Zaj nyeem hnub tim 10 lub 10 hli 2023 (Daily reflection)

ZAJ NYEEM HNUB TIM 10 LUB 10 HLI, HNUB PEB LUB LIS PIAM 27 CAIJ NYOB NRUAB XYOO

COV LUS NYOB HAUV LUS KAS NTAWV MOO ZOO (LK 10: 38-42)

Kwv tij Hmoob sawv daws, lub Moo Zoo hauv hnub no yog ib zaj peb yuav ua tib zoo khaws coj mus xav. Ua cas Huab Tais Yes Xus thiaj yws tus poj niam kub siab ua hauj lwm npaj ub npaj no tos txais nws, tab sis ho qhuas tus poj niam tsis pab lwm tus ua hauj lwm es cia li los zaum mloog nws?

Cov kwv tij, yog muaj ib tug qhua tuaj so hauv peb tsev, peb tso dej num tseg tig los mloog nws hais nrog nws tham, los peb yuav tso nws nyob twj ywm es peb tig mus npaj ub npaj no txais nws?

Yog ib zaj zoo rau peb coj mus xav kawg!

Kwv tij, Huab Tais Yes Xus tsis yws Mas Tas vim cov hauj lwm nws ua. Tus qhua tuaj so hauv peb tsev los kuj yuav tsis yws qhov peb npaj ub npaj no tos nws.

Tab sis tos Huab Tais Yes Xus yws Mas Tas, vim tias nws ntxhov siab ntau dhau txog kev txais Huab Tais Yes Xus tuaj nyob hauv nws tsev, ces nws lub siab fab, nws tsis muaj siab mloog Huab Tais Yes Xus cov lus. Mas Tas tseem hais kom Huab Tais Yes Xus txib Mab Liab los nrog nws ua hauj lwm thiab.

Cov kwv tij, tus qhua tuaj txog peb tsev tab sis peb pheej mus ua hauj lwm tsis nrog nws tham, los peb tsis muab siab rau mloog nws hais lus; peb xav saib nws puas yuav zoo siab. Yog thaum peb hais lus, tab sis tsis muaj tus mloog, peb yuav xav li cas?

Kwv tij, nyob ntawm Tswv Ntuj, mas txawm peb yuav tab tom ua num dab tsi, los Tswv Ntuj xav kom peb txhob ua siab fab, peb tsum mloog ntsoov saib Tswv Ntuj tau hais lus dab tsi rau peb.

Nyob zoo sawv daws.