NTHUAV NTAWV MOO ZOO HNUB TIM 1/12/2019

Lis piam 1 hauv lub caij Tos Huab Tais

Zaj nyeem hauv Mas Tais ntawv Moo Zoo (MT 24 : 37-44) : Yuav zov hmo tos. 

37 “Lub caij Neeg Leej Tub yuav rov los nyob, yuav zoo li thaum Nos Hes ua neej nyob. 38 Thaum dej tsis tau nyab ntiaj teb, sawv daws noj, sawv daws haus, sawv daws yuav poj niam thiab muab tej ntxhais pub tshoob mus txog hnub Nos Hes nkag mus hauv lub nkoj. 39 Zeej tsoom tsis nco faj txog dab tsi mus txog thaum dej tuaj nyab kiag, thiab tshoob sawv daws tas huv tib si. Thaum Neeg Leej Tub yuav rov los nyob, kuj yuav zoo li ntawd thiab. 40 Ces ob tug neeg uas nyob tom liaj, luag yuav coj ib tug mus, tseg lwm tus. 41 Ob tug poj niam uas tab tom zom zeb, luag yuav coj ib tug mus, tseg lwm tus. 42 “Nej zov hmo mog, vim nej tsis paub hnub twg nej tus Huab Tais yuav los. 43 Nej yuav to taub tias : yog tus tswv tsev paub tias hmo ntuj, lub sij hawm twg tub sab yuav tuaj, mas nws yuav zov hmo, tsis cia tub sab tho qhov tsev. 44 Nej kuj yuav ua li ntawd, nej yuav sawb sim kom txhij, vim Neeg Leej Tub yuav los lub sij hawm uas nej tsis nco faj.

Kwv tij sawv daws, hnub no yog thawj hnub hauv lub caij Tos Huab Tais, Leej Ntshiab Mas Tais hais qhia peb tias ; “Nej zov hmo mog vim nej tsis paub hnub twg nej tus Huab Tais yuav rov los.”
Lo lus no yog ib lo lus tseem ceeb, vim peb ua neej nyob, peb tsuas paub hnub nyob xwb, peb tsis paub hnub tuag, thiab peb kuj tsis paub tias Huab Tais Yes Xus yuav rov los raws li Ntawv Moo Zoo sau tseg yog thaum twg ? Li ntawd, yog tias, peb xyuam xim thiab peb ceev faj nyob rau hauv peb kev ua neej mas ntshe zoo dua, kom peb paub tias, tam sim no peb ua dab tsi thiab peb yuav mus lawm qhov twg. Tus Yaj Saub His Xais tau hais tias ; “Nej nce mus lawm saum roob thiab mus hauv lub Tuam Tsev Teev Ntuj, nej mus kawm nej thiab paub txog Tswv Ntuj txoj kev, nej thiab paub tias, nej yuav coj lub neej li cas nej thiab mus txog hauv Tswv Ntuj lub Ceeb Tsheej.
Tus Hauv Paus Xa Lus Paj Lug kuj hais tias : “lub sij hawm los txog lawm, nej sawv, nej txhob tsaug zog, nej tso tas ib puas tsav yam hauv txoj kev tsaug ntuj, nej ntsia Huab Tais Yes Xus lub neej, nej coj los ua tus qauv zoo rau nej taug hauv nej lub neej. Huab Tais yuav hloov nej, kom nej tau ib lub neej tshiab, ces nej los ua Yes Xus ib tug thwj tim, thiab tshaj nws lub Moo Zoo rau ntiaj teb neeg. Ces nej yuav nrhiav tau txoj kev dim.

Tus sau : XH. Xyooj Tuam Lis, Zoo Tswv Zov Yaj