NTHUAV NTAWV MOO ZOO HNUB TIM 7/11/2019

LK 15 : 1-10

Tswv Ntuj nyiam zam txhaum. Zaj paj lug hais txog tus yaj poob zoo.

1 Tas cov neeg sau se thiab cov neeg txhaum txav los ze Yes Xus, lawv xav mloog Yes Xus hais. 2 Ces cov Fas Lis Xais thiab cov Kws Ntawv Ntshiab nroo zom zaws tias : "Tus neeg ntawd txais cov neeg txhaum, nws tseem nrog lawv noj mov thiab !" 3 Yes Xus thiaj hais zaj paj lug no rau lawv : 4 "Yog nej leej twg muaj ib puas tus yaj, tab sis ib tug ploj lawm, mas nws yeej yuav tso cuaj caum cuaj tus yaj tseg rau tom hav quav poj, nws mus nrhiav kom tau tus uas poob zoo lawm. 5 Thaum nws nrhiav tau tus yaj poob zoo lawd, nws muab kwv saum xwb pwg, nws zoo siab tas nrho. 6 Nws rov los tsev, ces nws nqua hu nws cov phooj ywg thiab cov nyob ze nws tuaj, nws hais rau lawv tias : 'Nej nrog kuv zoo siab, vim kuv nrhiav tau kuv tus yaj poob zoo lawm.' 7 Kuv hais rau nej tias, thaum ib tug neeg txhaum hloov siab los ntxub kev txhaum, mas muaj kev zoo siab loj nyob saum ntuj. Kev zoo siab ntawd loj dua kev zoo siab rau cuaj caum cuaj leeg siab ncaj uas tsis tas yuav hloov siab los ntxub kev txhaum.”

8 “Hos tus poj niam uas nws muaj kaum lub txiaj nyiag, yog ib lub poob lawm, mas nws yuav taws teeb cheb tsev, ua tib zoo nrhiav kom tau nws lub txiaj nyiag. 9 Thaum nws nrhiav tau lawm, nws nqua hu nws cov phooj ywg thiab cov nyob ze nws tuaj, nws hais tias : ‘Nej nrog kuv zoo siab mas ! Vim kuv nrhiav tau lub txiaj uas poob lawm ! 10 Kuv hais rau nej tias, thaum ib tug neeg txhaum hloov siab, mas muaj kev zoo siab loj nyob hauv Tswv Ntuj tsoom Tshiab ib yam li ntawd thiab.”

 

Lub Moo Zoo hnub no qhia tias ; peb sawv daws, yuav txhos caug thiab cav lus zoo txog Tswv Ntuj thiab nyias yuav lees nyias kev txhaum nyob rau ntawm Huab Tais Tswv Ntuj xub ntiag.

Lub caij thaum Huab Tais Yes Xus tseem nyob ntiaj teb no, nws nrog cov neeg uas luag hais tias yog neeg txhaum nyob thiab noj mov ua ke, yam li cov khaws se. Lub caij ntawd, lawv thuam tias, cov neeg khaws se yog cov neeg muaj txhaum. Cov Fas Lis Xais thiab cov Kws Lij Choj lawv nrhiav cai thiab hiam Huab Tais Yes Xus tias, Huab Tais Yes Xus ua tsis raws cai, tab sis, Huab Tais Yes Xus xauj pom hauv tib neeg lub siab, nws paub tias, cov neeg txhaum ntawd yog cov uas ntshaw txog txoj kev hlub, lawv xav kom muaj tug los hais lus zoo rau lawv thiab los nyiam lawv. Li ntawd, Huab Tais Yes Xus thiaj yog cov neeg txhaum qhov chaw vam khom, vim Huab Tais Yes Xus khuv leej cov neeg txhaum. Huab Tais Yes Xus paub zoo tias, tsis muaj leej twg xav ua tus neeg txhaum mus tas ib sim, thiab peb sawv daws, los puav leej yog neeg txhaum ib yam nkaus. Huab Tais Yes Xus thiaj yog kob tshuaj uas yuav los kho thiab daws neeg ntiaj teb txoj kev txhaum, kom tib neeg tau txais kev dim hauv txoj kev txhaum ntawd.

Yam li hnub no Huab Tais Yes Xus hais tias, Tswv Ntuj tsoom tshiab yuav zoo siab thaum lawv pom ib tug neeg txhaum hloov tau nws lub siab, thiab nws tig rov los ua ib tug neeg zoo.

Tswv Ntuj yuav zoo siab tshaj thaum nws pom ib tug neeg txhaum tig los yuav lub siab tshiab.

Kwv tij sawv daws, peb paub zoo tias, peb sawv daws puav leej txawj ua txhaum txhua lub sij hawm. Peb niaj hnub ua txhaum, vim peb lub ncauj txawj hais lus tsis zoo rau luag tej, peb lub siab txawj xav tej yam phem, peb lub cev txawj ua txhaum. Li ntawd, hnub no peb paub lawm hais tias, Huab Tais Yes Xus thiaj yog tus pab tau peb daws peb tej txhaum kom peb rov huv tuaj.

Thov kom peb tig los nrhiav Tswv Ntuj thiab peb niaj tig los yuav lub siab tshiab, peb niaj hnub kho peb tus kheej, mas qhov kawg thiaj peb yuav nrhiav tau Tswv Ntuj lub Ceeb Tsheej thiab tau lub neej nyob kaj lug kaj nrig mus ib txhis.

Add new comment

2 + 8 =