Yes Xus kho tau peb (The healing power of Christ)

Yes Xus kho tau peb (The healing power of Christ)

Ntawv Moo Zoo uas peb tab tom xav txog nyob hauv hnub no, yog zaj hais txog tus Xas Mas Lias siab zoo. Vim txhua zaj lus piv txwv ntawm Yes Xus yog cov lus qhia kev ncaj ncees uas zoo rau peb kawm. Tab sis qhov tob tshaj ntawd nyob hauv zaj no, yog hais txog kuv. Vim Yes Xus yog tus piv txwv zoo nyob hauv kuv lub neej uas muaj kev ncaj ncees. Lwm qhov chaw uas yuav nrhiav tau lub tswv yim no, yog nyob hauv lub tsev teev Ntuj Chartres thiab nyob ntawm ib sab qhov rais uas ci ntsa nyob hauv lub nroog Chartres. Cov ntsiab lus hauv zaj no yog nyob hauv lub caij nplooj ntoos zeeg thiab yog zaj hais txog tus Xas Mas Lias siab zoo. Thov hais dua ib zaug tias zaj no yog los ntawm lub Koom Txoos cov poj yawm txwv koob. Ob zaj no yog qhia kom neeg rov sib pom, yam li kom kuv ua rau koj pom. Yog tus cag ntawm kev sib raug zoo ntawm Christin thiab tib neeg uas poob rau kev txhaum, ces peb yuav los saib ib nqe zuj zus. Thov saib thawj kab lus nyob hauv zaj piv txwv no, kom peb nco ntsoov tias nyob hauv cov yaj saub, cov kws piav, cov kws paj huam los sis paj lug, mas thawj kab muaj cov ntsiab lus tseem ceeb kawg. Peb los mloog zaj no : “Muaj ib tug txiv neej nqes los ntawm lub nroog Yes Lus Xas Les thiab nws yuav mus rau lub nroog Yes Lis Kos.
Tsis hais leej twg kuj xij, yog tau mus dua ntawm thaj chaw ntshiab ntawd, nws yuav paub zoo txog zaj no tias muaj tseeb tiag.  
Nyob thaj tsam ntawd muaj cov ncov roob siab, koj yuav taug kev mus txog lub nroog Yes Lis Kos. Koj yuav pom tias lub nroog Yes Lis Kos yog ib lub nroog uas nyob qis tshaj plaws hauv ntiaj teb no, vim dej hiav txwv yog qhov chaw ntsuas siab qis nyob hauv ntiaj teb. Yes Lus Xas Les ib txwm txuas nrog Ntuj Ceeb Tsheej, thaum peb xav txog Yes Lus Xas Les nyob saum ceeb tsheej hauv peb txoj kev cawm, mas zoo li yog qhov chaw Tswv Ntuj nyob. Li ntawd, Yes Lus Xas Les thiaj txhais tau tias yog qhov chaw siab li Ntuj Ceeb Tsheej. Lub nroog Yes Lis Kos nyob ntawm cov roob Yes Lus Xas Les, yog lub nroog muaj txhaum. Kom peb xav txog thaum cov His Xas Lais tsiv los nyob hauv lub teb chaws Tswv Ntuj cog lus, mas lawv hla tus niam dej Yos Las Das thiab thawj qhov chaw lawv yuav nyob yog lub nroog Yes Lis Kos. Nyob hauv lub nroog Yes Lis Kos tej kab lis kev cai, lawv zoo siab hom khaj, lawv tshuab puab tshuab xyu, hu nkauj raws tus phab ntsa lub nroog Yes Lis Kos. Ces zoo li lawv tab tom ntaus kom yeej lub nroog uas muaj kev txhaum. Zoo li Mas Kos ntawv Moo Zoo hais tias : tus neeg dig muag nws zaum nyob ntawm sab phab ntsa nroog Yes Lis Kos, peb txoj kev dig muag txuas nrog lub nroog muaj txhaum no. Muaj ib tug txiv neej nqes ntawm lub nroog Yes Lus Xas Les los, thiab nws tab tom mus rau lub nroog Yes Lis Kos, qhov ntawd yog hais txog peb sawv daws. Yog ib zeej tsoom neeg uas tab tom poob mus rau kev txhaum, poob ntawm qhov chaw ntshiab uas yog Tswv Ntuj cov tub ki mus rau qhov chaw muaj txhaum. Tam sim no peb muaj tus yawm sij uas yuav pab kom peb to taub txog txhua yam nyob hauv zaj no. 
Thaum tus txiv neej ntawd tab tom taug kev, mas nws raug tub sab lwg thiab ntaus nws, ces nws vau hauv av. Zaj no yog ib zaj tseeb tiag lub caij Yes Xus ua neej nyob. Kev taug kev lub caij ntawd kuj tsis yooj yim, vim tsis muaj kev tsheb zoo zoo. Muaj toj roob thiab muaj xuab zeb txaus ntshai kawg. Hnov luag tej hais tias muaj tub sab lwg neeg nyob ntawm tej tog kev tas li, nyob ntawm txoj kev Yes Lus Xas Les mus rau lub nroog Yes Lis Kos. Muaj tub sab tub nyiag thiab lwm yam. Peb los saib nyob hauv fab ntsuj plig, kev txhaum ua dab tsi rau peb ? Nws lwg peb lub meej mom, lwg peb lub dag zog ntawm fab ntsuj plig thiab dag zog ntawm lub tswv yim. Ces thiaj ua rau peb lub cev muaj kev sib tawg, kev tsis ncaj ncees thiaj tshwm sim nyob hauv peb. 
Txhais tias peb zoo tsis tas, peb tsis xis nyob vim peb yog neeg muaj txhaum. Peb ntsia tsis pom yam zoo thiab qhov yog, peb tsis xav txog tej yam zoo zoo, peb lub tswv yim raug tsim txom, tas txhua yam kev phem sib ntaus nyob hauv peb, ua rau peb lub siab nyob tsis tus. 
Koj puas tseem mloog kuv hais na tus phooj ywg muaj txhaum ? Kev txhaum lwg peb txhua yam, nws ua puas txog peb txhua tus. Kuv xav tias yog qhov tseem ceeb ntawm tus neeg nyob hauv Ntawv Ntshiab uas yuav hloov thiab tiv peb tej kab lis kev cai zim txwv no, kom ib tug neeg muaj nqis tuaj. Tsis hais kuv yuav hais dab tsi kuj yog tas, thov kom tau hnov kuv lub suab xwb.”
Tam sim no tus neeg nyob hauv Ntawv Ntshiab paub tias raug thuam, raug lwg thaum tab tom taug kev ntawm Yes Lus Xas Les mus rau lub nroog Yes Lis Kos. Tub sab lwg nws, ntaus nws thiab tso nws vau hauv av, ces tus tub sab khiav lawm. Muaj ib tug Leej Choj los pom, nws tsis quav ntsej, nws hla mus lawm. Ib me ntsis kuj muaj ib tug Les Vis los pom, tab sis nws kuj hla mus lawm thiab. Qhov no ua kom peb ntsia pom txog lawv tus yam ntxwv thiab kev coj. Vim thaum lawv pom muaj neeg raug ntaus, raug lwg thiab raug thuam, mas lawv tsis tau cev tes pab. Lawv xav tias lawv yog neeg dawb huv lawv tsis xav pab cov neeg muaj txhaum. Kev txhaum cawm tsis tau lawv. Tus Xas Mas Lias siab zoo nws los pom tus neeg ntawd raug tub sab lwg thiab raug ntaus sab, mas nws khuv leej. Peb paub lawm tias cov neeg thaum Yes Xus tseem ua neej nyob lawv kuj paub txog zaj no. Lawv saib tus Xas Mas Lias yog ib tug neeg muaj txhaum, yog neeg His Xas Lais tsuam txoov uas yuav ib tug poj niam As Xis Lias.
Cov His Xas Lais coj nruj saib li cas los tus Xas Mas Lias yeej yog neeg muaj txhaum thiab yog neeg tsis zoo. Tab sis tus Xas Mas Lias thiaj yog tus siab zoo uas pab tus neeg raug ntaus raug lwg. Peb tab tom tham txog kev piam sij ntawm tib neeg thiab tam sim no peb tab tom hais txog Yes Xus. Txoj kev ntseeg uas tsis ncaj ncees nws yuav daws teeb meem tsis tau. Tab sis tus Xas Mas Lias uas luag saib nws yog neeg txhaum, nws yog tus khuv leej. Peb xav txog lub nroog Nas Xas Les, yam zoo zoo tawm ntawm Nas Xas Les tuaj tau li cas ? Yes Xus yog tus neeg uas sawv daws ua xyem xyav nyob hauv nruab siab, tab sis Yes Xus yog tus muaj kev khuv leej thiab hlub neeg. 
Vaj Qhia Fas Ntshis Kus kheev kheev hais tias : “Kev khuv leej” ntawm Tswv Ntuj, kev khuv leej ntawm Yes Xus yog qhov khuv xim uas muaj rau ib zeej tsoom neeg, tab sis poob nyob hauv kev txhaum. Thaum peb tab tom raug mob thiab pw nyob ntawm ntug kev, Yes Xus tau los ze peb thiab nws hliv roj los ntxuav peb cov qhov txhab. Yes Xus hais tias peb sawv daws yog “Soter”, Soter txhais tias tus kho mob. Lus Latin txhais tias “tus cawm kom dim”. Kuv kheev kheev hais lo lus tias “kev cawm” ntawm peb los ntawm salvator txhais tias : “tus cawm kom dim”. Yog hais txog lub tshuaj txws kho neeg. Yes Xus yog tus kho neeg thiab nws hliv roj los ntxuav peb. Qhov ntawd puas yog ib qho peb xav tsis txog ? Kuv tsis tau xav li ntawd, nws sawv nyob ntawm no ua lub cim ntawm lub Koom Txoos. Cov roj uas siv yog zoo li lub Cim Ntxuav. Cov roj uas siv nyob hauv cov Cim Ntshiab, yog roj ua lub Cim Pleev cov neeg mob. Cov kua txiv cawv tam lub Cim Yug. Yes Xus kho peb zoo li cas ? Peb sawv daws puav leej ntog hauv av, peb yog neeg cov me nyuam uas poob hauv kev txhaum, peb zoo li cov hmoov av raug w nyob ntawm tej ntug kev. Tej kev teev hawm uas tsis ncaj ncees nws pab tsis tau peb. Tab sis Yes Xus pab tau peb, nws coj peb mus txog txoj kev teev hawm uas tseeb tiag. Peb pom tau nyob hauv cov Cim Ntshiab hauv lub Koom Txoos. Lub Koom Txoos kuj muaj cov neeg tsis sib haum xeeb nyob pus nkaus, ib yam li koj thiab kuv. 
Txawm li cas kuj xij, ntau tiam neeg dhau los lub Koom Txoos yog qhov tseem ceeb ntawm kev qhuab qhia. Lub Koom Txoos yog kev cawm thiab peb pom txog tej ntawd. 
Yes Xus tau hliv tshuaj ntxuav peb cov qhov txhab los ntawm lub cim nco cia, peb xav tias nws puag tus neeg mob nce saum luj nrob qaum, nws coj tus neeg mob mus so hauv lub tsev txais qhua, nws tu tus neeg mob. Tam sim no tsuas yog lub cim zoo nkauj ntawm lub Koom Txoos xwb. Vaj Qhia muab lub Koom Txoos thiab lub tsev txais qhua los ua piv txwv tias zoo nkauj npaum cas. Puas nco qab lawm tias ntau xyoo ua ntej no, muaj neeg qaug zog luj luas tawm los ntawm tshav rog. Ntawd yog qhov tseem nyob hauv peb zim txwv no puas yog ? Tab sis cov neeg qaug zog luj luas ntawd lawv tau mus hauv lub Koom Txoos lub tsev kho mob, lawv tau txais kev saib xyuas zoo heev los ntawm lub cim ntshiab. Peb tab tom hais txog Yes Xus uas nws yog tus txhiv, koj puas paub tias tus txhiv yog hais txog dab tsi ? Lo lus txhiv yog hais txog kev xuas nyiaj yuav ib tug neeg rov los. Ib tug neeg uas raug tub sab nyiag mus lawm, thiab koj xuas nyiaj yuav nws rov los, los yog txhiv rov los. Kev txhiv yog dab tsi ? Yes Xus tau txhiv peb ntawm peb cov txim txhaum, Yes Xus them peb cov nuj nqis uas peb tsis tuaj yeem them tau. Yes Xus them nqi txhiv peb nyob saum Ntoo Cuam, kom peb tau txais kev cawm. Yes Xus hais tias : ib tug nyob hauv 3 tug xws li tus yaj saub, tus Les Vis thiab tus Xas Mas Lias, leej twg yog tus txheeb ze tus txiv neej uas raug tub sab lwg thiab ntaus ? Tus txheeb ze yog tus muaj kev khuv leej. 
Yes Xus hais rau nws tias : “Koj mus, koj yuav ua li ntawd thiab”. 
Tam sim no peb pom lub ntsiab lus nyob hauv zaj piv txwv no lawm. Peb paub txog qhov Yes Xus kho tau ib zeej tsoom neeg uas muaj txhaum thiab qhov ntawd kuj yog peb cov hauj lwm. Peb yuav tig mus saib ib ncig ntawm peb, kom peb paub tias leej twg yog tus neeg pw, leej twg yog tus raug mob nyob ntawm ntug kev. Peb yuav ua tus yawm sij coj cov neeg ntawd los cuag lub Cim Ntshiab, kom tau coj lawv los hauv lub Koom Txoos. Coj lawv mus txog lub zog kho mob ntawm Yes Xus. Peb paub tias Yes Xus yog leej twg ? Peb paub tias peb yug los ua dab tsi thiab peb tsim nyog ua dab tsi. Peb thov Tswv Ntuj foom hmoov zoo pub rau koj !