Zaj nyeem hnub tim 1 lub 6 hlis 2023 (Daily reflection)

ZAJ NYEEM HNUB TIM 1 LUB 6 HLI, HNUB NCO TXOG LEEJ NTSHIAB YUS TIS NUS
COV LUS NYOB HAUV MAS KOS NTAWV MOO ZOO (MK 10: 46-52)

Kwv tij, tus dig muag Npas Tis Mes hnov luag tej ob cag cav txog Huab Tais Yes Xus tias nws muaj hwj huam kho tau cov neeg mob thiab dig muag, ces muaj ib hnub, nws hnov tias Huab Tais Yes Xus hla kev nyob ntawm qhov chaw nws niaj hnub tuaj zaum thov khawv, ces nws hu nrov nrov kom Huab Tais Yes Xus khuv leej nws. Ces muaj neeg cem nws kom ua twj ywm, tab sis nws yim hu nrov dua qhub. Huab Tais Yes Xus hnov, nws thiaj hais kom cov neeg hu Npas Tis Mes los nrhiav. Lawv hais kom Npas Tis Mes mus nrhiav Yes Xus, ces Npas Tis Mes muab nws lub tsho ntev ua ntia tseg, nws maj zeeg sawv mus nrhiav Huab Tais Yes Xus.
Kwv tij, peb puas yuav ua li tus dig muag Npas Tis Mes: peb puas tos ntsoov tias muaj ib hnub peb yuav tau ntsib Huab Tais Yes Xus; thaum peb hnov tias Huab Tais Yes Xus tuaj txog lawm, peb puas muab lub tsho laim pov tseg thiab dhia mus nrhiav Huab Tais Yes Xus li Npas Tis Mes.
Peb lub tsho ntev yog peb lub qub neej, yog peb tej txhaum, yog peb tus cuj pwm tsis huv. Peb puas kam muab tso tseg, thaum Huab Tais Yes Xus hais kom peb mus cuag nws.
Hnub no Huab Tais Yes Xus hu peb kom ua xws li tus dig muag Npas Tis Mes, yog tso lub qub neej tsis huv, tso kev ua txhaum tseg, ces peb sawv kev mus thov Huab Tais Yes Xus pub txoj kev ntseeg, kev tso siab, thiab lub siab nyiam Ntuj rau peb, mas peb lub siab dig muag thiaj yuav qhib tau, peb thiaj yuav pom kev tuaj.
Nyob zoo sawv daws.