NTAWV NTSHIAB HAUV HNUB TIM 29 LUB 7 HLIS 2021

HNUB TSIB, LIS PIAM 17 CAIJ NRUAB XYOOS B
NCO TXOG LEEJ NTSHIAB MAS TAS
KEV TSIV (KT 40: 16-21, 34-38)

Mais Xes ua tas ib puas tsav yam ntawd raws nraim li HUAB TAIS kom ua.

Xyoo ob, lub ib hlis xiab ib, lawv tsa lub Tsev. Mais Xes tsa lub Tsev, nws ntsia cov taw ntsa, nws tsa lub cuam khoov, nws ntsia cov nqaj thiab tsa cov ncej.

Ces nws tsa ib lub tsev tsam phooj vov lub Tsev. Mais Xes muab daim ntaub tsev tsam phooj vov sab saud raws li HUAB TAIS tau hais rau Mais Xes.

Mais Xes muab ob daig txiag zeb Ua Tim Khawv kaw rau hauv lub Xab. Nws muab cov nqaj tso saum lub Xab, thiab muab lub rooj zaum txawb rau saum lub Xab.

Nws nqa lub Xab mus tso rau hauv lub Tsev. Ces nws muab ib daim ntaub thaiv, nws muab ntaub thaiv lub Xab Cog Lus raws li HUAB TAIS tau hais rau Mais Xes.

Twv huab los ntsauv lub Tsev Tsam Phooj Sib Ntsib, ces HUAB TAIS lub hwj chim ci puv nkaus lub Tsev.

Mais Xes nkag tsis tau mus rau hauv lub Tsev Tsam Phooj Sib Ntsib, vim twv huab tseem ntsauv tsis txav chaw thiab HUAB TAIS lub hwj chim ci ntsa iab puv lub Tsev.

Thaum tsoom tub ki His Xas Lais mus txog ntu kev twg, yog twv huab nce mus nyob siab saum lub Tsev lawm, mas lawv sawv kev mus ntxiv.

Yog twv huab tsis nce siab, mas lawv so nyob ntawd txog hnub uas twv huab nce siab rau saud.

Vim nruab hnub mas HUAB TAIS twv huab nyob saum lub Tsev, hos hmo ntuj mas muaj ib tug ncej hluav taws cig cig hauv twv huab rau tas tsoom His Xas Lais pom kev. Lawv mus txog twg mas HUAB TAIS nrog nraim lawv zoo li ntawd.

ZAM NTAWV MOO ZOO (Z 11: 19-27)

Cov Yus Das coob leej tuaj xyuas Mas Tas thiab Mab Liab nkawd, lawv tuaj nplij nkawd vim nkawd tus nus tuag lawm.

Thaum Mas Tas hnov tias Yes Xus tuaj, ces Mas Tas mus tos Yes Xus, hos Mab Liab zaum nyob hauv tsev.

Mas Tas hais rau Yes Xus tias “Huab Tais, yog koj ntxov tuaj txog ntawm no, mas kuv tus nus yuav tsis tuag. Tsis kav, kuv paub tias nyem no, koj thov yam twg ntawm Tswv Ntuj, mas Tswv Ntuj yuav muab rau koj.”

Yes Xus hais rau Mas Tas tias “Koj tus nus yuav sawv rov los.”

Mas Tas hais rau Yes Xus tias “Kuv paub tias thaum txog Hnub Kawg, lub caij leej tib neeg lub cev ciaj rov los, mas nws yuav sawv rov los.”

Yes Xus hais rau Mas Tas tias “Kuv yog Txoj Kev Sawv Rov Los thiab yog Txoj Sia: tus ntseeg txog kuv, tab yog nws tuag lawm, nws yuav muaj txoj sia nyob.

Leej twg ua neej nyob ntseeg txog kuv, nws yuav tsis tuag ib zaug. Koj puas ntseeg qhov ntawd ?”

Mas Tas hais rau Yes Xus tias “Huab Tais, kuv ntseeg. Kuv ib txwm ntseeg hais tias koj yog Leej Pleev, yog Tswv Ntuj Leej Tub tuaj nyob hauv lub qab ntuj no.”