NTAWV NTSHIAB HAUV HNUB TIM 3 LUB 7 HLIS 2021

NCO TXOG LEEJ NTSHIAB TOS MAS, YES XUS THWJ TIM

HNUB XYA, LIS PIAM 13 CAIJ NRUAB XYOOS (XYOO TAB)

TSAB NTAWV PAJ LUG SAU TUAJ RAU COV NTSEEG HAUV ES FES XOS (EFX2:19-22)

Li ntawd, nej tsis yog ib co pej kum neeg, los ib co qhua ntxiv: nej nyob hauv cov ntshiab lub tsheej, nej yog Tswv Ntuj tsev neeg.

Nej yog ib lub tuam tsev, cov Hauv Paus Xa Lus thiab cov Yaj Saub yog taw ntsa, Yes Xus Pleev yog lub pob zeb txheem tas lub tsev.

Nyob hauv Leej Pleev, lub tuam tsev sib dhos thiab hlob ua ib lub Tuam Tsev teev Ntuj Ntshiab, rau Huab Tais.

Nyob hauv Leej Pleev, nej kuj txuas rau lub Tuam Tsev uas hloov ua Tswv Ntuj lub tsev nyob hauv Leej Ntuj Plig.

ZAM NTAWV MOO ZOO (Z20:24-29)

Tos Mas yog ib tug hauv pab Kaum Ob, nws tseem hu ua Dis Dws Mos thiab. Thaum Yes Xus tawm los, mas nws tsis nrog cov thwj tim nyob.

Lwm cov thwj tim hais rau nws tias "Peb pom Huab Tais lawm!"

Ces Tos Mas hais rau lawv tias "Yog kuv tsis pom lub qhov txhab ntsia hlau nyob hauv nws ob txhais tes, yog kuv tsis muab kuv tus ntiv tes ntxig lub qhov ntsia hlau, thiab yog kuv tsis muab kuv txhais tes rau ntawm nws phab tav, mas kuv tsis ntseeg."

Yim hnub tom qab, cov thwj tim rov nyob hauv tsev dua. Tos Mas kuj nrog lawv nyob thiab. Cov qhov rooj puav leej kaw tas. Yes Xus tawm los sawv hauv nruab nrab, nws hais rau lawv tias "Nej nyob kaj lug!"

Ces Yes Xus hais rau Tos Mas tias "Cev koj ntiv tes rau ntawm no, koj ntsia kuv ob txhais tes. Cev koj txhais tes los, muab rau hauv kuv phab tav. Koj txhob ua neeg tsis ntseeg ntxiv, koj ntseeg mog."

Tos Mas teb rau Yes Xus tias "Kuv tus Huab Tais, Kuv tus Tswv Ntuj."

Yes Xus hais rau Tos Mas tias "Vim koj pom kuv, mas koj thiaj ntseeg. Cov uas tsis tau pom tab sis lawv ntseeg, mas lawv txoj hmoov zoo."