NTAWV NTSHIAB HAUV HNUB TIM 27 LUB 4 HLIS 2021

NTAWV HAUJ LWM (HL11:19-26)
Thaum Tes Fas Nos raug luag muab tua tas, muaj ib co ntseeg raug luag hiam, ces lawv thiaj khiav. Lawv mus txog Fes Nis Xias teb, txog Kws Plos, thiab txog As Nthias Kias. Mas lawv tsis tshaj Ntuj Lo Lus rau leej twg li, lawv tsuas tshaj rau cov Yus Das xwb. 
Tsis kav, nyob hauv lawv, muaj tus puav yog cov neeg tuaj Kws Plos thiab Xis Les Nas tuaj txog As Nthias Kias, lawv tshaj Huab Tais Yes Xus lub Moo Zoo rau cov Hes Las.
Huab Tais txhais tes pab lawv. Ces cov neeg txais kev ntseeg thiab tig los cuag Huab Tais coob kawg.
Lub Koom Txoos nyob Yes Lus Xas Les hnov lub moo ntawd, lawv thiaj xa Npas Nas Npes mus nyob As Nthias Kias.
Thaum Npas Nas Npes tuaj txog, nws pom Tswv Ntuj lub txiaj ntsim, mas nws zoo siab hlo. Nws pab lawv ua siab loj siab tawv kom lawv nyob ruaj nreb hauv txoj kev ntseeg txog Huab Tais. 
Npas Nas Npes yog ib tug neeg zoo. Leej Ntuj Plig Ntshiab nyob puv hauv nws, thiab nws yog ib tug neeg ntseeg ruaj. Ib pab neeg coob kawg los ntseeg txog Huab Tais ntxiv.
Ces Npas Nas Npes mus nrhiav Xauv nyob Tas Xis. Thaum nws nrhiav tau Xauv lawm, mas nws coj Xauv los nyob As Nthias Kias. 
Nkawd nyob li ntawd ib xyoos hauv lub Koom Txoos, nkawd qhia ib pab neeg coob kawg. Yog nyob As Nthias Kias mas luag thiaj pib hu cov thwj tim ua cov pleev.

ZAM NTAWV MOO ZOO (Z10:22-30)
Kwv tij, thaum txog lub hnub nyoog nqaum paj nqaum nruas Ntxuav lub Tuam Tsev Teev Ntuj nyob Yes Lus Xas Les. Yog lub caij ntuj no. Yes Xus mus mus los los hauv lub Tuam Tsev Teev Ntuj nyob hauv lub qab ru tsev Xas Los Moos. Cov Yus Das los ntsauv ncig nws, ces lawv hais rau nws tias “Koj yuav cia peb lub siab ua xyem xyav txog thaum twg? Saib koj yog Leej Pleev no, koj tab meeg hais rau peb?”
Yes Xus teb rau lawv tias “Kuv twb hais qhia nej lawm, uas nej tsis ntseeg. Cov hauj lwm uas kuv hu txog kuv Txiv lub npe los ua, zeem tseeb txog kuv. Tab sis nej tsis ntseeg vim nej tsis yog kuv cov yaj. Kuv cov yaj mloog kuv lub suab, kuv paub lawv, lawv raws nraim kuv. Kuv pub txoj sia nyob mus li rau lawv, lawv yuav tsis tuag ib zaug li. Tsis muaj leej twg yuav chua tau lawv ntawm kuv txhais tes. Kuv Txiv yog tus loj tshaj txhua tsav txhua yam, nws muab cov yaj no rau kuv, mas yeej tsis muaj leej twg yuav chua tau dab tsi ntawm kuv Txiv txhais tes li. Leej Txiv thiab kuv, wb yog ib tug xwb.”