Zaj nyeem hnub tim 11 lub 11 hlis 2023 (Daily reflection)

ZAJ NYEEM HNUB TIM 11 LUB 11 HLIS, HNUB NCO TXOG LEEJ NTSHIAB MAS TIS NUS NYOB TUJ
COV LUS NYOB HAUV LUS KAS NTAWV MOO ZOO (LK 16: 9-15)

Cov kwv tij Hmoob, lub Moo Zoo hnub no yog txuas zaj nag hmo. Nag hmo peb hnov tus tswv nyiaj qhuas tus tim xyoob siab tsis ncaj txawj ua neeg xyuam xim, mas peb muab nthuav tias yam Tswv Ntuj nyiam mas yog neeg lub siab hlub thiab khuv leej lwm tus, tsis yog neeg lub siab tsis ncaj rau yam Tswv Ntuj pub rau peb.
Hnub no, Huab Tais Yes Xus xav kom peb to taub ntxiv tias yog peb ua ncaj rau tej yam me me Tswv Ntuj muab rau peb, mas muaj ib hnub Tswv Ntuj yuav pub yam loj thiab tseem ceeb dua rau peb saib.
Kwv tij, peb saib yam neeg ‘muaj’ tseem ceeb tsis cuag yam neeg ‘ua’. Piv li tus neeg nplua nuj tab sis cuaj khaum, thiab tus neeg nplua nuj tab sis nws siab dav pub nyiaj rau cov pluag; ob tug no tus twg yuav yog tus tseem ceeb dua? Tus neeg pluag siab phem thiab tus neeg pluag siab zoo, ob tug no tus twg yuav yog tus sawv daws nyiam dua? Tus neeg muaj tswv yim ntse peev xwm loj tab sis nws tsis coj los siv, mas nws puas yuav tseem ceeb dua tus neeg ruam tab sis nquag ua hauj lwm?
Kwv tij Hmoob sawv daws, Huab Tais Yes Xus tsis tsawm cov neeg muaj nyiaj yog lawv paub siv mus rau qhov ncaj; tab sis Huab Tais Yes Xus yauv tsawm tus neeg ua tsis ncaj kom nws tau kaus luag tej li nyiaj los ua nws tug.
Tus neeg txawj pub yam nws muaj nyob hauv ntiaj teb no rau lwm tus, mas yog nws tau ntaus kev phooj ywg nrog sawv daws.
Nyob zoo sawv daws.