Zaj nyeem hnub tim 10 lub 11 hlis 2023 (Daily reflection)

ZAJ NYEEM HNUB TIM 10 LUB 11 HLIS, HNUB NCO TXOG LEEJ NTSHIAB VAJ QHIA LES OS TUS LOJ
COV LUS NYOB HAUV LUS KAS NTAWV MOO ZOO (LK 16: 1-8)

Kwv tij Hmoob, hnub no Huab Tais Yes Xus rov hais ib zag paj lug rau cov thwj tim mloog. Nyob hauv zaj paj lug no peb pom muaj tus tswv nyiaj thiab tus tim xyoob xam nyiaj. Tus tim xyoob xam nyiaj ua tsis ncaj rau tus tswv cov nyiaj, ces tus tswv thaij yuav muab nws rho tawm txoj hauj lwm xam nyiaj. Tus tim xyoob xav tias nws yuav ua li cas thiaj yuav tau kev pab ntawm lwm tus yog txog hnub nws raug tawm hauv tus tswv nyiaj lub tsev mus. Tus tim xyoob hu cov neeg tshuav nuj nqis ntawm tus tswv nyiaj tuaj, nws muab lawv cov nuj nqis txo. Tus tswv nyiaj pom li ntawd, nws tsis cem tab sis nws qhuas qhov tus tim xyoob ntawd tau ua.
Kwv tij, thaum peb nyeem zaj no los yog hnov zaj paj lug no, peb yuav xav twj ywm hauv siab tias ‘ua cas tus tswv nyiaj thiaj qhuas tus tim xyoob siab tsis ncaj?’
Nyob hauv cov Yus Das lub neej, tus tim xyoob xam nyiaj nws tsis tau tus nqi zog ntawm tus tswv, qhov nws yuav tau mas yog cov paj nws khaws tau ntawm cov tuaj txais tus tswv nyiaj li nyiaj los cuab tam xwb. 
Thaum tus tim xyoob txiav tias nws yuav txo tus nqi ntawm cov tuaj luab tus tswv li nyiaj, mas txhais tias tus tim xyoob yeem tsis yuav nws tus nqi zog, nws yeem khuv leej cov tshuav nqi kom muaj ib hnub lawv ho yuav khuv leej nws.
Tus tswv nyiaj pom zoo li ntawd, mas tus tswv nyiaj thiaj qhuas tus tim xyoob ntawd.
Kwv tij Hmoob, nyob hauv zaj no tus tswv nyiaj yog Tswv Ntuj, tus tim xyoob yog peb sawv daws. Tswv Ntuj pub nws lub txiaj ntsim, pub rab peev xwm, pub kev txawj ntse huv tib si rau peb, thiab Tswv Ntuj kuj pub txoj sia rau peb. Tej no tsis yog peb tug tiam sis yog Tswv Ntuj tug, peb yuav niaj lis piam hais qhia rau Tswv Ntuj tias tas ib lub lis piam peb tau coj mus siv li cas, peb puas tau coj mus ceev kom tawg paj txi tau txiv los tsis tau. Peb sau peb tus nqi zog ntawm cov paj, los peb ua tsis ncaj hnyiag yam yog Tswv Ntuj tug los ua peb tug.
Tswv Ntuj paub ntsoov tias nws muab npaum li cas rau koj, muab npaum li cas rau kuv, pub npaum li cas rau peb sawv daws.
Yog peb ua tsis ncaj rau yam Tswv Ntuj pub rau peb, mas Tswv Ntuj kuj yuav thau ntawm peb coj mus pub rau lwm tus, zoo li hauv zaj paj lug uas tus tswv nyiaj yuav thau txoj hauj lwm xam nyiaj ntawm tus tim xyoob mus.
Cov kwv tij, Tswv Ntuj tsis nyiam cia peb ua tsis ncaj, qhov Tswv Ntuj nyiam yog kom peb txawj hlub cov neeg txom nyem, kom peb txawj coj yam Tswv Ntuj pub rau peb mus ua kom txi txiv.
Nyob zoo sawv daws.