NTAWV NTSHIAB HAUV HNUB TIM 20 LUB 5 HLIS 2021

NTAWV HAUJ LWM (HL22:30, 23:6-11)
Hnub tom qab, tus xab txheeb xav paub tseeb tias cov Yus Das liam dab tsi rau Paj Lug, ces nws daws Paj Lug thiab nws kom cov leej choj thiab tas tsoom txwj laus tuaj sib sau. Nws coj Paj Lug mus rau lawv nug.
Paj Lug paub tias cov neeg nyob ntawd muaj ib tog yog tog Xas Dus Kais, hos ib tog yog tog Fas Lis Xais. Ces nws tsa suab hais tias "Kwv tij, kuv yog ib tug Fas Lis Xais. Kuv niam kuv txiv kuj yog Fas Lis Xais. Tos muaj neeg xav txiav txim rau kuv los, yog vim peb muaj txoj kev cia siab tias cov neeg tuag yuav ciaj rov qab los." 
Paj Lug tseem hais li no suab tsis tau tu, cov Fas Lis Xais thiab cov Xas Dus Kais twb pib sib ceg lawm, ces sawv daws faib kiag ua ob tog. Cov Xas Dus Kais hais tias tsis muaj kev sawv rov los, tsis muaj Ntuj cov Tshiab, thiab tsis muaj dab li. Hos cov Fas Lis Xais ntseeg tias neeg yuav sawv rov los, muaj Ntuj cov Tshiab, thiab muaj dab. 
Sawv daws thiaj sib cav ntsuag qees. Muaj ob peb tug kws ntawv, uas yog tog Fas Lis Xais sawv, lawv siv zog hais nrov tias "Peb tsis pom tus neeg ntawd ua ib qho txhaum dab tsi. Tsam ho yog ib leeg tim tswv ntshiab qhia nws, los ho yog Ntuj ib tug Tshiab qhia nws ne?" 
Lawv pheej sib cav heev zuj zus tuaj. Tus xab txheeb ntshai tsam lawv muab Paj Lug tua, nws thiaj kom pab tub rog nqes mus chua Paj Lug ntawm lawv tes, coj nws rov los nyob hauv lub yeej. 
Hmo ntawd, Huab Tais tuaj xyuas Paj Lug, Huab Tais hais rau nws tias "Koj ua siab loj mog. Koj tseem yuav ua tim khawv txog kuv nyob Los Mas ib yam nkaus li koj tau ua tim khawv nyob Yes Lus Xas Les."

ZAM NTAWV MOO ZOO (Z17:20-26)
Tais Yes Xus thov Leej Txiv Tswv Ntuj tias "Kuv tsis thov koj rau cov no xwb, kuv tseem thov koj rau cov uas yuav ntseeg txog kuv vim lawv lo lus, kom lawv sawv daws koom ua ib leeg. Ib yam li koj, Leej Txiv, koj nyob hauv kuv, kuv nyob hauv koj, kom lawv nyob hauv wb. Lub qab ntuj neeg thiaj ntseeg tias yog koj xa kuv tuaj. 
Lub koob meej uas koj muab rau kuv, mas kuv muab rau lawv lawm, kom xwv lawv ua ib leeg xws li wb ua ib leeg. 
Kuv nyob hauv lawv, koj nyob hauv kuv, lawv thiaj li ua tsheej ib leeg tiag, lub qab ntuj neeg thiaj paub tias yog koj xa kuv tuaj, thiab paub tias koj nyiam lawv ib yam li koj nyiam kuv. 
Txiv, cov uas koj muab rau kuv, kuv nyob qhov twg, mas kuv xav kom lawv tau nrog kuv nyob qhov ntawd thiab, kom lawv pom kuv lub koob meej uas koj muab rau kuv, vim koj tau nyiam kuv, txij thaum tsis tau tsim lub sim ceeb. 
Txiv siab ncaj, lub qab ntuj neeg tsis paub koj, tab sis kuv paub koj, thiab cov no kuj paub tias yog koj xa kuv tuaj. 
Kuv twb ua kom lawv paub koj lub npe lawm. Kuv tseem yuav ua kom lawv paub ntxiv, kom txoj kev nyiam uas koj muab los nyiam kuv, nyob hauv lawv, thiab kom kuv nyob hauv lawv."