NTHUAV NTAWV MOO ZOO HNUB TIM 7/12/2019

Lis piam 1 hauv Caij Tos Huab Tais.

Kaum ob leeg thwj tim mus tshaj Ntuj lus. (MT 9 : 35-10 : 1, 5a, 6-8)

Yes Xus mus ncig txhua cov nroog thiab cov zos huv si, nws qhia sawv daws nyob hauv cov tsev txoos, nws tshaj lub Moo Zoo txog Ntuj lub Ceeb Tsheej, nws tseem kho sawv daws tej txiab xeeb thiab tej mob nkeeg tas huv si. Yes Xus pom tsoom pej xeem, nws hlub lawv, vim lawv sawv daws sab thiab qaug zog zoo li ib co yaj tsis muaj tsw zov. Yes Xus thiaj hais rau nws cov thwj tim tias : "Qoob loo ntau kawg, tab sis cov tub zog tsawg. 38 Nej thov tus Tswv qoob kom nws xa ib co tub zog tuaj sau nws cov qoob."
Yes Xus hu nws kaum ob leeg thwj tim los cuag nws. Nws muab hwj huam kom lawv ntiab tau dab tawm, thiab kho tau tej txiab xeeb thiab tej mob nkeeg kom thim.
Yes Xus xa kaum ob leeg no mus tshaj lub Moo Zoo, nws qhia lawv tias : "Nej xub mus cuag cov yaj ploj hauv haiv His Xas Lais. Thaum nej mus kev, nej ceeb toom tias Ntuj lub Ceeb Tsheej tuaj txog ze lawm. Nej kho cov mob kom zoo, nej tsa cov tuag kom ciaj rov los, nej kho cov mob ruas kom huv, nej ntiab dab kom khiav. Nej tau txais dawb, nej rov pub dawb."

Nyob rau hauv zaj no yog piav txog Huab Tais Yes Xus tshaj lub Moo Zoo hais txog Tswv Ntuj lub Ceeb Tsheej nyob rau hauv tej lub nroog thiab cov zej zog. Huab Tais Yes Xus ntsia pom tsoom pej xeem tuaj coob coob, nws saib lawv khwv kawg, nws khuv leej lawv, vim lawv zoo li cov yaj poob zoo uas tsis muaj tsw.
Huab Tais Yes Xus thiaj tau xa 12 leeg thwj tim mus tshaj lub Moo Zoo rau ntiaj teb neeg sawv daws, kom tau txais kev cawm. 
Kwv tij sawv daws, hnub no lub koom txoos kuj cia peb hwm txog Leej Ntshiab Ambrost uas nws yog tus Tswv Qhai ntawm lub nroog Milan. Nws kuj yog ib tug kws txuj, uas muaj kev thoob tsib hauv lub Koom Txoos, nws txawj coj thiab txawj qhia zoo tas nrho, nws kuj yog ib tug uas pab kom Leej Ntshiab As Nkus Tis Nus tau tig los yuav lub siab tshiab, nyob rau hauv nws zaj lus qhia tias ; neeg lub siab yeej tsis tiaj tus, mus txog rau hnub nrhiav tau chaw so nyob hauv Tswv Ntuj.

Tus sau : XH. Xyooj Tuam Lis, Zoo Tswv Zov Yaj