Zaj nyeem hnub tim 11 lub 2 hlis 2023 (Daily reflection)

ZAJ NYEEM HNUB TIM 11 LUB 2 HLIS, HNUB NIAM MAB LIAB YEES TAWM NYOB LUB NROOG LUJ
COV LUS NYOB HAUV MAS KOS NTAWV MOO ZOO (MK 8: 1-10)

Kwv tij Hmoob, 7 lub ncuav puas yuav txaus plaub txhiab leej neeg noj? Yeej tsis txaus, tab sis ua cas Huab Tais Yes Xus thiaj ua kom txaus sawv daws noj?
Lub Moo Zoo hnub no tsis tau hais tias Huab Tais Yes Xus ua hwj huam, ces cov ncuav mov ntsu tuaj txaus sawv daws noj. Lub Moo Zoo hais tias Huab Tais Yes Xus tuav cov ncuav mov, nws ua Ntuj tsaug, thiab muab cov ncuav mov ntais rau cov thwj tim coj mus faib rau sawv daws noj.
Kwv tij, ib tug neeg thaum mus kev deb, nws puas mus tes npliag tsis npaj zaub npaj mov ua su. Tej zaus yeej muaj tej tus tsis npaj, tab sis feem coob yeej yuav npaj puas yog? Lub Moo Zoo hnub no tej zaus yog zoo li ntawd thiab.
Thaum Huab Tais Yes Xus pom tias cov neeg coob coob ntawd tsis muaj tus twg kam thaum nws cov ncuav los pub rau lwm tus tau noj, Huab Tais Yes Xus thiaj xav ua piv txwv rau lawv pom tias yog lawv sib hlub tiag, lawv yuav tau pub yam lawv muaj rau lwm tus tau nrog lawv noj, ces Huab Tais Yes Xus thiaj muab cov thwj tim 7 lub ncuav los ntais pub rau sawv daws tau noj. Thaum lawv pom li ntawd, lawv thiaj mam pib thaum lawv cov ncuav tawm los sib faib noj.
Ua cas thaum lawv sib faib noj li ntawd, zoo li lawv muaj ntau yam noj thiab noj tsis tag li. Yog li Ntawv Moo Zoo thiaj piav tias lawv khaws tej mov seem tau 7 tawb.
Kwv tij Hmoob sawv daws, nyob hauv peb lub neej, yog peb txawj sib faib, sib cev noj cev haus, koj nqa ib lauj kaub nov tuaj, kuv nqa ib tais zaub tuaj, tus tov nqa ib ceg nqaij tuaj. Ib tug nqa ib yam me me tuaj, tab sis thaum 10 tus nqa 10 yam tuaj mas thaum tso saum lub tsum ua cas yuav ntau tis ntau, noj tsis tas li.
Yam no yog yam peb pom kiag ntawm peb sawv daws qhov muag tiag. li ntawd mas kwv tij Hmoob sawv daws, thov kom peb sib sib hlub li no mus mog.
Nyob zoo sawv daws.