NTAWV NTSHIAB HAUV HNUB TIM 8 LUB 5 HLIS 2021

HAUJ LWM (HL16:1-10)
Paj Lug thiaj mus txog Des Npes thiab Lis Ros. Nyob ntawd muaj ib tug thwj tim hu ua Tis Mos Tes. Nws niam yog ib tug poj niam Yus Das txais kev ntseeg. Nws txiv yog ib tug Hes Las. Cov kwv tij nyob Lis Ros thiab nyob Is Kos Nias, sawv daws zeem tseeb tias Tis Mos Tes yog neeg zoo. 
Paj Lug xav kom Tis Mos Tes nrog nws mus. Ces Paj Lug coj Tis Mos Tes mus, nws ua lub cim txiav rau Tis Mos Tes, vim muaj ib co Yus Das coob nyob tsis deb tsis ze, thiab sawv daws paub tias nws txiv yog ib tug Hes Las. Lawv hla lub nroog twg, mas lawv ceeb toom cov txhooj uas cov Hauv Paus Xa Lus thiab cov txwj laus nyob Yes Lus Xas Les tau tsa rau cov Ntseeg. Ua li mas cov Koom Txoos khov zuj zus nyob hauv txoj kev ntseeg, thiab niaj hnub huam vam coob ntxiv tuaj.
Paj Lug lawv hla lub teb chaws Fis Zias thiab xeev ntuj Nkas Las Tias, vim Leej Ntuj Plig tsis kheev lawv tshaj ntuj Lo Lus nyob As Xias teb. Thaum lawv tuaj txog ntawm Mis Xias ciam teb, lawv yuav mus rau Npis Tis Nias teb, tab sis Yes Xus Leej Tswv Yim tsis kheev. Ces lawv hla Mis Xias teb nqes mus rau nram lub tsheej Thuas.
Muaj ib hmos, Paj Lug yees pom ib tug Mas Xes Dos Nias sawv ntsug puag sab tim ub, nws thov Paj Lug tias “Koj hla tuaj rau Mas Xes Dos Nias teb, tuaj pab peb!”
Paj Lug pom li ntawd tas nrho, ces peb nrhiav kev mus Mas Xes Dos Nias teb Tam sim ntawd. Peb paub tseeb tias Tswv Ntuj hu peb mus tshaj Ntuj lus rau lub teb chaws ntawd.
ZAM NTAWV MOO ZOO (Z15:18-21)
Yes Xus hais tias “Yog lub qab ntuj neeg ntxub nej, mas nej yuav paub tias lawv twb ntxub kuv ua ntej. Yog nej yog lub qab ntuj neeg tug, mas qab ntuj neeg yuav nyiam yam uas yog nws tug. Tab sis lub qab ntuj neeg ntxub nej, vim nej tsis yog qab ntuj neeg tug, rau qhov kuv xaiv nej thiab thau nej hauv lub qab ntuj neeg los. 
Nej nco ntsoov txog lo lus uas kuv hais rau nej tias tus tub txib tsis loj dua nws tus tswv. Yog lawv hiam kuv, mas lawv kuj yuav hiam nej. Yog lawv khaws kuv lo lus, mas lawv kuj yuav khaws nej lo lus thiab. Tiam sis lawv yuav ua tas puas tsav yam no rau nej vim kuv lub npe, rau qhov lawv tsis paub Tus xa kuv tuaj.”