NTAWV NTSHIAB HAUV HNUB TIM 28 LUB 5 HLIS 2021

HNUB RAU, LIS PIAM 8 CAIJ NRUAB XYOOS (XYOO TAB)

NTAWV NPES XIS LAS (NXL44:1,9-13)

Peb yuav cav txog cov neeg nto moo loj, uas yog peb cov yawg koob.  Muaj ib txhia uas tsis muaj leej twg nco txog lawv. Lawv dua tas, xws li lawv tsis tau xeeb los ua neeg ib zaug. Lawv tej me nyuam los kuj ib yam, yog zoo li lawv tsis tau yug los ib zaug. Tab sis muaj ib co zoo, sawv daws tsis hnov qab lawv tej hauj lwm ncaj.

Lawv tej xeeb ntxwv yog zoo li ib lub cuab tam zoo nyob mus li. Lawv tsoom xeeb ntxwv, lawv tej tub ki coj nraim cov lus uas lawv cog. Lawv tsoom xeeb ntxwv yuav nyob mus li ib txhis, lawv lub koob meej yuav tsis ploj.

MAS KOS NTAWV MOO ZOO (MK11:11-25)

Yes Xus mus hauv Yes Lus Xas Les, nws chaws mus hauv lub Tuam Tsev Teev Ntuj, nws ntsia txhua yam nyob ncig nws. Thaum ntawd twb lig lawm, nws tawm mus. Nws nrog Pab Kaum Ob leeg mus Npes Tas Nias.

Hnub tom qab, thaum lawv tawm hauv Npes Tas Nias mus, Yes Xus tshaib plab. Nws tuaj deb pom ib tsob txiv ncuav pias muaj nplooj, nws mus xyuas saib puas muaj dab tsi noj. Tab sis thaum nws mus txog ze, tsob ncuav pias tsuas muaj nplooj xwb vim tsis yog lub caij txi txiv.

Yes Xus hais rau tsob txiv ncuav pias tias "Txij no mus, kom txhob muaj neeg noj koj tej txiv ib zaug ntxiv li!"

Cov thwj tim hnov Yes Xus hais li ntawd.

Lawv tuaj txog Yes Lus Xas Les. Yes Xus chaws mus hauv lub Tuam Tsev Teev Ntuj, nws ntiab cov tub luam tuaj muag thiab cov tuaj yuav toob xib hauv lub Tuam Tsev Teev Ntuj. Nws ntxeev cov tub pauv nyiaj tej rooj, thiab cov muag nquab tej tog zaum.

Nws tsis kheev leej twg nqa toob xib hla hauv lub Tuam Tsev.

Yes Xus qhia lawv, nws hais rau lawv tias "Ntawv tau sau tseg tias: Kuv lub tsev yuav hu ua tsev teev Ntuj, cia rau ib tsoom haiv neeg? Tab sis, nej muab kuv lub tsev ua tub sab lub qhov nkaum!"

Cov thawj leej choj thiab cov kws Ntawv Ntshiab hnov, ces lawv nrhiav saib yuav ua cas muab Yes Xus tua. Tab sis lawv kuj ntshai Yes Xus thiab, vim tas tsoom pej xeem zoo siab rau Yes Xus cov lus qhia. Thaum tsaus ntuj, Yes Xus tawm hauv nroog mus sab nraud.

Tag kis sawv ntxov, Yes Xus lawv hla mus, lawv pom tsob txiv ncuav pias qhuav ti nkaus cag. Pob Zeb nco dheev txog, nws hais rau Yes Xus tias "Xib Hwb, koj saib tsob txiv ncuav pias uas koj tsawm qhuav tas lawm."

Yes Xus teb rau lawv tias "Nej ntseeg Tswv Ntuj mog. Kuv hais tseeb rau nej, yog leej twg hais rau lub roob no tias: Koj txav, koj dhia lawm hauv dej ntuj, yog tias tus ntawd tsis ua xyem xyav hauv siab li, thiab nws ntseeg tias qhov nws hais yuav tshwm sim tiag, mas qhov ntawd yuav tsheej xeeb rau nws tau. Vim li ntawd, kuv thiaj hais rau nej tias tas puas tsav yam uas thaum nej teev Ntuj, nej thov, nej cia li ntseeg tias nej twb tau txais lawm, ces Ntuj yuav pub yam ntawd rau nej. Hos thaum nej tab tom sawv ntsug teev Ntuj, yog nej muaj ib lo lus tsis txaus siab rau ib tug, mas nej zam rau nws, kom xwv nej Txiv nyob saum ntuj zam txhaum rau nej thiab.”