Zaj nyeem hnub tim 12 lub 7 hli 2023 (Daily reflection)

ZAJ NYEEM HNUB TIM 12 LUB 7 HLI, HNUB PLAUB LUB LIS PIAM 14 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 10: 1-7)

Kwv tij Hmoob, lub Moo Zoo hnub no piav txog thaum Huab Tais Yes Xus hu 12 tug thwj tim ua Hauv Paus Xa Lus; yog xa lawv mus tshaj txog Tswv Ntuj lub Ceeb Tsheej, los yog tshaj lub Moo Zoo rau cov His Xas Lais.
Huab Tais Yes Xus xaiv lawv mus tshaj Ntuj lus, yeeb vim Huab Tais Yes Xus pom tias nyob tas lub teb chaws muaj neeg qaug zog thiab sab coob hauj sim, yuav tau muaj cov pab nws leg txoj hauj lwm no mas Tswv Ntuj lub Ceeb Tsheej thiaj mus txog sawv daws.
Kwv tij, ua ntej yuav xa lawv mus, Huab Tais Yes Xus muab lub hwj huam kom lawv ntiab dab tau thiab kom lawv kho tau cov muab txiab mob nkeeeg. Huab Tais Yes Xus lub hwj huam no yog kom lawv mus ua qhov zoo pab cov neeg txom nyem. Huab Tais Yes Xus kuj ntuas lawv kom txhob nqa dab tsi, txhob yuav dab tsi ntawm cov neeg lawv mus cuag. Lawv tus nqe zog tsis yog los ntawm tsoom pej xeem los, tab sis yog Tswv Ntuj mam ua tus muab rau lawv.
Kwv tij Hmoob, thaum peb txais lub Cim Ntxuav, mas kuj yog Tswv Ntuj tau xaiv peb os ua txoj hauj lwm xa lub Moo Zoo no rau lwm tus, Tswv Ntuj tau xaiv peb los pab cawm peb cov kwv tij tseem tsis tau tig los ntseeg, cov tseem nyob hauv kev tsaus, cov nyob hauv kev txom nyem.
Kwv tij, Tswv Ntuj xaiv peb los ua nws txoj hauj lwm, Tswv Ntuj muab tus nqe zog rau peb lawm, yog txoj sia nyob mus li. Li ntawd, tsim nyog peb yuav rau siab ntso ua Tswv Ntuj txoj hauj lwm no, txhob tub nkeeg, txhob tos kom txog lub zim txwv zoo tso. Peb kav tsij ua Tswv Ntuj txoj hauj lwm pab thiab kho peb cov kwv tij mog.
Nyob zoo sawv daws.