NTHUAV NTAWV MOO ZOO HNUB TIM 26/1/2020

LIS PIAM 3 CAIJ NYOB NRUAB XYOOS.
Yes Xus rov los Nkas Lis Lais.(MT 4 : 12 - 17)
Yes Xus hnov tias luag ntes Zam lawm, ces nws rov mus Nkas Lis Lais. Nws tso Nas Xas Las tseg, nws mus nyob ruaj rau Kas Fas Naus, ntawm ntug dej ntuj, nyob ntawm Ntxas Npus Loos thiab Nes Tas Lis ciam teb. Li ntawd muaj raws li yaj saub His Xais xub hais tias : Ntxas Npus Loos daim av, Nes Tas Lis daim av, kev mus rau dej ntuj, cov teb chaws nyob sab dej Yos Las Das tim ub, cov neeg teev pej kum dab uas nyob Nkas Lis Lais ! Haiv neeg nyob hauv kev tsaus ntuj pom ib qho pom kev cig loj loj kaj cov neeg maub hauv tub tuag lub teb chaws tsaus ntuj, ib qho pom kev ci tawm tuaj lawm. Txij ntawd los, Yes Xus pib ceeb toom hais tias : "Nej hloov siab mog, vim Ntuj lub Ceeb Tsheej los txog ze lawm." 

Kwv tij sawv daws, cov lus nyob rau hauv zaj hnub no ua rau peb pom tseeb txog Haub Tais Yes Xus tau pib nws lub luag hauj lwm tshaj Ntuj Lus. 
Haub Tais xav kom peb hloov peb lub siab, peb hloov txoj kev xav, peb tso peb tej kev ntshaw ub ntshaw no nyob ntiaj teb no tseg thiab peb los raws nws. Peb txais Huab Tais Tswv Ntuj lub Moo Zoo uas muaj txiaj ntsim rau peb, thiab peb tshaj Tswv Ntuj lub Moo Zoo rau luag lwm tus. Ces qhov kawg peb thiaj yuav tau Tswv Ntuj lub Ceeb Tsheej los ua peb tug. 
Kwv tij sawv daws, peb yog ib co me nyuam neeg me me, tab sis, Huab Tais Yes Xus hu peb los tshaj txog nws lub Moo Zoo , uas yog ib txoj hauj lwm tseem ceeb. Yog peb ua Huab Tais Yes Xus txoj hauj lwm, mas peb yuav tau txiaj ntsim ntau nyob rau hauv Huab Tais lub luag hauj lwm. Thaum peb coj lub Moo Zoo mus txog cov neeg txom nyem, luag tej yuav pom Tswv Ntuj nyob rau hauv peb, vim peb tau ua Tswv Ntuj cov hauj lwm, ces peb yuav muaj meej mom nyob rau ntawm zeej tsoom xub ntiag. 

Tus nthuav : XH. Xyooj Tuam Lis, Zoo Tswv Zov Yaj