsis txuag pab yaj siav. Tab yog nyob hauv nej pab neeg no, haj tseem yuav muaj ib co neeg sawv los hais tej zaj nkhaus kom cov thwj tim raws lawv. 
Ua li mas nej yuav ceev faj mog. Nej nco ntsoov tias kuv tau quaj ntuas nej nruab hnub hmo ntuj peb xyoos. 
Nyem no, kuv tso nej rau Tswv Ntuj thiab rau nws Lo Lus pub txiaj ntsim. Lo Lus ntawd muaj hwj huam txhim tau lub tuam tsev, thiab muaj hwj huam pub tau lub cuab tam rau cov ntshiab. 
Kuv tsis tau ntshaw leej twg cov nyiaj, cov kub, los cov tsoos tsho. Nej paub tias yog kuv ob txhais tes no ua rau kuv thiab kuv cov phooj ywg noj xwb. 
Kuv ua txhij ua txhua li ntawd kom tau qhia nej tias peb yuav tsum khwv thiaj yuav pab tau cov tsis muaj zog, thiab peb tseem yuav nco ntsoov Huab Tais Yes Xus cov lus tias: Thaum koj pub, koj muaj kev kaj siab ntau dua thaum koj tau txais.”
Paj Lug hais cov lus no tas, nws txhos caug nrog lawv teev Ntuj. Sawv daws quaj, sawv daws mus puag Paj Lug caj dab, thiab nwj Paj Lug. Lawv sawv daws tu siab tshaj rau lo lus uas Paj Lug hais tias lawv yuav tsis rov pom nws ntxiv lawm. Ces sawv daws xa Paj Lug mus txog ntua lub nkoj. 

ZAM NTAWV MOO ZOO (Z17:11b-19)
Yes Xus hais tias “Leej Txiv Ntshiab, koj zov lawv nyob hauv koj lub Npe uas koj muab rau kuv, kom xwv lawv ua ib leeg xws li wb ua ib leeg. Thaum kuv nrog lawv nyob, kuv zov lawv nyob hauv koj lub Npe uas koj muab rau kuv. Kuv txuag lawv, ces tsis muaj ib tug ploj li, tsuas muaj kev ploj tus tub, kom tshwm sim raws li Ntawv sau cia. 
Zaum no kuv rov los cuag koj, kuv hais tej no rau hauv lub qab ntuj neeg, kom xwv lawv tau kuv txoj kev kaj siab phwj yaws los nyob hauv lawv. 
Kuv muab koj lo lus pub rau lawv, lub qab ntuj neeg thiaj li ntxub lawv, vim lawv tsis yog qab ntuj neeg tug, ib yam li kuv tsis yog qab ntuj neeg tug. 
Kuv tsis thov kom koj rho lawv hauv lub qab ntuj neeg mus, kuv thov kom koj txuag lawv ntawm tus Phem. Lawv tsis yog lub qab ntuj neeg tug ib yam li kuv tsis yog lub qab ntuj neeg tug. Thov koj qee lawv mus nyob hauv txoj kev tseeb: Koj lo lus yog qhov tseeb. 
Kuv xa lawv mus nyob hauv lub qab ntuj neeg, ib yam li koj xa kuv los nyob hauv lub qab ntuj neeg. Kuv rov qee kuv, kom lawv ntshiab tuaj nyob hauv qhov tseeb.”