Zaj nyeem hnub tim 1 lub 8 hli 2023 (Daily reflection)1 aug vdo web

ZAJ NYEEM HNUB TIM 1 LUB 8 HLI, HNUB NCO TXOG LEEJ NTSHIAB AS FOOS XOS
COV LUS NYOB HAUV MAS TAIS NTAWV MOO ZOO (MT 13: 36-43)

Kwv tij Hmoob sawv daws, lub Moo Zoo hnub no peb hnov Huab Tais Yes Xus txhais zaj paj lug hais txog cov nroj tuaj hauv daim teb nplej. Zaj paj lug no hais tias ib tug tswv teb tawm mus tseb noob nplej rau hauv nws daim teb, tab sis thaum nws rov los tsev, mas nws tus yeeb ncuab tuaj tseb ib co noob nroj rau hauv daim teb nws nyuam qhuav tseb nplej tas ntawd. Ces cov nroj thiaj loj tuaj nrog cov nplej ua ke. Cov tub txib pom tias muaj cov nroj tuaj xyaw cov nplej, lawv xav muab cov nroj rho pov tseg, tab sis tus tswv teb tsis kheev. Nws hais tias cia tos nplej siav tso, mam sau cov nroj mus pov hlawv, ces mam sau cov nplej. Tos tus tswv tsis kheev, vim tias nws ntshai tsam lawv rho tau cov nplej.
Kwv tij, thaum peb hnov zaj paj lug no, mas tej zaus yuav muaj qee tus xav tias ua cast sis maj muab cov nroj rho ua ntej, yuav tos cov nroj tuaj laum cov nplej thiab las cas.
Cov kwv tij, nej xav li ntawd yeej yog lawm tiag, tab sis thov kom sawv daws paub tias cov nroj Huab Tais Yes Xus hais txog hauv zaj paj lug no, mas muaj tsob zoo tib yam li cov nplej.
Yog muab piv rau peb cov ua teb nplej, mas cov nroj Huab Tais Yes Xus hais txog kuj zoo li cov nplej dev. Peb yuav mem tau tias yog nplej dev mas kawg yog thaum txog caij nplej daj qab hnab xwb puas yog? Thaum tseem ua tso mas muaj tsawg tus thija yuav cais tau tias yog nplej zoo los yog nplej dev.
Cov nroj hauv zaj paj lug mas yog zoo li ntawd.
Hnub no Huab Tais Yes Xus hais tias tus tseb cov noob nplej yog nws ntag. Daim teb yog peb cov ua neeg sawv daws. Cov nplej yog cov neeg mloog Huab Tais Yes Xus, lawv ua neeg zoo xis Tswv Ntuj siab, lawv yog cov neeg siab ncaj. Cov nroj los yog cov nplej dev yog cov tsis kam txais Huab Tais Yes Xus, lawv lub siab xib rau qhov phem. Tus yeeb ncuab yog tud dab ntxias neeg.
Huab Tais Yes Xus hais tias txog lub caij kawg, nws yuav xa cov Tshiab tuaj sau cov neeg zoo cov siab ncaj mus nyob hauv Tswv Ntuj lub Ceeb Tsheej, yuav muab cov neeg phem pov hlawv hauv lub qhov hluav taws.
Kwv tij Hmoob, peb ntseeg tias yeej yuav muaj li Huab Tais Yes Xus hais tiag. Yog li mas cov kwv tij, nej kav tsij tig los yuav lub siab tshiab, ua neeg ncaj nyob ntawm Tswv Ntuj xub ntiag mog.
Nyob zoo sawv daws.