Zaj nyeem hnub tim 1 lub 11 hlis 2023 (Daily reflection)

ZAJ NYEEM HNUB TIM 1 LUB 11 HLIS, HNUB HWM TSOOM LEEJ NTSHIAB

COV LUS NYOB HAUV MAS TAIS NTAWV MOO ZOO (MT 5: 1-12A)

Cov kwv tij Hmoob, hnub no tas lub Koom Txoos thoob qab ntuj yuav ua hmoov hwm tsoom Leej Ntshiab.

Tsoom Leej Ntshiab yog yog dab tsi?

Kwv tij, tsoom Leej Ntshiab yog cov neeg uas thaum lawv tseem ua neej nyob lawv yog neeg zoo, yog neeg ntshiab huv, lawv tau ua txoj hauj lwm tseem ceeb los pab lub Koom Txoos, pab luag tej. Thaum lawv tuag lawm, mas lawv tseem muaj peev xwm ua tej yam hwj huam pab cov neeg nyob ntiaj teb no thiab. Yog zoo li Tswv Ntuj lees lawv ua ib tug neeg siab ntshiab nyob ntawm Tswv Ntuj lub Ceeb Tsheej. 

Kwv tij, cov neeg peb hais tias yog tsoom Leej Ntshiab, mas thaum lawv tseem ua neej nyob ntiaj teb no, lawv kuj muaj txhaum xws li peb thiab, tab sis vim lawv ua raws li Huab Tais Yes Xus cov lus qhia, mas lawv thiaj yoog tau tus kheej kom ua cov hauj lwm xis Tswv Ntuj siab nyiam. Yog li mas lawv thiaj yog tus piv xwv zoo rau peb xyaum raws.

Hnub no lub Koom Txoos thiaj cev Huab Tais Yes Xus cov lus qhia txog cov tau txoj hmoov zoo rau sawv daws tau coj mus xav thiab ntuas siab tias yuav ua li cas peb thiaj yuav yog tus tau txoj hmoov zoo.

Huab Tais Yes Xus hais tias tus tau txoj hmoov zoo yog tus pluag hauv nruab siab los yog nws muaj lub siab pluag Tswv Ntuj Lo Lus, mas nws thiaj kub siab khaws Tswv Ntuj Lo Lus; tus tau txoj hmoov zoo yog tus siab zoo mas thiaj yuav muaj neeg hlub thiab nyiam nws; tus tau txoj hmoov zoo yog tus quaj ntsuag niaj hnub hu txog Tswv Ntuj mas Tswv Ntuj thiaj yuav mloog nws lub suab; tus tau txoj hmoov zoo yog tus tshaib thiab nqhis txoj kev ncaj, nws saib kev ncaj yog qhov loj ces nws tsis ua neeg nkhaus, nws ruaj nreb rau kev ncaj mus li; tus tau txoj hmoov zoo yog tus hlub luag tej mas nws thiaj rau siab ua cov hauj lwm tsim koob hmoov, nws yog tus tau tsim kev thaj yeeb, ces Tswv Ntuj kuj yuav hlub nws thiab; tus tau txoj hmoov zoo yog tus siab huv mas nyob hauv nws nruab siab tsuas xav txog yam ntshiab huv ces nws lub siab thiaj kaj mus li; tus tau txoj hmoov zoo mas nws tso siab rau Tswv Ntuj, nws muaj lub siab ntseeg txog Huab Tais Yes Xus.

Kwv tij Hmoob, peb txhua tus tau txais lub Cim Ntxuav, mas peb yeej tau xaiv ib tug Leej Ntshiab lub npe los tuav peb. Yog li hnub no xav kom peb sawv daws tau mus kawm peb tus Leej Ntshiab lub neej, peb xyaum ntawm peb tus Leej Ntshiab, peb thov peb tus Leej Ntshiab pab thov Tswv Ntuj lub txiaj ntsim rau peb kom peb ua tau li Huab Tais Yes Xus cov lus qhia, mas peb thiaj yuav tau txoj hmoov zoo nyob ntiaj teb no thiab muaj ib hnub peb thiaj tau mus koom nrog tsoom Leej Ntshiab cav txog Tswv Ntuj lub koob meej ua ke nyob saum Ntuj Ceeb Tsheej.

Nyob zoo sawv daws.