NTHUAV NTAWV MOO ZOO HNUB TIM 28/1/2020

LIS PIAM 3 CAIJ NYOB NRUAB XYOOS.
Yes Xus tsev neeg. (MK 3 : 31 - 35)
Yes Xus niam thiab nws cov kwv tij tuaj txog, lawv nyob nraum zoov, lawv kom luag mus hu Yes Xus. Muaj ib pab neeg zaum ncig Yes Xus, lawv hais rau nws tias : "Koj niam nrog koj cov kwv thiab cov muam tuaj nyob nraud, lawv nrhiav koj."
Yes Xus teb rau lawv tias : "Leej twg yog kuv niam ? Leej twg yog kuv kwv tij ?"
Yes Xus ntsia cov neeg zaum ncig nws, nws hais tias : "Kuv niam thiab kuv cov kwv tij nyob ntawm no. Leej twg ua raws li Tswv Ntuj lub siab, tus ntawd yog kuv ib leeg kwv, ib leeg muam thiab ib leeg niam."  

Kwv tij sawv daws, kev ua Yes Xus thwj tim peb yuav tsum kawm kom paub thiab txawj mloog. Kom peb to taub txog Tswv Ntuj txoj kev xav thiab nws lub siab nyiam, ces peb thiaj coj tau raws li qhov Tswv Ntuj xav kom peb ua. Zoo yam li niam Mab Liab uas nws tau ua ib tug qauv los yog ib tug piv txwv rau peb ntsia. Txawm tias muaj ntau zaus nws tsis to taub txog Tswv Ntuj txoj hauj lwm, tiam sis, nws maj mam siv sij hawm coj los ua tib zoo xav qhov yog thiaj yog qhov ntxim Tswv Ntuj siab dua.
Nyob rau hauv txoj kev ntseeg, yog peb txawj mloog, txawj tso siab rau Tswv Ntuj thiab tsis muab hlob, peb txawj ua qhov xis Tswv Ntujsiab, ces peb thiaj yog Huab Tais Yes Xus cov kwv cov muam.

Tus nthuav : XH. Xyooj Tuam Lis, Zoo Tswv Zov Yaj