NTAWV NTSHIAB HAUV HNUB TIM 31 LUB 5 HLIS 2021

NTAWV XOS FOS NIAS (XFN3:14-17)
Leej me ntxhais Xis Yoos, koj seev suab luag lom zem mas ! Tsoom His Xas Lais, nej cav lus zoo mog ! Me ntxhais Yes Lus Xas Les, koj dhia hom khaj mas ! 
HUAB TAIS yuav thim nws cov lus txiav txim rov qab. Koj yuav tsis pom koj cov yeeb ncuab ntxiv. Huab Tais ua vaj nyob nruab nrab hauv koj, His Xas Lais. Koj yuav tsis ntsib kev raug xwv txheej ntxiv. 
Hnub ntawd, cov neeg nyob Yes Lus Xas Les hais tias “Xis Yoos, koj txhob ntaus siab me ! Koj ob txhais tes tsis txhob tshee ! 
Koj tus HUAB TAIS Tswv Ntuj nyob nruab nrab hauv koj ! Nws yog tus cawm koj. Nws zoo siab tas nrho vim koj. Nws hlub koj, nws ua kom koj rov tshiab tuaj. Nws dhia hom khaj, kuj yog vim koj.”

LUS KAS NTAWV MOO ZOO (LK1:39-56)
Tau ob peb hnub, ces Mab Liab sawv kev mus, nws rau siab ntso mus pem toj siab, rau ib lub nroog nyob xeev Yus Das. Nws chaws mus hauv Ntxas Kas Lias tsev, nws foom lus nyob kaj lug rau Es Lis Xas Npes. 
Thaum Es Lis Xas Npes hnov Mab Liab foom kev kaj lug, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv Es Lis Xas Npes. Ces Es Lis Xas Npes tsa suab hlo hais nrov nrov tias "Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov. Ua cas Ntuj thiaj pub kom kuv tus Huab Tais leej niam tuaj xyuas kuv? 
Koj saib, thaum kuv hnov dheev koj lub suab foom kev kaj lug nrov txog kuv pob ntseg, tus me nyuam hauv kuv plab dhia zoo siab. Tus tau ntseeg tias cov lus Huab Tais hais rau nws yuav tsheej xeeb, mas nws txoj hmoov zoo!" 
Ces Mab Liab hais tias "Kuv tus plig cav txog Huab Tais lub hwj chim, kuv lub tswv yim hom khaj nyob hauv Tswv Ntuj, tus Cawm kuv, vim nws dauv muag ntsia nws tus ntxhais txib hauv txheej qis. Vim li ntawd, txij no mus, txhua tiam neeg yuav hais tias kuv txoj hmoov zoo, vim tus Muaj Hwj Huam ua tej yam loj rau kuv, nws lub npe Ntshiab. Nws lub siab hlub roos cov neeg hwm nws tiam dhau tiam. Nws sab npab nthuav nws lub zog rau sawv daws pom. Cov neeg uas lub siab muab hlob, Huab Tais ua kom lawv tawg. 
Huab Tais nchuav cov muaj hwj huam poob ntawm lawv lub theej kiab. Nws tsa cov neeg hauv txheej qis kom siab. Nws pub tej yam zoo rau cov neeg tshaib noj seem noj so, hos nws ntiab cov neeg muaj rov qab mus tes qhuav. 
Huab Tais pab nws tus tub txib His Xas Lais, vim nws nco ntsoov tias nws lub siab hlub neeg, nws ua raws li nws tau tshaj rau peb cov yawg koob, nws ua zoo tas nrho rau Has Nplas Has thiab Has Nplas Has cov xeeb ntxwv mus ib txhiab ib txhis." 
Mab Liab nrog Es Lis Xas Npes nyob peb lub hlis tej, ces nws rov mus tsev. (LK1:39-56)
Cov niam cov txiv, peb tsoom ntseeg txog Yes Xus mas peb ntseeg tias niam Mab Liab mus xyuas As Lis Xas Npes zaum no kuj yog nws coj Tswv Ntuj lub txiaj ntsim mus rau Es Lis Xas Npes thiab nws tus tub xeeb nyob hauv nws plab.
Tus me nyuam nyob hauv Es Lis Xas Npes plab yog Zam Ntxuav Plig. Thaum tus me nyuam hnov niam Mab Lia blub suab foom lus kaj lug mas nws dhia zoo siab vim tus me nyuam paub tias tus cawm seej tau nqes los lawm. Li ntawd, nyob hauv hnub no mas peb cov ntseeg thiaj yuav muaj kev xyiv fab kaj siab lug ib yam li tus me nyuam Zam Ntxuav Plig hauv Es Lis Xas Npes lub cev.
Tsis tas li ntawd, niam Mab Liab mus xyuas Es Lis Xas Npes zaum no kuj tau qhia peb txog kev tsob hwb lwm tus. Mab Liab nws tau txiaj ntsim ntawm Tswv Ntuj, nws yog Tswv Ntuj leej niam, tsis kav nws txaus siab mus tu nws tus phauj Es Lis Xas Npes uas muaj me nyuam thaum hnub nyoog ntau lawm.