NTHUAV NTAWV MOO ZOO HNUB TIM 3/2/2020

LIS PIAM 4 CAIJ NYOB NRUAB XYOOS.
Yes Xus kho ib tug poj niam tsob ntshav. Nws tsa Yais Los tus ntxhais sawv rov los. (MK 5 : 21 - 43)
Thaum Yes Xus caij nkoj rov los txog sab ntug dej tim no, ib pab neeg coob tuaj sib sau ntsauv nws. Thaum ntawd, Yes Xus tseem nyob ntawm ntug dej ntuj. Muaj ib tug hauv cov tswj tsev txoos hu ua Yais Los tuaj txog. Thaum nws pom dheev Yes Xus, nws txhos caug ntua ntawm Yes Xus ko taw. Nws thov Yes Xus tias :"Kuv tus me ntxhais txoj sia yuav tu, thov koj tuaj tsa tes cawm nws kom nws ciaj."
Yes Xus nrog Yais Los mus. Ib pab neeg coob raws Yes Xus mus thiab, lawv sawv daws txiv Yes Xus. Muaj ib tug poj niam tsob ntshav tau kaum ob xyoos los lawm. Ntau tus kws tshuaj tau ua kom nws txom nyem kawg. Nws siv tas nws lub cuab tam los kho tsis tau nws zoo. Nws mob heev zuj zus ntxiv. Nws hnov luag hais txog Yes Xus, ces nws nrog tsoom sid sib txiv tom Yes Xus nraub qaum. Nws kov Yes Xus lub tsho. Vim nws xav hauv siab tias : "Tsuav yog kuv tau kov nws lub tsho xwb, mas kuv yeej yuav dim."
Ces tam sis ntawd, nws qhov tsob ntshav tu nrho, nws hnov nws lub cev zoo hlo ntawm tus mob. Tam sim ntawd, Yes Xus kuj hnov ib lub zog tawm hauv nws mus ; ces Yes Xus tig los nug pab neeg ntawd tias : "Leej twg kov kuv lub tsho ?"
Cov thwj tim hais rau nws tias : "Koj ntsia saib, tas tsoom sid txiv koj txhua sab tuaj, koj tseem hais tias : "Leej twg kov kuv ?"
Yes Xus ntsia ib ncig kom pom tus neeg uas tau kov nws. Ces tus poj niam ntshai, nws tshee tshee, vim nws paub qhov uas nyuam qhuav tshwm sim hauv nws. Nws los txhos caug ntawm Yes Xus taw thiab qhia qhov tseeb rau Yes Xus. Yes Xus hais rau tus poj niam tias : “Phauj, koj lub siab ntseeg cawm koj lawm. Koj rov mus kaj siab lug, koj tus mob zoo lawm."
Thaum Yes Xus tseem tab tom hais lus, ib co neeg tuaj ntawm tus tswj tsev txoos lub tsev tuaj hais tias : “Koj tus ntxhais twb tuag lawm, koj tseem yuav txob Xib Hwb ua dab tsi ?”
Tab sis Yes Xus twb hnov lo lus lawv nyuam qhuav hais, nws hais rau tus tswj tsev txoos tias : "Koj txhob ntshai, tsuav koj ntseeg xwb."
Yes Xus tsis kheev leej twg nrog nws mus li. Nws tsuas cia Pob Zeb, Yas Kos thiab Yas Kos tus kwv Zam nrog nws mus xwb. Lawv tuaj txog tus tswj tsev txoos lub tsev, Yes Xus pom sawv daws ua ntxhov hnyo : ib txhia quaj, ib txhia qw nrov nrov.
Yes Xus los hauv tsev, nws hais tias : "Ua cas sawv daws ua ntxhov hnyo thiab quaj zom zaws ? Tus me ntxhais tsis tuag, nws tsaug zog xwb."
Ces lawv luag Yes Xus. Tab sis Yes Xus ntiab sawv daws tawm mus nraum zoov, nws tsuas kheev tus me nyuam niam thiab txiv, thiab cov nrog nws tuaj, nyob xwb. Nws chaws mus hauv kem uas tus me nyuam nyob.
Yes Xus tuav tus me nyuam txhais tes, nws hais rau tus me nyuad tias : "Tas lis tas kus," txhais tias : "Me ntxhais, kuv hais koj, koj sawv !"
Tus me ntxhais sawv tsees tam sis ntawd, nws mus kev, vim nws twb muaj kaum ob xyoos lawm. Tam sim ntawd, sawv daws ntshai kawg. Yes Xus txwv lawv heev kom txhob qhia leej twg paub. Ces nws kom lawv muab mov rau tus me ntxhais noj.

Kwv tij sawv daws, kev sib khib sib ntxub, kev sib chim sib npau taws, ua rau muaj kev sib ntaus sib tua, tsim kev kub ntxhov rau lub zej zog, los yog lub teb lub chaws tsis muaj kev thaj yeeb.
Tab sis, kev sib hlub, sib pab, yog tsim kom muaj kev thaj yeeb. Huab Tais Yes Xus tuaj qhia kom peb muaj lub siab hlub luag lwm tug, kom thaum peb pom luag raug xwm txheej, los yog raug kev nyuaj siab, peb yuav tsum tsis txhob nkaum tes, peb yuav cev tes sib pab, raws li peb lub peev xwm yuav pab tau. Ces txoj kev thaj yeeb nyab xeeb thiab Tswv Ntuj lub Ceeb Tsheej thiaj yuav tshwm sim tuaj nyob nruab nrab peb sawv daws.

Tus nthuav : XH. Xyooj Tuam Lis, Zoo Tswv Zov Yaj