NTAWV NTSHIAB HAUV HNUB TIM 2 LUB 6 HLIS 2021

HNUB PLAUB, LIS PIAM 9 CAIJ NRUAB XYOOS (XYOO TAB)
NTAWV TOS NPIS (TN3:1-11a,16-17a)
Kuv poj niam hais li ntawd mas tu kuv siab tas nrho, kuv xyu tej suab thiab kuv kua muag poob. Kuv thiaj hais zaj teev Ntuj no tias "HUAB TAIS, koj siab ncaj, koj ua qhov twg yog qhov ncaj. Koj tej kev tsuas yog txiaj ntsim thiab qhov tseem ceeb xwb. Koj yog tus txiav txim rau lub ntiaj teb. 
Nyem no, koj ua rau kuv raws li koj nyiam. Thov koj thau kuv ntawm lub neej no mus. Kuv xav dim ntawm lub ntiaj teb no, kuv xav rov qab mus ua av xwb. Yog kuv tuag mas zoo dua kuv ciaj. Rau qhov kuv raug lawv lam tau lam cem kuv, tu kuv siab loj tas nrho ! 
HUAB TAIS, kuv tos koj tuaj cawm kuv ntawm txoj kev txom nyem no. Thov koj cia kuv mus nyob lub teb chaws kuv yuav so mus li. HUAB TAIS, thov koj tsis txhob fee koj lub ntsej muag rau kuv."
Tib hnub ntawd, Xas Las uas yog Las Nkus Es tus ntxhais nyob Es Npas Tas nyob Mes Dias teb kuj raug nws txiv ib tug ntxhais txib thuam nws thiab. Vim tias lawv twb muab nws pub tshoob rau xya tus txiv lawm, tab sis tus dab phem As Mos Des uas nws phem tshaj plaws hauv cov dab phem, muab nws cov txiv tua tuag tas tib si, tsis pub lawv tau nrog Xas Las ua neej li. Ces tus ntxhais txib hais tias "Yog koj tua koj cov txiv xwb mas ! Koj twb yuav txiv xya zaus lawm, koj txoj hmoov tsis zoo ib zaug li ! Tsis yog vim koj cov txiv tuag tas ces koj thiaj yuav muaj cai ua ntxhov rau peb ! Koj cia li mus raws koj cov txiv qab mas ! Kom xwv peb tsis txhob tau pom koj ib tug tub los ib tug ntxhais li !" 
Hnub ntawd, Xas Las tu siab, nws quaj ib hnub. Nws nce mus saum nws txiv lub paim, nws npaj tias nws yuav mus dai tuag nyob saud. Tab sis nws ho xav tau tias "Nyob tsam ib me ntsis luag tej yuav hiam kuv txiv ! Lawv yuav hais tias 'Koj muaj ib tug nyuag ntxhais rau koj hlub xwb, koj tseem tsis muaj hmoo, nws tseem dai tuag lawm thiab !'
 Kuv tsis xav ua kom kuv txiv tu siab li ntawd. Nws twb laus laus lawm. Ntshai kuv yuav tsis txhob dai tuag. Kuv yuav thov HUAB TAIS ua kom kuv tuag, kom kuv thiaj tsis hnov luag tej thuam kuv ntxiv." 
Tam sim ntawd, Xas Las tsa tes tig mus ntawm qhov rais, nws thov Ntuj tias "HUAB TAIS siab zoo, koj nto koob meej ! Xav kom koj lub npe nto moo mus ib txhiab ib txhis. Kuv twb muaj xya tus txiv tsis nyob lawm. Kuv tseem yuav nyob hauv ntiaj teb no ntxiv ua tus dab tsi ? Yog koj tsis xav kheev kom kuv tuag mas thov koj hlub kuv thiab. Kuv tsis xav hnov luag tej hais lus tub qaug kuv ntxiv lawm !" 
Hnub ntawd, Tos Npis thiab Xas Las nkawd ob zag thov ntuj nce mus txog pem Tswv Ntuj lub hwj chim. Tswv Ntuj thiaj xa Las Fais tuaj kho nkawd kom zoo. 

MAS KOS NTAWV MOO ZOO (MK12:18-27)
Ib co xas dus kais tuaj cuag Yes Xus. Lawv yog cov uas hais tias neeg tuag yuav tsis sawv rov los. Lawv nug Yes Xus tias "Xib Hwb, Mais Xes sau cia rau peb tias yog leej twg ib tug kwv tij tuag tseg poj niam cia, tsis tau muaj me nyuam, mas tus kwv yuav tsum qaws tus niam tij kom tsa tau tus kwv tij ntawd lub keeb sawv. 
Muaj xya leej kwv tij. Thawj tug yuav poj niam, nws tuag, tsis tau muaj tub ki. Tus ob qaws tus niam tij ntawd, nws kuj tuag tsis tau muaj tub ki; tus peb kuj tuag ib yam li ntawd. Xya leej kwv tij ntawd yeej tsis muaj tub ki li. Thaum lawv tuag tas lawm, tus poj niam kuj tuag thiab. 
Txog caij neeg lub cev sawv rov los, lawv kuj yuav sawv rov los, mas tus poj niam ntawd yuav yog leej twg tus ? Vim lawv xya tus kwv tij puav leej tau yuav nws ua lawv poj niam." 
Yes Xus hais rau lawv tias "Puas yog vim nej tsis paub Ntawv Ntshiab thiab tsis paub Tswv Ntuj lub hwj huam, nej thiaj yuam kev ? Vim tias, thaum neeg lub cev yuav sawv hauv cov tuag los, sawv daws yuav tsis yuav poj niam, tsis yuav txiv, sawv daws yuav zoo li cov Tshiab nyob saum ntuj. 
Hais txog cov tuag kev sawv rov los, nej puas tau nyeem Mais Xes phau Ntawv, zaj hais txog Tsob Pos, uas Tswv Ntuj hais rau Mais Xes tias kuv yog Has Nplas Has tus Tswv Ntuj, His Xas Has tus Tswv Ntuj, Yas Kos tus Tswv Ntuj. Tswv Ntuj tsis yog cov tuag tus Tswv Ntuj. Yog cov neeg ciaj tus Tswv Ntuj. Nej yuam kev lawm deb."