NTHUAV NTAWV MOO ZOO HNUB TIM 14/11/2019

LK 17 : 20-25

Tswv Ntuj lub Ceeb Tsheej los txog lawm. Neeg Leej Tub lub zim txwv.

20 Cov Fas Lis Xais nug Yes Xus saib thaum twg Tswv Ntuj lub Ceeb Tsheej thiaj li los txog. Yes Xus teb rau lawv tias : "Tswv Ntuj lub Ceeb Tsheej yog ib yam uas neeg qhov muag tsom tsis tau. 21 Yus yuav hais tsis tau tias 'Ntuj lub Ceeb Tsheej nyob ntawm no', Los nyob tod', vim tias Tswv Ntuj lub Ceeb Tsheej nyob nruab nrab hauv nej."

22 Yes Xus hais rau cov thwj tim tias : "Yuav muaj tej lub sij hawm uas nej ntshaw pom Neeg Leej Tub nrog nej nyob ib hnub, tab sis nej yuav tsis pom. 23 Ces luag yuav hais rau nej tias : 'Neeg Leej Tub nyob tod', los 'Nws nyob ntawm no'. Mas nej tsis txhob mus, tsis txhob tso sas ntws khiav mus rau tod. 24 Vim tias Neeg Leej Tub lub zim txwv yuav zoo xws li ib kab xob laim ci dawb paug ib ceg kaum ntuj mus rau lwm ces. 25 Tab sis nws yuav tsum xub raug luag tsim txom loj kawg thiab raug tiam neeg no muab xyeeb pov tseg tso. 

Nyob rau hauv zaj no, cov Fas Lis Xais los nug Huab Tais Yes Xus tias ; Tswv Ntuj lub Ceeb Tsheej yuav los txog thaum twg ?

Huab Tais Yes Xus thiaj teb tias ; Tswv Ntuj lub Ceeb Tsheej tsis yog nqes los zoo li neeg qhov muag ntsia pom, yuav tsis muaj tus hais tias, Tswv Ntuj lub Ceeb Tsheej nyob qhov no, los yog nyob qhov tid, los yog nyob qhov saud, vim Tswv Ntuj lub Ceeb Tsheej twb nyob rau hauv peb sawv daws lawm.

Yog tias peb hais zaj Peb Txiv Nyob Saum Ntuj, mas kuj muaj ib nqe lus peb thov kom Tswv Ntuj lub Ceeb Tsheej los txog peb sawv daws uas tseem nyob ntiaj teb no thiab.

Yog li ntawd, txhais hais tias, peb yuav tau saj, los yog peb yuav nphav Tswv Ntuj lub Ceeb Tsheej ua ntej thaum peb tseem nyob ntiaj teb no lawm, vim Tswv Ntuj lub Ceeb Tsheej yog txoj kev nyob kaj lug kaj nrig. Thaum peb muaj txoj kev ntseeg ruaj txog Tswv Ntuj, peb tso siab rau nws thiab ces ob peb leeg sib koom siab los teev Ntuj los yog peb thov Ntuj ua ke, uas rau peb lub siab kaj lug, qhov ntawd, ces yog Tswv Ntuj lub Ceeb Tsheej tab tom nqes los nyob hauv peb ntag, lub sij hawm ntawd peb yuav paub Tias Tswv Ntuj lub Ceeb Tsheej zoo li cas.

Txawm li cas los xij, peb tau thov Ntuj kom txhua tsav txhua yam mus raws li Leej Txiv lub siab nyiam.

Huab Tais kav saum Ntuj thiab kav ntiaj teb neeg sawv daws lub siab, tus Huab Tais uas muaj hwj huam loj dua ntais, nws pub txiaj ntsim rau ntiaj teb neeg sawv daws, thiab pub kom cov ntseeg txog nws tau nyob kaj lug. Yog peb ntseeg txog Tswv Ntuj, mas peb yuav pom tau hais tias, Tswv Ntuj nrog peb nyob nraim hauv peb lub neej txhua txhia hnub.