Zaj nyeem hnub tim 10 lub 6 hlis 2023 (Daily reflection)

ZAJ NYEEM HNUB TIM 10 LUB 6 HLIS, HNUB XYA LUB LIS PIAM 9 CAIJ NYOB NRUAB XYOO
COV LUS NYOB HAUV MAS KOS NTAWV MOO ZOO (MK 12: 38-44)

Cov kwv tij, lo lus peb yuav coj los nthuav hauv hnub no yog Huab Tais Yes Xus lo lus hais rau cov thwj tim tias “Tus poj niam no pluag, tab sis nws tso nyiaj ntau dua cov ua tau tso nyiaj rau hauv lub txhab ceev nyiaj.” (MK 12: 43)
Tus poj ntsuam no nws tsuas tso nyiaj yog 2 lub txiaj toog me me xwb, ua cas Huab Tais Yes Xus thiaj hais tias nws tso ntau dua sawv daws. Nws puas yuav tso ntau dua cov neeg tso 3 lub txiaj, 4 lub los 1 choj nyiaj.
Tos Huab Tais Yes Xus hais tias nws tso nyiaj ntau tshaj sawv daws vim tias nws rho tas nrho cov nyiaj nws muaj los tso rau hauv lub txhab ceev nyiaj, tsis thooj li cov neeg nplua nuj uas lawv rho lawv tej nyiaj seem los tso hauv lub txhab ceev nyiaj xwb.
Zaj no Huab Tais Yes Xus xav qhia peb kom txawj pub yam peb muaj rau lwm tus, tsis yog pub ntau los tsawg, tiam sis Huab Tais Yes Xus xav kom thaum peb pub rau lwm tus, peb tsum pub tawm hauv nruab siab los vim peb muaj lub siab nyiam Tswv Ntuj thiab hlub lwm tus tiag tiag.
Kwv tij, nyob hauv teb chaws Mev Xis Kos, muaj ib tug txiv neej txom txom nyem mus koom lub txoos teev Ntuj, thaum txog lub sij hawm cev nyiaj rau lub tsev teev Ntuj, nws qhib nws lub hnab nyiaj muaj 2 daim nyiaj ntawv yog daim tsib txhiab thiab daim kaum txhiab. Nws thau daim kaum txhiab coj los tso rau hauv lub hnab ceev nyiaj, nws tseg daim tsib txhiab cia.
Tus txiv neej no tsis yws rau Tswv Ntuj txog nws lub neej txom nyem, qhov nws ua yog: ua Tswv Ntuj tsaug thiab cav lus zoo txog Tswv Ntuj.
Kwv tij, hnub no Huab Tais Yes Xus xav kom peb ua zoo li tus poj ntsuam hauv lub Moo Zoo, thiab ua li tus txiv neej hauv lub teb chaws Mev Xis Kos tau ua.
Nyob zoo sawv daws.