NTAWV NTSHIAB HAUV HNUB TIM 7 LUB 5 HLIS 2021

NTAWV HAUJ LWM (HL15:22-31)
Cov Hauv Paus Xa Lus thiab cov txwj laus nrog lub Koom Txoos hais sib haum. Lawv txiav tias yuav xaiv lawv ob peb leeg thiab xa lawv nrog Paj Lug thiab Npas Nas Npes nkawd mus As Nthias Kias. Lawv xaiv Yus Das uas hu ua Npas Xas Npas thiab Xis Las nkawd. Nkawd yog ob tug nto moo zoo nyob hauv cov kwv tij. 
Cov Hauv Paus Xa Lus muab tsab ntawv no rau lawv nqa mus “Cov Hauv Paus Xa Lus thiab cov txwj laus, uas yog nej cov kwv tij, xa lus foom kev kaj lug tuaj rau cov kwv tij uas yog pej kum neeg txais kev ntseeg, nyob As Nthias Kias, nyob Xis Lias teb, thiab nyob Xis Lis Xias teb. 
Peb tau hnov tias muaj ib co neeg tuaj ntawm peb teb chaws tuaj. Lawv tuaj hais ib co lus ua kom nej ntxhov siab thiab ua kom nej lub tswv yim tws kev. Tab sis, tsis yog peb xa lawv tuaj. 
Peb thiaj ua ke txiav tias cia peb xaiv ob tug sawv peb chaw nrog ob tug kwv tij Npas Nas Npes thiab Paj Lug nkawd, tuaj cuag nej. Paj Lug thiab Npas Nas Npes nkawd yog ob tug neeg zoo siab siv nkawd txoj sia los tsob hwb peb tus Huab Tais Yes Xus Pleev lub Npe. 
Ua li mas peb tso Yus Das thiab Xis Las nkawd tuaj, kom nkawd hais cov lus uas peb xa tuaj rau nej. Leej Ntuj Plig Ntshiab thiab peb, tau txiav tias yuav tsis yuam tej lub nra ceeb laj ris rau nej. Nej tsuas yuav coj ob peb yam no xwb: Nej yuav caiv cov nqaij txi dab, caiv ntshav, caiv cov nqaij pos tuag, caiv kev ua dev ua npua. Tej no mas nej yuav caiv, thiaj li zoo. Nej nyob kaj lug.”
Thaum lawv sib xa kev sib ncaim tas, mas lawv nqes mus rau As Nthias Kias. Lawv hu sawv daws tuaj, ces lawv muab tsab ntawv rau lub txoos. Lawv nyeem tsab ntawv, lawv zoo siab tias cov lus nyob hauv txhawb lawv ntau.

ZAM NTAWV MOO ZOO (Z15:12-17)
Yes Xus hais tias ”Kuv lo lus qhia yog lo lus no: nej sis nyiam sis hlub zoo li kuv tau nyiam tau hlub nej. Tsis muaj leej twg muaj txoj kev nyiam loj dua tus uas siv nws txoj sia rau nws cov phooj ywg. 
Yog nej ua qhov kuv qhia nej, mas nej yog kuv cov phooj ywg. Kuv tsis hu nej ua kuv cov tub txib, vim tus tub txib tsis paub qhov uas tus tswv ua. Tab sis kuv hu nej ua phooj ywg, vim tas ib puas tsav yam kuv hnov ntawm kuv Txiv, mas kuv qhia nej paub tas huv si. 
Tsis yog nej xaiv kuv, yog kuv xaiv nej. Thiab yog kuv xa nej mus kom nej txi txiv, kom nej cov txiv nyob ruaj, kom xwv nej tuav txog kuv lub npe thov yam twg ntawm Leej Txiv, mas nws muab rau nej. Lo lus qhia uas kuv muab rau nej yog kom nej sis nyiam sis hlub.”