NTHUAV NTAWV MOO ZOO HNUB TIM 8/12/2019

Lis piam 2 hauv Caij Tos Huab Tais.

Zam Ntxuav Plig qhuab qhia. (MT 3 : 1-12 )

Muaj ib ntus, Zam Ntxuav Plig mus ntuas tsoom sid nyob hauv teb chaws suab puam Yus Das. Nws hais tias : "Nej hloov siab mog, vim Ntuj lub Ceeb Tsheej los txog ze lawm."
Nws yog tus uas yaj saub His Xais hais txog tias : Tus qw hauv teb chaws quav poj lub suab hais tias : Nej npaj txoj kev rau Huab Tais, nej ua kom nws txoj kev ncaj tuaj.
Zam cov ris tsho yog xuas plaub ntxhuav ua, nws sia ib daim siv tawv tsiaj ncig nws lub duav. Nws noj kooj thiab zib mu qus. Tas cov nyob Yes Lus Xas Les, cov nyob Yus Das teb, thiab cov nyob ib thaj tsam raws tus dej Yos Las Das puav leej tuaj cuag Zam. Lawv lees txhaum, thiab thov nws ntxuav lawv nyob hauv tus dej Yos Las Das.
haum Zam pom coob tus Fas Lis Xais thiab ntau tus Xas Dus Kais tuaj txais kab ke ntxuav, nws hais rau lawv tias : "Caj ces nab muaj taug, leej twg qhia nej khiav kom nej dim ntawm Ntuj Txoj Kev Npau Taws uas tuaj yuav txog ? Nej kav tsij txi ib co txiv tsim nyog tus neeg hloov siab. Nej txhob khav rau nruab siab tias: ‘Peb muaj Has Nplas Has ua peb txiv.’ Kuv hais rau nej tias, Tswv Ntuj yuav ua kom Has Nplas Has ib co xeeb ntxwv tawm hauv cov pob zeb no los kuj tau. Zaum no, rab taus twb nyob ntawm cag ntoo lawm, tsob ntoo twg tsis txi txiv zoo, yuav tsum muab txiav pov hlawv hauv hluav taws. Ntawm kuv, mas kuv ntxuav nej nyob hauv dej kom nej tig los yuav ib lub siab tshiab ; hos tus lawv kuv qab tuaj, nws muaj zog dua kuv, kuv tsis tsim nyog hle nws nkawm khau. Tus ntawd yuav ntxuav nej nyob hauv Leej Ntuj Plig Ntshiab thiab nyob hauv hluav taws. Nws txhais tes tuav rawv ib lub vab, nws yuav ntxuaj nws lub tshav ntaus nplej. Nws yuav yawm cov nplej qoos rau hauv txhab, hos cov npluag, nws yuav muab hlawv hauv cov hluav taws tsis txawj tuag."  

Nyob rau hauv lub caij Tos Huab Tais, coj peb rau hauv qhov tob kawg nyob hauv peb lub siab. Kom peb tau ntsib Huab Tais Yes Xus thiab muaj kev kaj siab.
Nyob rau hauv Zam Ntxuav Plig tau hu peb sawv daws kom tig los yuav lub siab tshiab, peb tig los ua zoo, peb yuav tsum hloov peb lub siab, peb tso kev ua phem ua txhaum tseg, ces peb los raws Huab Tais Yes Xus. Peb coj lub neej tshiab nyob rau hauv Tswv Ntuj. Peb coj txoj kev thaj yeeb mus raug luag lwm tus, peb yuav koom nrog Leej Pleev ua tib lub siab, thiab peb coj zeej tsoom neeg sawv daws, los koom suab cav txog peb tus Huab Tais Tswv Ntuj lub npe. Vim peb tus Huab Tais cawm neeg los txog lawm, nws yuav yaug peb tej kev phem kev txhaum, nws yuav ntxuav peb lub siab kom rov ntshiab huv tuaj, ces peb thiaj yuav tau koom nrog nws nyob ua ke.
Kwv tij sawv daws, thov kom Tswv Ntuj nrog nej nyob thiab foom koob hmoov pub rau nej sawv daws, kom nej tau tsib kev kaj siab lug mog. 

Tus sau : XH. Xyooj Tuam Lis, Zoo Tswv Zov Yaj