NTAWV NTSHIAB HAUV HNUB TIM 21 LUB 4 HLIS 2021

NTAWV HAUJ LWM (HL8:1b-8) 
Thaum lawv muab pob zeb tsawb Tes Fas Nos tuag tas. Muaj ib co neeg hwm Ntuj tuaj muab Tes Fas Nos lub cev mus faus, thiab lawv quaj nyiav nws ntev ntev. Hos Xauv, mas nws iab hiam lub Koom Txoos. Nws mus ib lub tsev dhau ib lub tsev, nws cab cov poj niam thiab cov txiv neej huv si coj mus pov rau hauv tsev loj faj.
Cov neeg uas tawg ncaim mus rau txhua qhov chaw, mas lawv tshaj lub Moo Zoo rau sawv daws mloog. Yog vim li ntawd, mas Fis Lis Pos thiaj li mus rau nram ib lub nroog nyob Xas Mas Lias teb. Nws tshaj lus txog Yes Xus nyob ntawd. 
Tas tsoom sid koom siab koom ntsws npuab cov lus uas Fis Lis Pos hais, vim sawv daws hnov txog cov cim uas Fis Lis Pos ua thiab pom nws ua. 
Vim tias cov neeg raug dab phem coob leej rov zoo los; cov dab phem ntawd tawm hauv cov neeg mus, dab qw tej suab nrov nrov. Cov tuag ceg thiab cov ceg tawv coob leej kuj cia li zoo hlo. 
Nyob hauv lub nroog ntawd, mas sawv daws zoo siab tas nrho.

ZAM NTAWV MOO ZOO (Z6:35-40)
Yes Xus hais rau lawv tias “Kuv yog cov mov muaj txoj sia. Tus tuaj cuag kuv nws yuav tsis tshaib, tus ntseeg txog kuv nws yuav tsis nqhis ib zaug li. Kuv hais rau nej tias nej pom kuv, tab sis nej tsis ntseeg. Txhua yam uas kuv Txiv muab rau kuv yuav los cuag kuv. Hos tus tuaj cuag kuv, kuv yuav tsis ntiab nws rau nraum zoov. 
Vim kuv nqes saum ntuj los, tsis yog los ua ywj kuv siab, yog los ua raws li Tus Xa kuv tuaj lub siab. 
Tus Xa kuv tuaj lub siab xav, yog zoo li no: Kom kuv tsis txhob ua ib yam uas nws muab rau kuv ploj li, thiab hnub kawg, kom kuv tsa yam ntawd sawv rov los. 
Qhov uas kuv Txiv nyiam yog zoo li no: leej twg pom Leej Tub thiab ntseeg txog Leej Tub, mas nws muaj txoj sia nyob mus li, thiab Hnub Kawg, kuv yuav tsa nws sawv rov los.”