Zaj nyeem hnub tim 10 lub 8 hli 2023 (Daily reflection)1 aug vdo web

ZAJ NYEEM HNUB TIM 10 LUB 8 HLI, HNUB UA HMOOV LEEJ NTSHIAB TUB TSWB HWB LOS LEES
COV LUS NYOB HAUV ZAM NTAWV MOO ZOO (Z 12: 24-26)

Kwv tij Hmoob, hnub no lub Koom Txoos ua hmoov Leej Ntshiab Tub Tsob Hwb Los Lees. Los Lees yog tus Leej Ntshiab pov hwm cov Tub Tsob Hwb. Los Lees lub neej zoo ua ib tug lw rau cov tub ntxhais hluas taug. Los Lees yog Vaj Qhia ib tug Tub Tsob Hwb nyob hauv tiam tim peb. 
Thaum ntawd mas lub Koom Txoos ntsib kev iab hiam ntawm cov nom Los Mas. Los Lees tau muab Koom Txoos cov cuab tam muag tau nyiaj los faib rau cov neeg pluag txom nyem. Cov nom Los Mas xav tias Los Lees muaj nyiaj ntau, ces lawv yuav tuaj txeeb Los Lees li nyiaj txiag, lawv hais tias yam twg yog lub Koom Txoos tug yuav ua cov nom li. 
Thaum cov nom tswv tuaj txog, tsuas pom muaj cov pej xeem txom nyem nrog Los Lees nyob xwb. Los Lees hais tias cov neeg ntawd yog Koom Txoos lub cuab tam, ces lawv thiaj coj Los Lees mus txhiab hauv lub cub tawg, thaum yuav tuag nws tsa suab thov Ntuj tias “Huab Tais, thov kom tas tsoom neeg hauv tuam ceeb Los Mas no hloov siab tshiab los ntseeg txog koj Leej Tub Yes Xus, thov kom lub Moo Zoo ri mus thoob lub qab ntuj!”
Kwv tij Hmoob, Leej Ntshiab Los Lees lub neej zoo li Huab Tais Yes Xus cov lus hauv hnub no tias “Yog lub noob nplej uas poob rau hauv av tsis tuag, mas lub noob ntawd yuav nyob twm zeej zoo li ntawd. Tab sis lub noob nplej twg poob hauv av, lub noob ntawd tuag, mas yuav tuaj ua ib tsob nplej txhawv hnab ntau.”
Kwv tij Hmoob sawv daws, Leej Ntshiab Los Lees zoo li lub noob nplej tuag kom tuaj tau tsob nplej tshiab tiag, nws kev tuag ua rau muaj ntau tus tub hluas xav ua li nws, lawv tig los ua Koom Txoos cov tub txib kom tau tsob hwb lub Moo Zoo.
Hnub no peb yuav kawm ntawm zaj no, peb txhob nyob dag hnub dhau hnub; peb yuav ua cov hauj lwm tsob hwb cov neeg nyob puag ncig peb, xws li pab mus saib xyuas cov neeg laus, cov neeg muaj mob, pab mus hais lus txhawb siab rau cov neeg qaug zog, pab peb lub zos txhim tej yam muaj qab hau.
Cov kwv tij, nco ntsoov tias thaum peb ua li ntawd, txhob ua kom luag qhuas, txhob ua kom tau suab npe, tiam sis peb yuav ua nyob hauv txoj kev nyiam kev hlub, peb ua los cav txog lub Moo Zoo.
Nyob zoo sawv daws.