NTAWV NTSHIAB HAUV HNUB TIM 24 LUB 4 HLIS 2021

NTAWV HAUJ LWM (HL9:31-42) 
Lub caij ntawd, cov Koom Txoos nyob hauv xeev Yus Das, Nkas Lis Lais, thiab Xas Mas Lias tau nyob thaj yeeb. Sawv daws txhim cov Koom Txoos, thiab sawv daws taug txoj kev hwm Huab Tais. Leej Ntuj Plig Ntshiab nplij cov Koom Txoos, ces lawv huam vam.
Pob Zeb ncig mus rau txhua qhov chaw xyuas sawv daws. Nws nqes mus txog nram cov ntshiab nyob lub zos Lis Das. Nyob nrad muaj ib tug neeg hu ua Es Nes pw saum ib daim khaub lev tau yim xyoo lawm. Nws tuag ceg. 
Pob Zeb hais rau nws tias "Es Nes, Yes Xus Pleev kho koj zoo. Koj sawv tsees los kho koj lub txaj.”
Tam sim ntawd tus tuag ceg sawv tsees. Tas cov neeg nyob hauv Lis Das thiab nyob hauv lub tiaj Xas Loos pom Es Nes, mas sawv daws tig los ntseeg txog Huab Tais.
Nyob Yos Pes, muaj ib tug thwj tim poj niam hu ua Tas Npis Thas. Nws lub npe txhais tias Me Nyuam Mos Lwj. Nws ua ntau yam hauj lwm zoo thiab nws pub ntau yam rau cov neeg txom nyem. 
Muaj ib hnub, Tas Npis Thas cia li mob, ces nws tuag. Lawv muab nws ntxuav tas, thiab lawv coj nws mus tso saum chav tsev siab. Lis Das kuj nyob ze Yos Pes. Cov thwj tim hnov tias Pob Zeb tuaj txog Lis Das, ces lawv tso ob tug neeg tuaj thov Pob Zeb tias “Thov koj tuaj nram peb, txhob ncua.”
Pob Zeb nrog ob tug neeg mus tam sim ntawd. Thaum nws tuaj txog ntua, lawv kom nws nce mus saum chav tsev siab. Cov poj ntsuam tuaj pom tuag, sawv daws los ntsauv vog Pob Zeb. Lawv quaj zom zaws. Lawv muab tej tsoos tsho uas Tas Npis Thas tau ua thaum nws tseem nrog lawv nyob rau Pob Zeb saib. 
Pob Zeb kom sawv daws tawm mus sab nraud. Nws txhos caug thov Ntuj, ces nws tig los hais rau tus tuag tias “Tas Npis Thas, koj sawv.”
Tus poj niam rua muag pom Pob Zeb, nws sawv tsees los zaum. Pob Zeb tuav nws txhais tes, rub nws sawv ntsug. Ces Pob Zeb hu cov Ntshiab thiab cov poj ntsuam los xyuas Tas Npis Thas rau qhov nws ciaj rov los lawm. Tas lub tsheej Yos Pes hnov lub moo ntawd, mas ntau leej ntseeg txog Huab Tais. Pob Zeb nyob Yos Pes ib ntus. Nws nyob hauv tus ntswj hlua hu ua Xis Moos tsev.

ZAM NTAWV MOO ZOO (Z6:60-69)
Yes Xus ib co thwj tim coob tau hnov cov lus ntawd, ces lawv hais tias “Cov lus no tawv dhau, leej twg yuav mloog tau?”
Tab sis Yes Xus yeej paub hauv nruab siab tias nws cov thwj tim yws txog cov lus ntawd, nws thiaj hais rau lawv tias “Tej lus ntawd dawm nej taw lod? 
Yog nej tseem pom Neeg Leej Tub nce mus saum qhov chaw uas thaud nws nyob, nej yuav ua li cas to taub? 
Yog tus ntsuj plig ua kom muaj txoj sia, lub cev nqaij ua tsis tau dab tsi. Cov lus uas kuv hais rau nej yog ntsuj plig thiab yog txoj sia. Tab sis nyob hauv nej, muaj ib co tsis ntseeg.” 
Vim txij lub hauv paus los, Yes Xus yeej paub tias cov tsis ntseeg yog leej twg, thiab tus yuav muab nws muag yog leej twg. Ces Yes Xus hais tias “Vim li no kuv thiaj hais rau nej tias tsis muaj leej twg tuaj cuag kuv tau, yog Leej Txiv tsis pub qhov ntawd rau nws.”
Txij thaum ntawd los, Yes Xus ib co thwj tim coob thiaj li rov qab mus tsev, lawv tsis nrog Yes Xus mus ntxiv lawm. Yes Xus thiaj hais rau Pab Kaum Ob tias “Nej ne, nej puas xav mus thiab?”
Xis Moos Pob Zeb teb rau Yes Xus tias “Huab Tais, peb yuav mus nrog leej twg? Koj muaj cov lus pub txoj sia nyob mus li. Peb ntseeg thiab peb paub tias koj yog Tswv Ntuj tus Ntshiab.”