NTHUAV NTAWV MOO ZOO HNUB TIM 19/11/2019

LK 19 : 1-10

Ntxas Kais.

1 Yes Xus mus hauv Yes Lis Kos, nws hla lub tsheej. 2 Muaj ib tug neeg lub npe hu ua Ntxas Kais, nws yog ib tug nom hauv cov sau se, nws nplua nuj. 3 Nws nrhiav kom tau kev pom saib Yes Xus yog leej twg, tab sis nws tsis tau kev, vim neeg coob dhau, thiab nws yog neeg qig taub. 4 Ces nws khiav mus ua ntej, nws nce saum tsob txiv cev kom tau pom Yes Xus, vim Yes Xus yuav hla ntawd mus. 5 Thaum Yes Xus los txog ntawm qhov chaw ntawd, nws tsa muag ntsia, nws hais tias : "Ntxas Kais, koj nqes los sai, vim hnub no kuv yuav tsum mus hauv koj tsev." 6 Ntxas Kais nqes nrawm nroos los, nws zoo siab txais Yes Xus. 7 Sawv daws pom li ntawd, lawv yws yws hais tias : "Nws mus so hauv ib tug neeg txhaum lub tsev !" 8 Hos Ntxas Kais sawv ntsug, nws hais rau Huab Tais tias : "Huab Tais, saib, kuv yuav muab kuv tej cuab yeej cuab tam ib nrab pub rau cov pluag. Yog kuv tau ua tsis ncaj rau leej twg, mas kuv yuav muab plaub npaug pauj rau nws." 9 Yes Xus hais rau Ntxas Kais tias : "Hnub no, txoj kev cawm los txog hauv lub tsev no, vim tus no kuj yog Has Nplas Has ib leeg tub thiab. 10 Vim tias Neeg Leej Tub tuaj nrhiav thiab tuaj cawm yam uas ploj lawm."

Nyob rau hauv zaj no, yog ib zaj piav txog Ntxas Kais. Ntxas Kais yog ib tug neeg qig taub, thiab yog ib tug thawj hauv cov sau se. Nyob rau hauv Huab Tais Yes Xus tiam neeg, cov sau se yog cov nom Los Mas cov qhe sau se, lawv sau tsoom pej xeem nyiaj tuaj mus rau tus vaj Xes Ntxas. Lub caij ntawd, cov His Xas Lais lub teb chaws raug cov Los Mas caij tsuj. Vim lub caij ntawd cov His Xas Lais lawv tsis muaj vaj lawm, lawv tsuas hwm Huab Tais Tswv Ntuj tib leeg ua lawv tus Vaj xwb. Li ntawd, tus neeg twg koom tes nrog cov Los Mas, lawv hais tias, yog cov neeg ntxeev siab rau Tswv Ntuj, mas nws yog ib tug muaj txhaum thiab tsis ntshiab huv. Cov sau se yog neeg His Xas Lais uas cov nom Los Mas tsa lawv ua nom thiab rov mus khaws tsoom pej xeem His Xas Lais li se tuaj mus tus vaj Xes Ntxas uas nyob rau lub caij ntawd nws yog tus vaj Los Mas. Li ntawd, tsoom pej xeem His Xas Lais thiaj ntxub cov sau se kawg thiab lawv txiav tias, cov sau se raug txiav tawm hauv Has Nplas Has cov xeeb ntxwv, li ntawd, lawv tsis muaj feem hauv Tswv Ntuj lub Ceeb Tsheej lawm. 

Hnub no ntawv Moo Zoo hais txog Ntxas Kais, uas yog ib tug nom sau se, uas raug tsoom pej xeem ntxub ntxaug. Nws yog ib tug neeg muaj nyiaj, tab sis, hnub no, nws hnov tias Huab Tais Yes Xus tuaj txog hauv lub nroog Yes Lis Kos, ces Ntxas Kais xav pom Huab Tais Yes Xus heev, tab sis nws yog ib tug neeg qig taub, nws paub zoo tias yog nws mus nrog tsoom pej xeem sib txiv ntsauv Yes Xus mas qhov kawg nws yuav ntsia tsis pom Huab Tais Yes Xus, tsis tas li ntawd, tej zaum tseem raug tsoom pej xeem thuam nws thiab. Li ntawd, nws thiaj txiav txim siab nce ib tsob ntoo siab xauj kom pom Huab Tais Yes Xus. Thaum Huab Tais Yes Xus taug kev hla tuaj mus nws pom Ntxas Kais nws thiaj hais rau Ntxas Kais tias : “Ntxas Kais koj nqes los sai hnub no kuv yuav mus so hauv koj tsev. Tsis tas li ntawd, Huab Tais Yes Xus tseem hais tias, Ntxas Kais kuj yog Has Nplas ib tug tub thiab. Txhais tias, Huab Tais Yes Xus tsis txiav Ntxas Kais tawm hauv Has Nplas Has tsoom xeeb ntxwv.

Tam sim ntawd Ntxas kais zoo siab heev, nws xav tsis txog tias, Huab Tais Yes Xus uas luag tej cav tias nws yog Mev Xiav, yog tus Vaj Pleev los yog ib tug Xib Hwb nto npe, hnub no yuav hais ib lo lus zoo rau Ntxas Kais, tsis tas li ntawd, Yes Xus tseem yuav tuaj so hauv ib tug neeg txhaum zoo li Ntxas Kais tsev. Thaum tsoom pej xeem hnov li ntawd lawv kuj yws zom zaws. Tab sis, qhov Huab Tais Yes Xus ua no yog nws xav qhia rau peb tsoom pej xeem thiab rau peb sawv daws tias, Tswv Ntuj tsis txwv tsis txiav peb ib tug neeg kiag. Tsuas yog neeg thiaj txiav neeg xwb. Tab sis Huab Tais Tswv Ntuj nws yog tus Huab Tais siab loj siab dav nws zam txhaum tau rau txhua txhia tus neeg, tab yog ib tug neeg muaj txhaum, thov kom nws hloov siab tig los nrhiav Tswv Ntuj, mas Tswv Ntuj yeej zam txhaum rau nws. Zoo yam li Ntxas Kais hnub no. Ua ntej no, Huab Tais Yes Xus tau hais tias, ib tug neeg nplua nuj yuav chaw mus hauv Tswv Ntuj lub Ceeb Tsheej mas tsis yooj yim kiag, vim nyuaj npaum nkaus ib tug ntxhuav thooj khoom yuav chaws mus hauv ib lub qhov koob. Tab sis hnub no peb pom hais tias : Ntxas Kais yog ib tug nplua nuj tab sis, nws kam qhib nws lub siab tuaj mus tos txais Huab Tais Yes Xus, thaum Huab Tais Yes Xus pom hais tias nws qhib siab txais Huab Tais Yes Xus, Yes Xus mus xyuas nws tsev, nws zoo siab nws hloov siab hlo los raws Huab Tais Yes Xus. Nws thim nyiaj rov rau cov uas nws tau kaus los 4 npaug. 

Kwv tij sawv daws Ntxas Kais tau ib tug qauv zoo rau peb txog kev tig los yuav lub siab tshiab.

Peb paub tias peb yog neeg muaj txhaum thaum peb tau ntsib Huab Tais Yes Xus thiab nws zam txhaum rau peb, peb puas yuav zoo siab tig los yuav lub siab tshiab, zoo xws li Ntxas Kais.

Tus sau : Zoo Tswv Zov Yaj