Zaj nyeem hnub tim 11 lub 12 hlis 2023 (Daily reflection)

ZAJ NYEEM HNUB TIM 11 LUB 12 HLIS, HNUB NCO TXOG LEEJ NTSHIAB DAS MAS XYUS
COV LUS NYOB HAUV LUS KAS NTAWV MOO ZOO (LK 5: 17-26)
Kwv tij Hmoob sawv daws, lub zim txwv Huab Tais Yes Xus tseem ua neej nyob hauv lub ntiaj teb, mas tsoom His Xas Lais saib Huab Tais Yes Xus yog ib tug neeg muaj hwj huam kho tau cov neeg mob kom rov zoo, tsa tau cov neeg tuag kom rov sawv. Lawv txoj kev ntseeg mas yog ntseeg tias Huab Tais Yes Xus yog tus kws muaj hwj huam raws li peb cov Hmoob cav txog cov kws neeb kws yaig. Lawv tsis paub tias Huab Tais Yes Xus yog Tswv Ntuj. Lawv tsuas paub tias Tswv Ntuj yog tus tsim ntuj tsim teb, yog tus nyob siab thiab nrug deb neeg, Tswv Ntuj nyiam muab txim rau tus neeg txhaum; mas lawv thiaj ntshai hais txog Tswv Ntuj.
Tab sis Leej Txiv Tswv Ntuj xav kom neeg paub qhov tseeb tias Tswv Ntuj hlub neeg, Tswv Ntuj yog tus siab muag siab mos, khuv leej neeg tas nrho, Tswv Ntuj nyob nruab nrab sawv daws; mas Tswv Ntuj thiab tso Leej Tub nqes los xeeb nyob hauv neeg cev nqaij, peb hu Tswv Ntuj Leej Tub lub npe ua ‘Yes Xus’. 
Hnub no, lub Moo Zoo piav tias muaj ib pab neeg hnov tias Huab Tais Yes Xus yog tus kws kho mob, mas lawv thiaj coj lawv tus neeg tuag ceg pw hauv txaj tuaj rau Huab Tais Yes Xus pab. Lawv hlub lawv tus neeg, lawv ua tas txhua yam kom tau tso tus tuag cev lub txaj los rau ntawm Huab Tais Yes Xus xub ntiag. Lawv muaj lub siab ntseeg tias Huab Tais Yes Xus kho tau lawv tus neeg.
Kwv tij Hmoob, yav thaud cov His Xas Lais ntseeg tias txiab mob kev nkeeg, kev txom nyem txhua tsav yog txi ntawm neeg cov txhaum los; zoo li Hmoob pom tej tus neeg yug los tsis zoo xws luag, los yog tej tus laus muaj mob pw da quav, mas Hmoob hais tias yog nws npam los khaum vim tiam tas los, los yog thaum tseem hluas mas nws ua phem rau luag, los yog nws caj ces tau ua tsis ncaj rau lwm tus.
Yog vim cov neeg ntseeg li ntawd, hnub no Huab Tais Yes Xus thiaj hais rau tus taug ceg tias “Me kwv, kuv daws koj cov txhaum tas lawm.” Lo lus no txhais tias “Kuv kho koj kom rov zoo tuaj lawm.”
Kwv tij Hmoob, lawv saib Huab Tais Yes Xus yog kws kho mob, mas Huab Tais Yes Xus thiaj kho lawv cov mob. Tab sis niaj hnub no peb paub lawm tias Huab Tais Yes Xus yog Tswv Ntuj, nws ntxuav tau peb cov txhaum pov tseg, nws cawm peb hauv qhov tuag, txhiv peb hauv kev txhaum. Li ntawd, thov kom peb muaj lub siab ntseeg tias Huab Tais Yes Xus yog Tswv Ntuj, nws tuaj nyob nruab nrab hauv peb, nws tab tom yuav rov nqes los, mas Huab Tais Yes Xus thiaj yuav cawm tau peb xws li kho tus tuag ceg kom mus taus kev. Nyob zoo sawv daws.