Zaj nyeem hnub tim 11 lub 10 hli 2023 (Daily reflection)

ZAJ NYEEM HNUB TIM 11 LUB 10 HLI, HNUB NCO TXOG LEEJ NTSHIAB VAJ QHIA ZAM 23

COV LUS NYOB HAUV LUS KAS NTAWV MOO ZOO (LK 11: 1-4)

Cov kwv tij Hmoob, hnub no peb hnov Huab Tais Yes Xus qhia peb hu Huab Tais Tswv Ntuj ua ‘Txiv’. 

Nyob hauv cov His Xas Lais, mas thaud lawv saib Huab Tais Tswv Ntuj yog ib tug Tswv Ntuj txaus ntshai, yog ib tug Tswv Ntuj nyob siab, thiab deb ntawm lawv. Lawv tsis muaj cuab kav yuav ntsia tau Tswv Ntuj thiab hu Tswv Ntuj lub npe. Tab sis hnub no Huab Tais Yes Xus hais rau cov neeg ntseeg txog nws tias Huab Tais Tswv Ntuj yog tus Tswv Ntuj muaj lub siab hlub mos nyoos, yog tus Tswv Ntuj nyob nrog nraim lawv xws li ib leej txiv hlub thiab nrog cov me nyuam.

Dhau qhov ntawd, peb cov neeg ntseeg sawv daws, peb tseem yuav ua Huab Tais Yes Xus tsaug, vim yog muaj Huab Tais Yes Xus mas niaj hnub no peb thiaj tau ua Huab Tais Tswv Ntuj tseem me nyuam tiag tiag.

Kwv tij, yog vim Huab Tais Tswv Ntuj yog peb Txiv, yog tus pub txoj sia rau peb, thiab Huab Tais Tswv Ntuj yog kev nyiam; yog li txhua zaus thaum peb teev Ntuj peb thiaj yuav hais zaj teev Ntuj raws li Huab Tais Yes Xus qhia tias “Peb Txiv nyob saum ntuj, koj lub npe ntshiab nto moo lug. Koj lub ceeb tsheej los txog, kom muaj raws li koj nyiam nyob ntiaj teb no li nyob saum ntuj. Thov koj pub mov txaus peb noj hnub no. Koj zam txhaum rau peb, zoo li peb zam rau luag. Koj txhob tso peb raug kev ntxias, koj npo peb dim ntawm kev phem. Ua li.”

Kwv tij, niaj zaus peb hais zaj teev Ntuj no, mas peb yuav tso siab rau Leej Txiv Tswv Ntuj tias txhua yam nyob hauv peb lub neej yog tuaj ntawm Tswv Ntuj tuaj, tsis hais xwm zoo los xwm phem, mas peb yuav zoo siab txais los ris. 

Txhua zaus peb hais zaj teev Ntuj no, peb yuav nco txog cov neeg nyob puag ncig peb, peb yuav khuv leej lawv, hlub lawv, nyiam lawv ib yam li peb nyiam peb tus kheej.

Thaum peb hais zaj teev Ntuj no, peb ntseeg tias muaj ib hnub Leej Txiv Tswv Ntuj yuav cia peb rov mus nyob saum ntuj.

Nyob zoo sawv daws.