Tus kab mob ntawm kev phem

Tus kab mob ntawm kev phem.

The Parasite of Evil

Peb hais txog Mas Tais ntawv Moo Zoo zaj 13, yog hais txog nplej thiab nroj tsuag. Yog thawj txoj hauj lwm uas muaj ntau yam tseem ceeb txog Yes Xus thiab tas txhia yam no yog tus qauv ntawm kev qhia. Yes Xus tsis qhia xws li qhia kev ntseeg nyob hauv tsev kawm ntawv, nws qhia los ntawm cov hauj lwm nws ua. Cov lus ua piv txwv kheev kheev hloov tej yam tshwm sim ntawm taub hau los ua ko tw. Cov ua ntej los ua cov lawv qab. Lawv muab peb txoj kev cia siab tig rov qab, lawv ua kom peb rov xav dua tshiab thiab pib tej zaj tswv yim nyuab. 

Niaj hnub no peb ntsib ntau yam teeb meem, tab sis kuv xav hais txog ib yam xwb. Vim nws zoo heev rau fab Tswv Ntuj thiab fab ntsuj plig. Lo lus piv txwv los yog lus txhais nto npe hais txog nplej thiab nplej dev. Tej zaum peb yuav hu tias mog thiab nroj tsuag, peb yuav saib thiab nco cia, vim nov yog qhov pib ntawm zaj no.

Tswv Ntuj lub ceeb tsheej yog zoo li ib tug neeg tseb nplej rau nws daim liaj. Thaum sawv daws tsaug zog tas lawm, muaj yeeb ncuab tuaj nyiag tseb nroj rau nws thaj nplej. Thaum nplej txhawv, cov nroj kuj txhawv thiab. Tus tseb nplej uas peb hais txog no, yog Tswv Ntuj. Tswv Ntuj tseb dab tsi ne ? Nws tseb cov mog ntawm ntuj ceeb tsheej, yog txoj kev ntseeg.   

Peb sim xav txog Yes Xus cov hwj huam yees ntxwv uas nws tau ua nyob hauv ntiaj teb no seb, nco txog lub Koom Txoos, nco txog cov Leej Ntshiab, nco txog kev ntshiab huv hauv txhua hnub. Ntawd yog cov coob nplej los cov noob mog uas zoo thiab tseb mus lawm. Tab sis thaum sawv daws pw tas, mas kev phem tuaj xyaw ntsiag ntsiag yam tsis muaj leej twg paub. Peb nqis tes ua, tab sis ntau zaus muaj qee yam tshwm sim tom qab peb ua ntsiag ntsiag peb tsis paub. Nws yog qhov ua zais ntshis thaum lub caij sawv daws tab tom pw tsaug zog. Qhov no yog qhov ua lub cim tsis zoo nyob hauv Ntawv Ntshiab, yog kev tshwm sim tsis zoo. Nws yog qhia txog kev tsis nco qab ras txog nyob hauv fab ntsuj plig. Ho rov xav txog 3 tug Thwj Tim pw tsaug zog nyob hauv lub vaj Kes Ntxes Mas Nis. Thaum Yes Xus tab tom thov Ntuj, hos lawv pw tsaug zog. Sim xav txog Das Vis pw saum ru tsev ua ntej xwv txheej yuav tshwm sim, kev pw yog hais txog kev tsis quav ntsej txog dab tsi nyob hauv fab ntsuj plig. Thaum lawv tab tom pw tsaug zog, mas kev phem nkag los hauv lub Koom Txoos, nkag los rau hauv cov Leej Ntshiab thiab lwm yam. Vim li ntawd, thaum nplej txhawv lawm, ces cov nroj kuj txhawv thiab. 

Nov yog thawj yam ua kom kuv xav tias ; peb cia siab txog kev piam sij thiab kev phem ntau dua, txawm tias peb pom tej yam zoo zoo tshwm sim nyob hauv ntuj ceeb tsheej. Nyob hauv lub Koom Txoos thiab txhua tiam neeg nws yeej zoo li ntawd. Nyob hauv Vaj Qhia thiab cov thawj coj uas nto npe, pib txij li thaum muaj kev nyiag noj nyiaj, kev ua txhaum thiab kev puas tsuaj nyob rawv hauv cov neeg ntseeg lub neej. 

Tej ntawd peb cia siab thiab vam khom tau li cas ? Vim muaj yeeb ncuab nyob hauv tej chaw ua hauj lwm thiab nyob qhov txhia chaw. Ntawd yog lo lus txhiaj txhais uas ib txwm hais tseg. 

Nyob hauv lo lus txhiaj txhais yog hais txog tus tseb nplej thiab tus yeeb ncuab, los tej zaum kuj yog cov neeg sib tw ua liaj ua teb. Txawm li cas kuj xij, Ntawv Ntshiab hais txog lub zog ntawm fab ntsuj plig uas tsaus ntuj nti thiab rhuav tshem, nws yog qhov tiv thaiv Tswv Ntuj lub hom phiaj. Tus ntsuj plig dub raws nraim peb thiab khav theeb heev zuj zus. Thaum tus yeeb ncuab ua li no lawm, mas zoo li nws txhob txwm tseb nroj xyaw cov nplej los cov mog uas Tswv Ntuj tseb ntag. Thaum cov nplej los cov mog loj hlob zoo tuaj, mas cov nroj tsuag tuaj laum, ces tsis yog tias koj muaj ib thaj nplej uas muaj nroj tsuag nyob ntawm ib sab. Nws tsis yog li ntawd, vim cov nroj tsuag thiab cov nplej loj hlob tuaj ua ke. Cov nroj tsuag nyob ua ke xyaw cov nplej, ces pom tias yog ib qho phem kawg. Yog koj xav thiab ua tib zoo ntsia nyob hauv txoj kev ua ntxiv mus, mas koj yuav pom muaj cov tub zog hais tias : 

“Koj puas xav kom peb muab cov nroj ntawd rho pov tseg ?” 

Tus tswv yuav teb tias : “Txhob rho, yog koj rho mas koj yuav rho tau tsob nplej nrog thiab.” Txhua tus muaj ntsuj plig nyob tob heev, kev phem laum rawv neeg thiab kev phem tsis muaj kev zoo txuam, yog kev nyiag nyob hauv tej yam zoo thiab nws tsis muaj qhov zoo nyob hauv nws tus kheej.

Kuv yuav muab ua ib qho piv txwv, piv txwv li koj tus hniav raug kab noj, nws muaj dab tsi tsis zoo nyob hauv lub qhov kab noj ntawd ? Nws yog kev nyiag noj yam zoo zoo ntawm koj tus kaus hniav, uas yog los ntawm tus kab phem. Thaum kaus hniav to qhov lawm, ces zoo li lub qhov nyiag noj nyob ntawd ntag. Txhais tias kev phem muaj nyob rawv, thiab nov yog tus kab mob ntawm kev zoo.

Ib qhov ntxiv, nws tsis yog tias ntawm qhov zoo yeej muaj qhov phem, nws tsis yog li ntawd. Kev phem nws yeej ib txwm muaj xyaw kev zoo, kom tau nyiag noj kev zoo. Ib yam li txhua yam nyob hauv koj lub cev, nws zoo txhij zoo txhua, tab sis tus kab mob los rhuav tshem, kab mob noj tej yam zoo zoo hauv koj lub cev. Hais txog qhov yuav tshem kev phem los sis tus kab mob phem, nws tsis yog ib qho yooj yim kiag li. 

Koj yuav pom tias yog ua cas ho zoo li ntawd ? Koj puas yog ib tug kws kho mob uas muaj peev xwm thiab ntsia pom lub qhov hniav kab noj, ces xav tias cia koj muab rho tawm kiag. Yog koj xav daws teeb meem hais txog kab noj kaus hniav, mas koj yuav muab siab rau txuag thiab xyuam xim tiag tiag. Koj yuav tuav xam nrog cov kws kho mob. Ib yam li koj mob qog nqaij hlav los yog Cancer hauv koj lub cev, ces nws tab tom txo noj koj lub zog. Koj yuav muab tshem tawm mus nyob sab nraud, nyob hauv cov tsev teev hawm nyiag noj nyiaj, cov tsev teev Ntuj nyiag noj nyiaj, cov neeg uas nyiag noj nyiaj tsis tau. 

Kev nyiag noj puas yog kev phem ? Yog kawg, nws yog kev phem heev. 

Kev nyiag noj nyiaj hauv tsev teev Ntuj, zoo li tus cab los tus kab mob nyob hauv tsev teev Ntuj. Yog koj xav muab tus cab ntawd rho tawm mus, koj yuav xyuam xim kom cov neeg ntseeg txhob muaj ib tug raug mob. Qhov no yog ib qho kev kawm uas kuv xav tias cov Txiv Plig tshiab yuav tau kawm, vim qhov no yog qhov cov Txiv Plig tshiab kheev kheev yuam kev. Tab sis tus neeg ntseeg uas nws ntse, nws yuav hais tias : koj tsis tuaj yeem xuas tes dua thiab muab rub tawm los, koj yuav xyuam xim txog kev thau qhov phem tawm mus tsis txhob pub raug qhov zoo.

Vim li ntawd, tus tswv thiaj hais tias : “Yog koj rho nroj tsuag tawm mus, mas ceev faj tsam koj rho tau nplej mus thiab.” Thov sawv daws nco ntsoov txog qhov ntawd, vim koj xav tias yog koj rho cov nroj pov tseg lawm, ces cov nplej yuav tau zoo loj hlob, tab sis txog qhov kawg tsis yog zoo li ntawd. 

Tam sim no yuav mloog lo lus piv txwv uas cov yaj saub hais tias : 

“Cia nws nyob thiab loj hlob mus txog thaum sau los ua ke.” 

Thaum txog lub caij sau qoob, mas yuav hais rau cov tub zog tias : xub muab cov nroj hlais los pav thiab muab hlawv pov tseg. Sau cov qoob loo mus rau hauv txhab. Qhov uas ua rau sawv daws pom, mas yog sib koom tes rhuav tshem kev phem tawm mus. Thiab peb yuav xyuam xim rau tas txhia yam uas peb ua. 

Qhov kawg tej kev phem ntawd yuav rhuav tshem tau tsuas yog Tswv Ntuj tib leeg xwb. Tswv Ntuj thiaj yog tus xyuam xim thiab muaj peev xwm xaiv cov nplej tawm ntawm cov nroj tsuag. Qee zaus peb ntsib kev phem kev tsis zoo, peb yuav tau ua tiag nyiaj thiab cia Tswv Ntuj ua hauj lwm nyob hauv peb. Tej zaum Tswv Ntuj kuj yuav nthuav koj phau Ntawv Ntshiab tawm los, coj koj mus rau Mas Tais ntawv Moo Zoo zaj 13 thiab nrhiav lo lus piv txwv no los xav tswv yim. Kom koj paub txog kev tiv nrog kev phem, kev ua txhaum nyob hauv koj, yog qhov Tswv Ntuj qhia koj nyob ntawm no thiab Tswv Ntuj foom hmoov zoo rau  koj !