Zaj nyeem hnub tim 1 lub 12 hlis 2023 (Daily reflection)

ZAJ NYEEM HNUB TIM 1 LUB 12 HLIS, HNUB RAU LUB LIS PIAM 34 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 21: 29-33)

Kwv tij Hmoob sawv daws, Huab Tais Yes Xus hais tias thaum nej pom tej ntawd tshwm sim tuaj, nej yuav to taub tias Tswv Ntuj lub Ceeb Tsheej los yuav txog.
Kwv tij, Huab Tais Yes Xus hais txog dab tsi tshwm tuaj?
Yog peb saib nqes lus ua ntej no mas yog Huab Tais Yes Xus hais txog lub Tuam Tsev Teev Ntuj nyob Yes Lus Xas Les yuav raug rhuav, yuav muaj neeg hais kom cov thwj tim yuam kev. Peb paub tias muaj ib zaug Huab Tais Yes Xus hais rau cov Yus Das tias yog lawv rhuav lub Tuam Tsev Teev Ntuj mas peb hnub Huab Tais Yes Xus tsa tau lub Tuam Tsev Teev Ntuj. Yog li thaum Huab Tais Yes Xus hais txog lub Tuam Tsev Teev Ntuj yuav raug rhuav, mas kuj yog Huab Tais Yes Xus tau hais txog hnub luag yuav tsim txom thiab muab Huab Tais Yes Xus tua. Tab sis Huab Tais Yes Xus yuav sawv rov los, mas Huab Tais Yes Xus thiaj hais tias thaum lawv pom tsob ntoo txiv cawv uas nyob hauv lub caij ntuj qhua mas tej nplooj zeeg tas thiab sawv qhuav ceg zoo li ib tsob ntoo tuag, tab sis txog caij ntuj sov mas rov hlav nplooj ntsuab ziab mos nyoos. Cov thwj tim twb paub li ntawd lawm, lawv yuav tau tso siab tias Huab Tais Yes Xus tuag tas, nws yuav sawv rov los, nws yuav coj Tswv Ntuj lub Ceeb Tsheej tuaj txawb hauv sawv daws, yog sawv daws yuav txais kev zoo siab thiab nyob xyiv fab mus li. Nyob zoo sawv daws.