NTHUAV NTAWV MOO ZOO HNUB TIM 27/11/2019

LK 21 : 12-19

Ntau hom xwv txheej yuav tshwm sim.

12 Tab sis ua ntej ib puas tsav yam ntawd, luag yuav cev tes ntes nej, luag yuav hiam nej, luag yuav coj nej mus kom rau cov tsev txoos thiab tsev loj faj. Luag yuav coj nej mus rau ntawm cov vaj thiab cov nom tswj teb chaws xub ntiag vim kuv lub npe. 13 Tej ntawd yuav pub ib lub zoo sij hawm rau nej ua tim khawv. 14 Nej khaws rau nruab siab tias nej yuav tsis txhob npaj ib co lus teb kom txuag tau nej. 15 Vim kuv yuav muab ib co lus thiab ib txog kev thoob tsib rau nej, ces cov ntxub nej yuav tsis muaj ib tug teb tau thiab cav tau nej cov lus. 16 Tab yog nej niam nej txiv, nej cov kwv tij, cov txheeb ze, thiab cov phooj ywg, los lawv tseem yuav mus kom nej. Luag yuav muab nej ib txhia tua. 17 Luag yuav ntxub nej vim kuv lub npe. 18 Tab sis tsis muaj ib txoj plaub hau saum nej taub hau yuav ploj. 19 Nej ua siab ruaj kom tom thawj, ces nej yuav cawm nej txoj sia."

Nyob rau hauv zaj no, kuj muaj ntau lo lus zoo qhia peb, vim tias, peb cov ntseeg sawv daws, uas los raws Huab Tais Yes Xus, muaj qees zaus peb yuav raug kev txom nyem, los yog yuav raug luag tuam raug luag ntxub thiab tsim txom peb. Peb yuav pom tias, kev tsim txom neeg vim txoj kev ntseeg, muaj tshwm sim tuaj nyob rau ntau ntau lub teb chaws.

Tab sis, txawm li cas los xij peb tsis txhob poob siab, yog tias, luag ntxub yus, los yog thuam yus, luag tsim txom yus, yog vim yus coj tsis ncaj, coj tsis tus, qhov ntawd, kuj yog tim yus, yog yus li teeb meem, yus yuav tsum xav saib yuav kho yus tus kheej li cas thiaj haum nrog luag. Tab sis, yog tias, yus raug luag hiam, raug luag tsim txom vim Huab Tais Yes Xus lub npe, mas tsis txhob tu siab, yus yuav zoo siab thiab muaj kev cia siab, vim Tswv Ntuj nyob yus tog, Tswv Ntuj yuav txuag yus. 

Tus sau : XH. Xyooj Tuam Lis, Zoo Tswv Zov Yaj