Zaj nyeem hnub tim 12 lub 12 hlis 2023 (Daily reflection)

ZAJ NYEEM HNUB TIM 12 LUB 12 HLIS, HNUB NIAM MAB LIAB YEES TAWM NYOB KUAS DAS LUS PES
COV LUS NYOB HAUV MAS TAIS NTAWV MOO ZOO (MT 18: 12-14)
Kwv tij Hmoob, yog nej coj ib pab tsiaj mus noj zaub tab sis ib tug ploj lawm, mas nej puas qab siab zov cov tsiaj tseem nyob xyaws npoj? Nej kawg ua siab fab txog tus tsiaj ploj lawd, nej kawg tawm mus nrhiav kom pom tus tsiaj ncaim npoj mus. Yog nej muaj ob peb tug me nyuam, ib tug ploj lawm; mas nej puas yuav tawm nrhiav kom ntsib? Hnub no Huab Tais Yes Xus qhia peb tias Huab Tais Tswv Ntuj lub siab hlub neeg mas yog zoo li ntawd. Huab Tais Tswv Ntuj zoo li tus tswv tsiaj tsis xav kom nws ib tug tsiaj ploj li, Huab Tais Tswv Ntuj zoo li leej niam leej txiv tawm nrhiav nkawd tus me nyuam poob zoo kom pom. Nyob rau lub teb chaws His Xas Lais, mas tsoom sid nyiam yug yaj yug tshis, mas Huab Tais Yes Xus thiaj muab lawv lub nej yug yaj yug tshis los ua piv txawv qhia txog Huab Tais Tswv Ntuj lub siab hlub neeg.
Kwv tij, peb tsoom neeg mas zoo li cov yaj, peb sib raws ua ib npoj tiag, tab sis kuj muaj tej tus tsis nyiam xyaw npoj, nyiam khiav mus noj zaub rau qhov ub qhov no. nyob ib ncig pab yaj, mas muaj hma muaj tsov tos ntsoov tom tus yaj ncaim npoj. Nyob hauv peb lub neej kuj zoo li ntawd, muaj kev haub ntxias tos chua peb tawm hauv npoj neeg ntseeg mus. Txawm li ntawd, Huab Tais Tswv Ntuj tseem hlub peb, nws tso neeg tuaj nrhiav peb, rov coj peb los nyob xyaw npoj, rov los nyob poo lub Koom Txoos.
Huab Tais Tswv Ntuj hlub neeg tiag, nws tso Huab Tais Leej Tub nqes los nrhiav cov neeg txhaum, rub lawv tawm hauv lub qhov tuag mus txais txoj sia nyob mus li. lub caij Tos Huab Tais no, peb thiaj yuav rov tu siab rau peb cov txhaum, peb yuav npaj siab kom huv tos txais Huab Tais Leej Tub rov tuaj nyob hauv peb, peb yuav tsa suab hu nrhiav Huab Tais Yes Xus, thov Huab Tais Yes Xus tuaj coj peb rov mus nyob hauv nws lub Koom Txoos Ntshiab.
Nyob zoo sawv daws.