NTHUAV NTAWV MOO ZOO HNUB TIM 6/11/2019

LK 14 : 25-33

Tso yam yus nyiam pov tseg.

25 Tej pab neeg coob nrog Yes Xus taug kev. Yes Xus tig los hais rau lawv tias : 26 "Leej twg los raws kuv, yog nws tsis nyiam kuv dua nws niam nws txiv, nws poj niam me nyuam, nws cov kwv tij thiab cov muam, thiab yog nws nyiam nws txoj sia dua kuv, mas tus ntawd ua tsis tau kuv thwj tim. 27 Leej twg tsis kwv nws tus ntoo cuam thiab tsis lawv kuv qab, mas nws ua tsis tau kuv thwj tim." 28 "Yog nej leej twg xav txhim ib tug pej thuam, nws yuav tsis xub zaum xam saib yuav siv nyiaj npaum li cas, thiab ntsuas saib nws puas muaj nyiaj txaus ua kom tiav lod ? 29 Tsam nws pib txhim cov taw ntsa tas, ho ua tsis tau kom tiav. Ces tas cov neeg pom yuav thuam nws hais tias : 30 Saib ! Tus neeg no pib txhim, ho ua tsis tau kom tiav ! 31 Los ib tug vaj, yuav sawv kev mus ua rog ntaus lwm tus vaj, nws yuav tsis xub zaum xam saib nws muaj kaum txhiab leej tub rog, nws puas yuav tiv tau tus vaj uas coj nees nkaum txhiab leej tuaj ? 32 Yog nws paub tias yuav tiv tsis tau, mas thaum lwm tus vaj tseem tuaj txog deb, nws yuav xa ib pab tiam lis mus thov kom cia lub teb chaws nyob thaj yeeb. 33 Nej kuj zoo ib yam li ntawd : nej leej twg tsis tso nws lub cuab tam tseg, nws ua tsis tau kuv thwj tim. 

Kwv tij sawv daws, peb sawv daws yeej paub tias, txhua txoj kev ntseeg, yeej yog qhia kom tib neeg txawj ua qhov zoo, thiab ua tau ib tug neeg ncaj neeg zoo. Li ntawd, yeej tsim nyog peb ua raws li yus txoj kev ntseeg qhia. Yam li peb cov neeg ntseeg Ntuj, peb ntseeg txog Huab Tais Tswv Ntuj, ntseeg txog peb tus Huab Tais Yes Xus Pleev, peb yeej xav coj peb lub neej raws nws. Txawm tias, ntau zaus peb ntsib kev txom nyem, uas rau peb qaug zog.

Tab sis, yog peb muab coj los ua tib zoo xav xws li tus vaj uas yuav mus ntaus ib ntsuj rog, ces peb yeej muaj kev tso siab thiab ntseeg tau hais tias, ntsuj rog no peb muaj yeej xwb, vim tias Huab Tais Tswv Ntuj nyob peb tog.

Peb yuav hla dhau tej kev txom nyem ib puas tsav yam hauv peb lub neej, vim Huab Tais Yes Xus yuav pab peb, rau qhov tias, peb yog nws cov thwj tim.

Kwv tij sawv daws, kev coj lub neej raws Huab Tais Yes Xus yeej tsis yooj yim, vim peb yuav tsum kwv peb tus ntoo cuam, peb yuav tiv kom yeej ib puas tsav yam xwm txheej, teeb meem, nyob rau hauv peb kev ua neej. Peb yuav tsum muaj txoj kev ntseeg thiab tso siab rau Huab Tais Yes Xus tiag tiag, peb yuav tsum nyiam Tswv Ntuj thiab muaj lub siab ntseeg ruaj khov tiag tiag, mas qhov kawg peb thiaj yuav hla dhau.

Hnub no kuv tuaj ntsib nej li no xwb, tag kis peb mam rov los sib ntsib dua, thov kom Tswv Ntuj nrog nej nyob thiab ua nej siab kaj lug. Nyob zoo sawv daws.