NTHUAV NTAWV MOO ZOO HNUB TIM 29/3/2020

Lis piam 5 Caij Plaub Caug.
Yes Xus tsa Las Ntxas Los sawv rov los nyob Npes Tas Nias. (Z 11 : 1 - 45)
Muaj ib tug neeg mob hu ua Las Ntxas Los, nws nyob Npes Tas Nias. Yog Mab Liab thiab nws tus niam laus Mas Tas lub zos. Mab Liab yog tus uas yav dhau los nws muab tshuaj tsw qab pleev Huab Tais thiab muab nws cov plaub hau so Huab Tais ko taw. Tus neeg mob, yog Mab Liab tus nus Las Ntxas Los. Nkawd ob viv ncaus xa xov mus hais rau Yes Xus tias : "Huab Tais, tus uas koj nyiam, mas nws mob lawm."
Yes Xus hnov li ntawd, Yes Xus hais tias : "Tus mob no tsis coj mus rau qhov tuag, nws yuav ua kom Tswv Ntuj nto koob meej, kom xwv Tswv Ntuj Leej Tub txais koob meej vim tus mob ntawd."
Yes Xus nyiam Mas Tas, thiab nws tus niam hluas, thiab Las Ntxas Los lawv. Tab yog nws hnov hais tias Las Ntxas Los mob lawm, tsis kav nws tseem nyob qhov qub ob hnub ntxiv thiab. Ces Yes Xus mam li hais rau cov thwj tim tias : "Peb rov mus Yus Das teb."
Cov thwj tim hais rau Yes Xus tias : "Las Npis, ob peb hnub ntawd, cov Yus Das xav xuas pob zeb txawb rau koj. Koj tseem yuav rov mus Yus Das teb thiab lod ?"
Yes Xus teb tias : "Nruab hnub tsis muaj kaum ob teev lod ? Tus twg mus kev nruab hnub, nws tsis dawm taw, vim nws tau lub ntiaj teb qhov pom kev. Hos tus twg mus kev hmo ntuj, mas nws dawm taw, vim qhov pom kev tsis nyob hauv nws."
Yes Xus hais li ntawd tas, nws thiaj hais rau cov thwj tim tias : "Peb tus phooj ywg Las Ntxas Los tsaug zog lawm ; tab sis kuv yuav mus tsa nws sawv."
Cov thwj tim hais rau Yes Xus tias : "Huab Tais, yog nws tsaug zog lawm, mas nws tus mob yuav zoo."
Yes Xus hais txog Las Ntxas Los txoj kev tuag, tab sis cov thwj tim xav tias yog Yes Xus hais txog kev pw tsaug zog. Yes Xus thiaj li ncaj qha qhia tias : "Las Ntxas Los tuag lawm. Kuv tsis nyob ntawd, tsis kav kuv zoo siab, vim qhov ntawd yuav pab nej ntseeg. Peb mus xyuas nws."
Tos Mas, tus uas hu ua Dis Dws Mos, hais rau cov npawg thwj tim tias : "Peb kav tsij mus mas, kom peb nrog nws tuag thiab."
Thaum Yes Xus tuaj txog, nws pom Las Ntxas Los twb zwm ntxa tau plaub hnub lawm. Npes Tas Nias nyob ze ntawm Yes Lus Xas Les, kwv yees li kaum tsib ncuas kev. Cov Yus Das coob leej tuaj xyuas Mas Tas thiab Mab Liab nkawd, lawv tuaj nplij nkawd vim nkawd tus nus tuag lawm. Thaum Mas Tas hnov tias Yes Xus tuaj, ces Mas Tas mus tos Yes Xus, hos Mab Liab zaum nyob hauv tsev. Mas Tas hais rau Yes Xus tias : "Huab Tais, yog koj ntxov tuaj txog ntawm no, mas kuv tus nus yuav tsis tuag. Tsis kav, kuv paub tias nyem no, koj thov yam twg ntawm Tswv Ntuj, mas Tswv Ntuj yuav muab rau koj."
Yes Xus hais rau Mas Tas tias : "Koj tus nus yuav sawv rov los."
Mas Tas hais rau Yes Xus tias : "Kuv paub tias thaum txog Hnub Kawg, lub caij leej tib neeg lub cev ciaj rov los, mas nws yuav sawv rov los."
Yes Xus hais rau Mas Tas tias : "Kuv yog Txoj Kev Sawv Rov Los thiab yog Txoj Sia : tus ntseeg txog kuv, tab yog nws tuag lawm, nws yuav muaj txoj sia nyob. Leej twg ua neej nyob ntseeg txog kuv, nws yuav tsis tuag ib zaug. Koj puas ntseeg qhov ntawd ?"
Mas Tas hais rau Yes Xus tias : "Huab Tais, kuv ntseeg. Kuv ib txwm ntseeg hais tias koj yog Leej Pleev, yog Tswv Ntuj Leej Tub tuaj nyob hauv lub qab ntuj no."
Mas Tas hais li ntawd tas, nws rov mus hu nws tus niam hluas Mab Liab. Nws ntxhi twj ywm rau Mab Liab tias : "Xib Hwb tuaj txog tod lawm, nws hu koj."
Thaum Mab Liab hnov dheev li ntawd, nws sawv tsees mus cuag Yes Xus. Yes Xus tsis tau mus txog hauv zos. Nws tseem nyob ntawm qhov chaw uas Mas Tas tuaj cuag nws. Cov Yus Das uas tuaj nplij Mab Liab thiab nrog Mab Liab nyob hauv tsev, pom Mab Liab sawv tsees tawm lawm, lawv raws nws qab, vim lawv xav tias Mab Liab yuav mus quaj tom ntxa.
Thaum Mab Liab tuaj txog ntawm Yes Xus, nws pom Yes Xus, nws txhos caug ntawm Yes Xus ko taw, nws hais rau Yes Xus tias : "Huab Tais, yog koj ntxov tuaj txog ntawm no, mas kuv tus nus yuav tsis tuag."
Thaum Yes Xus pom Mab Liab quaj, thiab pom cov Yus Das uas nrog Mab Liab tuaj sawv daws quaj, mas Yes Xus tu siab kawg nyob hauv nruab siab, nws ib ce qaub thoob tas. Yes Xus hais tias : "Nej muab nws tso qhov twg ?"
Lawv teb tias : "Huab Tais, koj los tom no, koj yuav pom."
Yes Xus kua muag poob nthav. Cov Yus Das thiaj hais tias : "Saib, nws nyiam Las Ntxas Los kawg."
Tab sis muaj ib co Yus Das hais tias : "Nws yog tus uas qhib tau neeg dig muag qhov muag, nws ho ua tsis tau kom tus neeg no txhob tuag ?"
Ces Yes Xus rov tu siab heev kawg nyob nruab siab, nws mus tom lub ntxa. Yog ib lub qhov tsua, muaj ib daim txiag zeb kaw lub rooj ntxas. Yes Xus hais tias : "Nej tshem daim txiag zeb."
Mas Tas uas yog tus tuag tus muam, hais rau Yes Xus tias : "Huab Tais, nws tuag tau plaub hnub lawm : nws twb tsw lawm."
Yes Xus hais rau Mas Tas tias : "Kuv tsis tau hais rau koj tias yog koj ntseeg, koj yuav pom Tswv Ntuj lub hwj chim lod ?"
Ces lawv tshem daim txiag zeb, Yes Xus tsa muag ntsia saum ntuj, nws hais tias : "Txiv, kuv ua koj tsaug vim koj mloog kuv. Kuv paub tias koj yeej ib txwm mloog kuv, tab sis kuv hais cov lus no, kom tsoom neeg uas sawv ncig kuv ntseeg tias yog koj xa kuv tuaj."
Yes Xus hais li ntawd tas, nws hu ib suab nrov nrov tias : "Las Ntxas Los, koj tawm los nraum no !"
Tus tuag tawm los, cov saw tseem pav nws tej tes taw, daim ntaub npog ncauj tseem vov nws lub ntsej muag. Yes Xus hais rau lawv tias : "Nej daws cov saw, nej cia nws mus nws."
Coob tus Yus Das uas tuaj xyuas Mab Liab tau pom qhov uas Yes Xus ua ces lawv ntseeg txog Yes Xus.