Zaj nyeem hnub tim 11 lub 8 hli 2023 (Daily reflection)1 aug vdo web

ZAJ NYEEM HNUB TIM 11 LUB 7 HLI, HNUB NCO TXOG LEEJ NTSHIAB KAJ
COV LUS NYOB HAUV MAS TAIS NTAWV MOO ZOO (MT 16: 24-28)

Kwv tij Hmoob sawv daws, hnub no Huab Tais Yes Xus hais meej kawg tias “Yog nej xav los raws kuv, mas nej yuav tsum nrauj nej, thiab nej yuav zoo siab txais nej tus ntoo cuam kwv raws kuv qab.”
Huab Tais Yes Xus lo lus no loj tas nrho tiag tiag. Peb hais tias peb ntseeg txog Yes Xus, tab sis peb yuav raws Huab Tais Yes Xus tsis tau yog peb tsis ‘nrauj’ peb tus kheej. 
Kwv tij, peb nrauj peb li cas? Yog kom peb txhob xav txog peb ntau dhau, peb yuav tsum xav txog Tswv Ntuj thiab xav txog lwm tus ua ntej, zoo li Huab Tais Yes Xus. Peb twb paub tias nyob hauv hmo lawv yuav tuaj ntes Huab Tais Yes Xus, mas Huab Tais Yes Xus ntshai kawg, nws ib ce tawm hws thiab tsis muaj zog, Huab Tais Yes Xus xav khiav mus kom deb, tso txoj hauj lwm cawm neeg pov tseg. Tab sis vim Huab Tais Yes Xus xav txog Huab Tais Leej Txiv, Huab Tais Yes Xus xav txog ntiaj teb neeg kev txom nyem nyob hauv lawv cov txhaum, mas Huab Tais Yes Xus rov ua siab loj, nws rov muaj zog tuaj. Huab Tais Yes Xus zoo siab tuag kom tau txhiv tas sawv daws.
Peb tseem pom ntxiv tias tom qab cov Hauv Paus Xa Lus pom Huab Tais Yes Xus ua tus qauv rau lawv tag, lawv zoo siab tawm mus tshaj lub Moo Zoo rau tas ntiaj teb, lawv tsis nco txog lawv, lawv zoo siab tuag ua tim khawv, tsuas thov kom sawv daws tau txais ib lub Moo Zoo xws li lawv.
Kwv tij, kev nrauj yus tus kheej yog zoo li ntawd.
Yog peb tig los saib nyob hauv peb lub neej, mas peb pom tias cov ua niam ua txiv, lawv txaus siab nrauj lawv tus kheej tau rau lawv cov me nyuam, lawv yoo tshaib tau tsuas thov kom cov me nyuam tau noj tsau, lawv yeem tiv mob theej lawv cov me nyuam. Tab sis cov yog me nyuam puas yuav nrauj tau nws tus kheej kom tau hlub nws niam nws txiv?
Peb yuav thov Huab Tais Leej Txiv peb tus Tswv Ntuj, kom nws pub lub txiaj ntsim rau peb kom peb ua tiag nrauj tau peb pub rau lwm tus, kom peb txawj qee peb lub neej mus pab lwm tus, kom peb txhob tshwj txoj kev nyiam kev hlub rau peb tsev neeg xwb, tiam sis thov kom peb txawj coj mus tseb rau cov nyob sab nraud thiab. 
Nyob zoo sawv daws.