NTAWV NTSHIAB HAUV HNUB TIM 21 LUB 5 HLIS 2021

NTAWV HAUJ LWM (HL 25:13b-21)
Tus vaj As Nkis Pas thiab Npes Les Nis nkawd tuaj txog Xes Ntxas Les, nkawd mus xyuas Fes Tus. Vim tias nkawd yuav nyob ntev hnub, ces Fes Tus thiaj piav txog Paj Lug rau tus vaj. Nws hais tias "Nyob ntawm no, muaj ib tug neeg nyob txim uas Fes Lis cia nws kaw rau hauv tsev loj faj. Thaum kuv mus Yes Lus Xas Les, cov leej choj thiab cov txwj laus Yus Das tuaj liam nws rau kuv, lawv kom kuv muab txim rau nws.
Kuv teb lawv tias cov Los Mas tsis muaj kev cai yuav cia li muab tus neeg uas raug luag liam tso rau luag tes. Lawv yuav tsum xub hu cov neeg kom nws tuaj nrog tus raug liam ntawd tim ntsej tim muag hais tso, thiab yuav cia tus raug liam tau kev hais lus daws lub txim uas luag liam rau nws. 
Ua li mas cov Yus Das thiaj nrog kuv tuaj ntawm no, tsis ncua sij hawm li. Tag kis tom qab, kuv mus zaum hauv lub tsev txiav txim, kuv kom lawv coj tus neeg tom nkuaj los. 
Cov neeg tuaj liam txav los liam. Lawv liam tsis tau ib qho loj, raws qhov kuv xav. Lawv kawg nrog nws muaj lus sib cav, xyov, hais txog lawv txoj kev cai teev ntuj, thiab hais txog ib tug Yes Xus uas tuag lawm, tab sis Paj Lug hais tias nws tseem muaj txoj sia nyob. 
Kuv tsis pom qab ua dab tsi rau ib zag sib cav li ntawd, kuv thiaj nug Paj Lug saib nws puas yeem mus pem Yes Lus Xas Les, cia mam txiav txim txog tej ntawd rau nws nyob ped. Tiam sis Paj Lug tau thov kom cia tus Tuam Vaj txiav txim rau nws xwb. Kuv thiaj li cia Paj Lug nyob twj ywm ntawm no mus txog hnub kuv xa nws mus rau Xes Ntxas.”

ZAM NTAWV MOO ZOO (Z 21:15-19)
Thaum lawv noj tshais tas, Yes Xus hais rau Xis Moos Pob Zeb tias  "Xis Moos, Zam tus tub, koj puas nyiam kuv dua lawv cov ntawd?" 
Pob Zeb hais rau Yes Xus tias "Huab Tais, koj paub tias kuv nyiam koj tiag." 
Yes Xus hais rau Pob Zeb tias "Koj coj kuv cov me nyuam yaj mus noj zaub mog." 
Yes Xus rov hais zaum ob tias "Xis Moos, Zam tus tub, koj puas nyiam kuv?" 
Pob Zeb hais rau Yes Xus tias "Huab Tais, koj paub tias kuv nyiam koj tiag." 
Yes Xus hais rau nws tias "Koj zov kuv cov yaj mog." 
Yes Xus tseem rov hais dua zaum peb rau Pob Zeb tias "Xis Moos, Zam tus tub, koj puas nyiam kuv tiag?” 
Pob Zeb tu siab rau qhov Yes Xus hais rau nws zaum peb tias "Koj puas nyiam kuv tiag?" 
Pob Zeb hais rau Yes Xus tias "Huab Tais, koj paub tas ib puas tsav yam, koj paub tias kuv nyiam koj tiag." 
Yes Xus hais rau Pob Zeb tias "Koj coj kuv cov yaj mus noj zaub mog. Kuv hais qhov muaj tseeb tiag rau koj; thaum koj tseem hluas zog, koj muab koj txoj siv, koj sia koj, koj xav mus qhov twg los koj mus koj. Tiam sis thaum koj laus, koj yuav tsa tes cia ib tug muab siv rau koj sia, cia luag coj koj mus hauv qhov chaw uas koj tsis xav mus."
Yes Xus hais qhov ntawd qhia tias Pob Zeb yuav tuag zoo li cas kom Tswv Ntuj nto koob meej. Yes Xus hais li tas, nws hais rau Pob Zeb tias "Koj raws kuv mus."